Ahib 10 - ÎVUKU RÎA ÛVORO MWARO

¹ Watho nî kîruru Kîam maûndû marîa maro magaaûka, nwatî tî mûvianîre wa ma wa maûndû mau. Magongoona mau nîmarutagwa mwaka wa mwaka. Kwoguo Watho na njîra ya magongoona mau ndûngîvota gûtua andû arîa mathiîcaga kûrî Ngai akinyanîru.

² Ethîrwa andû arîa magoocaga Ngai maarî atherie mevia mao, matiagîrîîrwe nî kwîgua marî evia rîngî na magongoona monthe nîmangîatigire kûrutwa.

³ Nwatî magongoona marîa marutagwa mwaka wa mwaka, maririkanagia andû mevia mao.

⁴ Nîûndû nthakame ya ndegwa na nthenge ndîngîthengutia mevia kuuma kûrî andû.

⁵ Nîûndû wa ûguo rîrîa Kristû aarî vakuvî gûka gûkû nthî, nîwerire Ngai atîrî, “We ndwendaga magongoona na matega, nwatî we nîûvarîrîtie mwîrî nîûndû wakwa.

⁶ We ndûkenagua nî matega marîa mavîvie, kana magongoona marîa mathengutagia mevia.

⁷ Nie nînaacokire ngiuga atîrî, ‘Nîrî ava nîguo mbîke wendi waku we Ngai, wata ûrîa ûvoro wakwa wandîkîtwe îvukuurî rîa Watho.’ ”

⁸ Mbere Kristû aaugire atîrî, “We ndwendaga na ndûkenagua nî magongoona na matega, kana nyamû irîa îvîvîrîtue metharî ya kîgongoona nîguo ithengutie mevia.” Aaugire ûguo wana ethîrwa magongoona mau monthe maarutagwa kûringana na Watho.

⁹ Nîwacokire akiuga atîrî, “Nie nîrî ava Ngai, nîguo mbîke wendi waku.” Kwoguo Ngai nîathengutîtie magongoona marîa makûrû na agekîra îgongoona rîa Kristû vandûrî va mo.

¹⁰ Nîûndû Jesû Kristû nîwekire ûrîa Ngai eendete, tue tûrî atherie kuuma meviarî. Tûtheretue nî îgongoona rîa mwîrî wa Jesû Kristû ûrîa aarutire rita rîmwe rîa kwîgana.

¹¹ Mûthînjîri-Ngai wa wonthe nîarûngamaga wa mûthenya wa mûthenya na akarutîra Ngai magongoona ma mûthemba ûmwe maita meengî. Magongoona mau matingîvota kûthengutia mevia.

¹² Nwatî Kristû nîwarutire îgongoona rîmwe rîa mevia rîrîa rîgûtûûra rîrutaga wîra tene na tene. Nîwacokire agîkara nthî mwenarî wa ûrîo wa Ngai.

¹³ Etererete nginya rîrîa Ngai agaatua nthû ciake gaturwa ka magûrû make.

¹⁴ Na njîra ya îgongoona rîu rîmwe aarutire, ke nîatuîte andû arîa matheretue kuuma meviarî akinyanîru tene na tene.

¹⁵ Nake Roho Mûtheru nî atûvecaga ûira wake. Mbere aaugire atîrî,

¹⁶ “Gîkî nîkîo kîrîkanîro kîrîa ngaarîkanîra nao mîthenyarî îrîa îgaûka. Ûguo nîguo Mwathani akuga. Nîngekîra mawatho makwa ngororî ciao, na nîmandîke meciriarî mao.”

¹⁷ Nîwacokire akiuga atîrî, “Ndigacoka kûririkana mevia mao, wana ciîko ciao njûku rîngî.”

¹⁸ Varîa varî na kwovanîra kwa mevia, vatirî na vata rîngî wa kûrutwa îgongoona rîa kûthengutia mevia.

Nîtûthiîni vakuvî na Ngai

¹⁹ Ariû na aarî a îthe wetû, tûrî na ûmîrîru wa gûtonya varîa vatheru Mûno na njîra ya gîkuû Kîam Jesû Kristû.

