Afil 3 - ÎVUKU RÎA ÛVORO MWARO

Ûthingu wa ma

¹ Ngîrîkîrîria, ariû na aarî a îthe wetû kenagani mûrî ûrûmwe na Mwathani. Tî mûrigo kûrî nie kûmwandîkîra maûndû wa marîa nanamwandîkîra rîngî, nîûndû ûndû ûcio nîwakûmûgitîra.

² Îîmenyagîrîreni andû arîa mekaga maûndû macûku, arîa mekariî ta ngui na matemangaga mîîrî.

³ Tue nîtue twîthagîrwa tûruîte nama. Tûkumagia Ngai na njîra ya Roho wake na nîtûkenaga ûtûûrorî wetû tûrî ûrûmwe na Kristû na tûtiîvokaga maûndû marîa twîkaga mîîrî yetû.

⁴ Nîrî nama atî nînîngîavotire kwiga mwîvoko wakwa maûndûrî ma mwîrî. Angîthîrwa nîkûrî mûndû ûngîîvoka maûndû ma nja ma mwîrî, nie nîrî na gîtûmi kînene mûno gîa gwîka guo.

⁵ Naruire nîrî wa mîthenya înana kuuma naciarwa. Nîrî Mûisiraeli wa kuuma mûvîrîgarî wa Benjamini na nîrî wa nthakame ya Mûhibirania viû. Ûvororî wîgiî kûvingia watho, nie naarî Mûfarisai.

⁶ Nînaagîre na kîîo kîngî mûno gîa kûnyarira kanitha wa Kristû. Maûndûrî megiî ûthingu nîûndû wa kwathîkîra watho, ndiarî na ûcuke.

⁷ Nwatî maûndû monthe marîa nîngîatuire atî nîma vata, rîu monaga marî ma mana nîûndû wa Kristû.

⁸ Nîma monaga maûndû monthe marî ma mana nîûndû wa kûgîa na ûndû ûrîa ûrî na umithio mûnene. Ûndû ûcio nî ûvoro wa kûmenya Jesû Kristû Mwathani wakwa. Nîûndû wake nîndiganîrîtie indo cionthe na ngaitua ta macaki ma gûtewa nîguo ngîe na Kristû arî umithio na

⁹ tûtuîke kîndû kîmwe nake viû. Rîu ndiîthagîrwa nîrî na ûthingu wakwa nie mwene ûrîa umanaga na watho. Nîrî na ûthingu wa Ngai, ûrîa ûvecanagwa nîûndû wa gwîtîkia Jesû Kristû. Ûthingu ûcio uumaga kûrî Ngai na njîra ya wîtîkio.

¹⁰ Ûndû ûrîa mendaga nî kûmenya Kristû wa vamwe na vinya wa kûriûka gwake, ngwatanagîre nake mathînarî make na mbîkare take ûvororî wîgiî gîkuû gîake,

¹¹ nîrî na mwîvoko atî nie nîngaariûkua.

Mvinyûraga mbîcî kûrîa nthiîte

¹² Nditucaga atî nîrîmûgîu na kîndû kana atî nîrî mûkinyanîru viû, nwatî mbîthagîrwa ngîîrutanîria nîguo ngîe na kîveo nîûndû Kristû nîmûvootanu na akandua wake.

¹³ Ariû na aarî a îthe wetû, nîramwîra nama atî nie ndirî nîranyita kîrîa ngînyîrîte; ûrîa mbîkaga nî kûriganîrwa nî marîa mavîtûku na ngageria mûno gûkinyîra marîa marî mbere yakwa.

¹⁴ Kwoguo nîîrutanagîria kûvinyûra ndoretie mbere nîguo nacinda mvewe kîveo kîrîa Ngai ambîtîîre kûu îgûrû na njîra ya Jesû Kristû.

¹⁵ Tuonthe arîa agima kîîroho twagîrîrwe nî kwîthîrwa tûrî na meciria ta mau. Nwatî kûngîthîrwa gatagatîrî kenyu kûrî na andû marî na meciria ngûrani, Ngai akamûguûrîria ûndû ûcio wanaguo.

¹⁶ Kûnekariî ûguo, tigani tûthiî na mîthiîre îringanîte na mûtûûrîre ûrîa tûrî naguo.

¹⁷ Ariû na aarî a îthe wetû, îîgerekanagieni nanie. Rûmagîrîrani mîthiîre ya andû arîa marûmagîrîra maûndû marîa twamûonererie.

¹⁸ Ûndû ûyû nthiîte kûmwîra nanamwîra mavinda meengî, na rîu nwa ngûmwîra wa guo ngîrîraga naguo nî atî: andû engî matûûraga ta nthû cia gîkuû gîa Kristû mûtharavarî.

¹⁹ Mûthiia wa andû acio nî gûcûkangua, nîûndû matongoragua nî merirîria ma mîîrî yao îrî yo ngai yao. Maûndû ma nthoni nîmo mamakenagia na meciria mao methagîrwa marî maûndûrî ma gûkû nthî.

²⁰ Nwatî mûciî wetû ûrî îgûrû na nîkuo twetagîrîra mûvonokia wetû aume, na nîke Mwathani wetû Jesû Kristû.

²¹ Ke nîakaagarûra mîîrî îno yetû îkuucaga na îtarî vinya îtuîke ta mwîrî wake ûrîa ûrî na riiri. Ageeka ûguo na vinya wake ûrîa ûtûmaga athe indo cionthe.