Agal 1 - ÎVUKU RÎA ÛVORO MWARO

¹ Kuuma kûrî nie Paûlo mûtûmwa wa Jesû Kristû. Nie ndiathuurirwe nduîke mûtûmwa na njîra ya andû na ndiatûmwa nyumîte kûrî andû. Natuîkire mûtûmwa na njîra ya Jesû Kristû wa vamwe na Ngai Îthe, ûrîa wamûriûkirie.

² Nie vamwe na ariû na aarî a îthe wetû onthe arîa marî gûkû, nîtwamûkethia mue andû a makanitha ma vûrûri wa Galatia.

³ Mûrogîa na wega na thayû kuuma kûrî Ngai Îthe na kuuma kûrî Mwathani wetû Jesû Kristû.

⁴ Kristû nîwerutire ke mwene nîûndû wa mevia metû nîguo atûkûûre kuuma maûndûrî marîa macûku ma mavinda mama. Kristû eekire ûguo kûringana na wendi wa Ngai na nîke îthe wetû.

⁵ Ngai arokumua tene na tene! Ameni.

Ûvoro Mwaro nî ûmwe

⁶ Mue nîmûmakîtie mûno nîûndû vuva wa kavinda kanini, nîmûtiganîrîtie ûrîa wamwîtire na njîra ya wega wa Kristû na mûgetîkîra ûvoro mwaro wîngî.

⁷ Nî ma atî gûtirî “Ûvoro Mwaro wîngî.” Nîrauga ûguo nîûndû kûrî andû maramûthînia na makageria kûgarûra ûvoro mwaro wa Kristû.

⁸ Nwatî ethîrwa tue kana mûraika kuuma îgûrû nwa amûvunjîrie ûvoro wîngî ngûrani na ûrîa twamûvunjîrie, mûndû ûcio aronyitwa nî kîrumi.

⁹ Nîtugîte na nînguga rîngî atî: mûngîvunjîrua nî mûndû wîngî ûvoro mwaro ngûrani na ûrîa mwamûkîre, mûndû ûcio aronyitwa nî kîrumi.

¹⁰ Ndiugaga maûndû mama nîguo ngenie andû nwatî mendaga gûkenia Ngai. Na ethîrwa mendaga gûkenia andû, ndiagîrîrwe nî kwîthîrwa nîrî ndungata ya Kristû.

Ûrîa Paûlo aatuîkire mûtûmwa

¹¹ Ariû na aarî a îthe wetû, nîrenda mûmenya atî ûvoro mwaro ûrîa namûvunjîrie ndwaumîte kûrî mûndû.

¹² Ûvoro ûcio ndiawamûkîra kuuma kûrî mûndû kana ngîthomithua nî mûndû. Jesû Kristû ke mwene nîke wanguûrîrie ûvoro ûcio.

¹³ Mue nîmwîguîte ûvoro wîgiî mûtûûrîre wakwa wa na vau mbere rîrîa naarûmagîrîra ndini ya Ayahudi. Nînaanyariraga kanitha wa Ngai ndarî na ntha na nînaageragia mûno kûûthiria.

¹⁴ Naarî na kîîo mûno gûkîra Ayahudi a riika rîakwa ûvororî wîgiî kûrûmîrîra ndini ya Ayahudi, na nînerutanagîria mûno kûrûmîrîra mîtugo ya kîndûîre ya methe metû ma tene.

¹⁵ Nwatî Ngai nîwanthuurire na njîra ya wega wake wana mbere ya njiarwe na akîmbîta nîmûtungatîre. Na rîrîa aatwire

¹⁶ anguûrîrie Mûriû wake nîguo mvote kûvunjia ûvoro mwaro ûmwîgiî kûrî andû a ndûrîrî, navunjirie ndakûria gûtaarwa nî mûndû.

¹⁷ Wa na ndiathiî Jerusalemu kwona arîa maatuîkîte atûmwa mbere yakwa. Vandû va ûguo, naathiîre Arîbia na vuvarî ngîcoka Damesiki rîngî.

¹⁸ Vuva wa mîaka îthatû, naathiîre Jerusalemu gûcerera Petero, nîguo twaranîrie nake. Nîtwekarire nake ciumia igîrî.

¹⁹ Nie ndiona atûmwa acio engî onthe tiga Jakuvu, ûrîa mûrwang'ina na Jesû.

²⁰ Maûndû mama nîramwîra nîma ma na Ngai nî mûira atî ndiraria maveeni.

²¹ Vuva wa ûguo Nînaathiîre icunjîrî cia Sîria na Cilicia.

²² Vîndî îo andû a makanitha ma Judea matiambîcî.

²³ Mecî tu ûrîa andû engî maaugaga atî, “Mûndû ûrîa watûnyariraga, rîu nîaravunjia ûvoro wa wîtîkio ûrîa ke mwene aageragia kûthiria.”

²⁴ Kwoguo nîmaakumirie Ngai nîûndû wakwa.