²⁰ Ke nîwatûvingûrîre njîra njerû na îrî mwoyo avîtûkîrîrîte gîtambaarî gîa hekarû. Ûguo nî kuga njîra ya mwîrî wake ke mwene.

²¹ Tûrî na mûthînjîri-Ngai mûnene ûrîa ûrûngamîrîrîte nyomba ya Ngai.

²² Kwoguo nîtûthiîni vakuvî na Ngai tûrî na ûvoro wa ma ngororî cietû, wîtîkio wa ma na tûrî na ngoro ntheru na thamiri cietû itagwîcuka na mîîrî yetû îthambîtue na manjî matheru.

²³ Nîtûnyiteni na vinya kîîrîgîrîro gîetû kîrîa tumbûraga tûtarî na nganja, nîûndû Ngai nî mwîvokeku na ciîranîro ciake nî cia ma.

²⁴ Nîtûtethanagieni na twendanage mûndû na ûrîa wîngî na twîkage ciîko mbaro.

²⁵ Tûtigatige gûcemanagia vamwe ta ûrîa andû amwe mamenyerete gwîkaga. Nwatî nîkava tûûmanagîrîrie mûndû na ûrîa wîngî nîûndû nîmûrona atî Mûthenya wa Mwathani nîûkuvîvîrîtie.

²⁶ Ethîrwa nwa twîvie na rûtûrîko vuva wa kûmenya ûvoro ûrîa wa ma, gûtirî îgongoona rîngîvota kûrutwa rîa kûthengutia mevia.

²⁷ Vandû va ûguo ûndû ûrîa ûtigarîte nî gweterera tûrî na guoya îtuîro na mwaki mûnene ûrîa ûkaathiria arîa makararagia Ngai.

²⁸ Mûndû wa wonthe ûregaga kwathîkîra watho nîaûragagwa atakwîguîrwa ntha angiumbûrwa nî aira aîrî kana athatû.

²⁹ Mûndû ûrîa ûrumaga Mûriû wa Ngai na akanyarara nthakame ya kîrîkanîro îrîa yamûtheririe kuuma meviarî, agacoka akaruma Roho ûrîa ûvecanaga wega wa Ngai, mûreciria îvera rîake rîgana atîa?

³⁰ Tue nîtwîcî ûrîa waugire atîrî, “Kwîrîvîrîria nî gwakwa, nie nîngerîvîria,” na agîcoka akiuga, “Mwathani nîke ûgaatuîra andû ake.”

³¹ Nîûndû wa gwîtigîrwa mûno mûndû kûgwa njararî cia Ngai ûrîa mûtûûra mwoyo!

³² Taririkanani ûrîa mwekariî na vau mbere. Mîthenyarî îo, mwarîkia kûthererwa nî ûtheri wa Ngai nîmwathînirue na maûndû meengî mûno, nwatî nîmwaûmîrîrie mathîna mau.

³³ Mavinda mamwe nîmwarumagwa na mûgekwa naaî mûrî kîrîndîrî, na mavinda meengî mûkagwatanîra na arîa maathînagua na njîra wata îo.

³⁴ Nîûndû nîmwanyitanîre mathîna na arîa moovetwe, na rîrîa mwacunirwe indo cienyu nîmweyûmîrîrie mûkenete nîûndû nîmwamenyaga atî mûrî na kîndû Kîamro makîria na gîa gûtûûra.

³⁵ Kwoguo mûtikaûrwe nî vinya nîûndû mwathiî na mbere na kûmîrîria, nîmûkaagîa na kîveo kînene.

³⁶ Mue nîmwagîrîrwe nî gûkirîrîria nîguo mûvotage gwîka wendi wa Ngai, na nîmûkaavewa kîrîa eeranîre.

³⁷ Nîûndû Mandîko Matheru maugîte atîrî, “Nî kavinda kanini gatigarîte, nake ûrîa ûraûka nîagûkinya, tî ekara kavinda karaca ataûkîte.

³⁸ Mûndû wa wonthe mûthingu nîagaatûûra mwoyo nîûndû wa gwîtîkia, nwatî ethîrwa nwa acoke na vuva ndingîkenua nîke.”

³⁹ Tue tûtirî andû arîa macokaga na vuva makaûra, nwatî tûrî andû metîkîtie na avonokie.