Afil 2 - ÎVUKU RÎA ÛVORO MWARO

Wînyivia na Ûnene wa Kristû

¹ Mwatûûra ndarî ya Kristû mûkethagîrwa mûrî na vinya, naguo wendo wake ûkamûmagîrîria. Gwatanagîrani mûrî na Roho Mûtheru; îgucanagîrani ntha na mûtuganage mûndû na mûndû ûrîa wîngî.

² Tûmagani gîkeno gîakwa kîganagîre. Îthagîrwani mûrî na meciria mamwe, wendani wa mûthemba ûmwe, na mwîthagîrwe mûrî kîndû kîmwe ngoro wana meciria.

³ Îkagani maûndû mûtakwîyenda na mûtagwîtîîa. Nwatî na njîra ya wînyivia, vingo cionthe wa mûndû nîatucage ûrîa wîngî mwaro kûmûkîra.

⁴ Mûndû ndakaroragie vata wake tu, nwatî nî aroragie wana maavata ma andû arîa engî.

⁵ Îthagîrwani na ngoro ta îrîa yarî na Kristû Jesû.

⁶ Ke aarî na Ûngai, Nwatî ndeciria atî nwa atûmîre vinya nîguo eganane na Ngai.

⁷ Vandû va ûguo, na njîra ya kwîyendera, nîwatigire ûnene wake wonthe, na agîîtua ndungata. Nake aatuîkire ta mûndû, na akîonekana ta mûndû.

⁸ Ke aarî mwînyivia, na nîwatuîkire mwathîki nginya akîûragwa. Aakwire na njîra ya kwambwa mûtharavarî.

⁹ Nîûndû wa ûguo Ngai nîwamûtûgîririe îgûrû mûno, na akîmûva rîîtwa rînene gûkîra marîa mengî monthe.

¹⁰ Kwoguo ciûmbe cionthe irîa irî îgûrû, irîa irî nthî, wana irîa irî rungu rwa nthî, cionthe igaaturagia maru mbere ya Jesû igakumia rîîtwa rîake,

¹¹ na cionthe ikaumbûraga atî Jesû Kristû nî Mwathani, nîguo Ngai Îthe akumague.

Gûkenga ta ûtheri gûkû nthî

¹² Kwoguo arata akwa, wata ûrîa mwambathîkagîra vîndî îrîa naarî vamwe namue, nîkwagîrîrîte mûmbathîkagîre mûno wana rîu nîrî varaca namue. Thiîni na mbere kûruta wîra mûrî na guoya na mûkinainaga nîguo mûrîkie ûvonokio wenyu.

¹³ Ngai ethagîrwa akîruta wîra ndaarî yenyu vingo cionthe, nîguo atûme mwende na mûvote kwathîkîra wendi wake.

¹⁴ Îkagani maûndû monthe mûtagûteta kana gûkararania.

¹⁵ Nîguo mwîthagîrwe mûrî ciana cia Ngai nginyanîru ntheru na itarî na ûcuke, irîa itûûraga nthî îno îrî na andû aganu na evia. Mûrî gatagatîrî ka andû acio, nwanginya mûkengage ta njata irîa ikengaga matuurî,

¹⁶ rîrîa mûkûmava ndûmîrîri îgiî ûvoro wa mwoyo. Mweka ûguo, nîngaagîa na gîtûmi Kîam gwîtîîa nîûndû wenyu mûthenya wa gûka gwa Kristû. Ûndû ûcio nîûkoonania atî kîîo gîakwa wa vamwe na wîra wakwa itiarî cia mana.

¹⁷ Kwavoteka mbûragwe; na njîra ta îno nîngîthîrwa mbîkariî ta kîgongoona kîrîa mûrutagîra Ngai nîûndû nîmwîtîkîtie. Kûngîtuîka ûguo, nwa mbîthîrwe nîrî na gîkeno na nganyitanîra gîkeno gîakwa na mue muonthe.

¹⁸ Na njîra wata îo, wanamue nîmwagîrîrwe nîkwîthîrwa mûrî na gîkeno na mûnyitanîre na nie gîkenorî kîu.

Timotheo na Epafarodito

¹⁹ Ethîrwa nî kwenda kwa Mwathani, nîrerîgîrîra atî nîngûvota gûtûma Timotheo kûrî mue kavinda gatarî karaca, nîguo anyûmagîrîrie na ndûmîrîri kuuma kûrî mue.

²⁰ Timotheo nwake tu twîthagîrwa tûnyitanîrîte nake kîîmeciria, na nwake wenga ûmwîciragia.

²¹ Andû acio engî onthe methagîrwa makîrûmbûiya wa mûndû maûndû make. Gûtirî mûndû wîciragia gwîka ûrîa Jesû Kristû angîenda gwîkwe.

²² Mue nîmwîcî ûrîa Timotheo onanîtie atî ke nî mwagîrîru, nîûndû twîthîrîtwe tûkîrutithania wîra nake wa kûvunjia ûvoro Mwaro. Twîthîrîtwe tûkîrutithania wîra ûcio ta Mûriû na îthe.

²³ Kwoguo nîrerîgîrîra kûmûtûma kûrî mue narua narîkia kûmenya ûrîa maûndû makwa magwîkara.

²⁴ Nie mwene nîngwîvoka Mwathani atî nîngûka kûrî mue narua.

²⁵ Nîcirîtie na ngona kwagîrîrîte nîmûtûmîre Mûrû wa îthe wetû Epafarodito, ûrîa wîthîrîtwe vamwe nanie tûkîruta wîra tûrî athigari a ûvoro mwaro wa Jesû. Ke ethagîrwa arî mûnjaama wenyu ûrîa ûndethagia.

²⁶ Nîwîriragîria kûmwona muonthe na nîmûmaku mûno amenya atî nîmweguîte atî aarî mûrwaru.

²⁷ Nama aarî mûrwaru na aarî vakuvî gûkua. Nwatî Ngai nîwamwîguîrîre ntha na wananie nîwambîguîrîre ntha na ngîthirwa nî kîeva kîrîa naarî nakîo.

²⁸ Nîregua ngîenda mûno kûmûtûma kûrî mue nîguo mûkene rîngî nîûndû wa kûmwona, nakîo kîeva gîakwa nîgîkûthira.

²⁹ Mwamûkîreni mûrî na gîkeno ta mûrû wa îthe wetû rîîtwarî rîa Mwathani. Vecagani andû onthe gîtîîo na makîria arîa mavana take,

³⁰ nîûndû aarî vakuvî gûkua nîûndû wa wîra wa Kristû. Ekire ûguo nîguo andethie na ûtethio ûrîa mue mûtangîavotire kûmva.