Ahib 1 - ÎVUKU RÎA ÛVORO MWARO

Kiugo kîa Ngai na njîra ya Mûriû wake

¹ Tene Ngai nîwaririe mavinda meengî na njîra nyîngî ngûrani kûrî methe metû na njîra ya Arathi.

² Nwatî mavinda mama ma mûthiia, Ngai nîatwarîrîtie na njîra ya Mûriû wake. Ngai aaûmbire nthî yonthe na njîra ya Mûriû wake na nîke Ngai athuurîte nîguo mûthiiarî akagaa indo cionthe.

³ Ke onanagia ûkengu wa riiri wa Ngai na akonania mûvano wa ma wa ûrîa Ngai ekariî. Nîanyitîrîte nthî yonthe na kiugo gîake kîrîa kîrî vinya. Vuva wa kûtheria mevia ma mûndû, nîwekarire mwena wa ûrîo wa Ngai mwene vinya wonthe kûu îgûrû.

Mûriû wa Ngai nî mûnene gûkîra Araika

⁴ Ngai nîwanenevirie Mûriû gûkîra araika wata ûrîa rîîtwa rîrîa amûvere rîrî rînene gûkîra rîa araika.

⁵ Nîûndû Ngai ndaaneera mûraika wanarî ûmwe wake atîrî, “We wî Mûriû wakwa; ûmûnthî nînatuîka Aguo.” Wana Ngai ndaauga ûvoro wîgiî mûraika wanarî ûmwe atîrî, “Nie nîngaatuîka îthe wake, nake atuîke Mûriû wakwa.”

⁶ Nwatî rîrîa Ngai aarî vakuvî kûrete Mûriû wake wa îrikithathi gûkû nthî nîwaugire atîrî, “Araika onthe a Ngai nwanginya mamûgooce.”

⁷ Nwatî ûvoro wîgiî araika Ngai nîwaugire atîrî, “Ngai atucaga araika ake mvuvo, nacio ndungata ciake agaitua nînîmbî cia mwaki.”

⁸ Ûvoro wîgiî Mûriû Ngai nîwaugire atîrî, “Ûthamaki waku we Ngai nîûgûtûûra tene na tene! We wathaga andû aku na kîvooto.

⁹ We wendete ûthingu na ûkamena ûndû mûcûku, kwoguo Ngai, na nîke Ngai waku, nîakûthuurîte na agakûva gîtîîo na gîkeno gîkîrîte kîrîa avete arata aku.”

¹⁰ Ngai nîwacokire akiuga atîrî, “Kîambîrîriarî, we Mwathani nîwaûmbire nthî, na ûkîthondeka îgûrû na njara ciaku.

¹¹ Nîikaathenguta, nwatî we ndûkaathenguta; cionthe ikaathira ta nguo.

¹² We nîûgaaikûnja ta îgooti, na nîigaacenjua ta nguo. Nwatî we ndûcenjagia na ûtûûro waku ndûkaathira.”

¹³ Ngai ndeera mûraika wanarî ûmwe wake atîrî: “Îkara nthî ava mwena wa njara yakwa ya ûrîo, nginya rîrîa ngaatûma nthû ciaku ituîke gaturwa ka magûrû maku.”

¹⁴ Araika nî arîkû? Nî maroho marîa matungatagîra Ngai na nîmatûmagwa nîke magatethia arîa makaavonokua.