Afil 1 - ÎVUKU RÎA ÛVORO MWARO

¹ Kuuma kûrî Paûlo na Timotheo, ndungata cia Jesû Kristû. Kûrî andû a Ngai onthe a Filipi arîa methagîrwa marî kîndû kîmwe na Jesû Kristû, wa vamwe na atongoria a kanitha na arîa mamatethagîrîria.

² Wega na thayû wa Ngai Îthe wetû na wa Mwathani Jesû Kristû irogîa namue.

Paûlo nîwavoere Afilipi

³ Nînjokagia ngatho kûrî Ngai wakwa vingo cionthe rîrîa neciria ûvoro wenyu.

⁴ Nînîmûvoyagîra muonthe vingo cionthe nîrî na gîkeno,

⁵ nîûndû wa ûrîa mûndethetie gûtambia ûvoro mwaro kuuma mûthenya wa mbere nginya ûmûnthî.

⁶ Kwoguo nîrî na ma atî Ngai ûrîa wambîrîrie wîra mwaro kûrî mue nî akûûruta nginya akaaûrîkia mûthenya wa gûcoka kwa Jesû Kristû.

⁷ Nîmbagîrîrwe nî kwîgua ûguo mbîgucaga nîûndû wenyu, nîûndû mwîthagîrwa mûrî ngororî yakwa vingo cionthe. Muonthe nîmûrutithanîtie wîra mwaro nanie ûrîa Ngai amvete. Mwekire ûguo vîndî îrîa naarî mwove njeera, wana rîrîa naarî na wîathi wa kûgitîra ûvoro mwaro na ngîtûma mwîtîkie mûtarî na nganja.

⁸ Ngai nî mûira atî nîraria ûma vîndî îrîa nguga atî wendo wakwa kûrî mue wîthagîrwa umîte ngororî ya Jesû Kristû ke mwene.

⁹ Îvoya rîakwa kûrî mue nî atî wendo wenyu ûthiî na mbere kwongerereka, vamwe na ûmenyo wa ma na gûkûûrana maûndû waro,

¹⁰ nîguo mûvotage kûthuura ûndû ûrîa mwaro. Namue mûkeethîrwa mûrî atheru na mûtarî na ûcuke mûthenya wa gûcoka gwa Kristû.

¹¹ Nayo mîtûûrîre yenyu îkeethagîrwa îcûrîtwe nî maûndû maro marîa maumanaga na ûthingu ûrîa ûvecanagwa nî Jesû Kristû tu nîûndû wa riiri na ngumo ya Ngai.

Ûtûûro ûrîa mwaro nî wa gûtungatîra Kristû

¹² Ariû na aarî a îthe wetû, nîrenda mûmenye atî maûndû marîa mekîkîte kûrî nie nîmandethereretie gûtambia ûvoro mwaro.

¹³ Na nîûndû wa gîtûmi gîkî arangîri onthe a nyomba ya mûthamaki na andû arîa engî onthe nîmamenyete atî nie njovetwe njeera nîûndû nîrî ndungata ya Kristû.

¹⁴ Nîûndû wa kwîthîrwa nîrî njeera, nîgûtûmîte etîkia eengî mevoke Mwathani mûno. Kwoguo nîmavunjagia ndûmîrîri ya Mwathani matarî na guoya.

¹⁵ Nîma atî amwe ao mavunjagia ûvoro wa Kristû marî na wîru na ngarari, nwatî engî mavunjagia marî na ngoro ntheru.

¹⁶ Andû arîa methagîrwa marî na ngoro ntheru mavunjagia marî na wendo nîûndû nîmecî atî njovetwe njeera nîûndû nîngitagîra ûvoro mwaro.

¹⁷ Acio eengî nîragwetete mbere mativunjagia ûvoro wîgiî Kristû na ngoro ntheru, nwatî mavunjagia marî na merirîria ma wîyendi. Meciragia atî meka ûguo nîmagûtûma nthînue mûno nîrî gûkû njeera.

¹⁸ Ûndû ûcio mareka ndûrî na vata. Ûndû ûrîa ûrî na vata na ûngenagia nî atî Kristû avunjue na njîra îrîa îngîvoteka, wana ethîrwa îrî njîra îrîa mbaro kana îrîa njûku.

¹⁹ Nîûndû nîmbîcî atî nie nîndekererua nîûndû wa mavoya menyu wa vamwe na ûtethio ûrîa uumaga kûrî Roho wa Jesû Kristû.

²⁰ Nînîîriragîria mûno, na ngerîgîrîra atî ndigaaconoka nî ûndû wana ûrîkû, nwatî ngeethagîrwa nîrî na ûmîrîru rîu na vingo cionthe, nîguo mwîrî wakwa wonthe ûtûmage Kristû akumue ethîrwa nîrî mwoyo kana nîrî mûkuû.

²¹ Nîûndû nie vakwa, ndûûraga nîguo ndungatîre Kristû na gûkua nî umithio.

²² Nwatî ethîrwa nîngîthiî na mbere na gûtûûra nwa ndute wîra ûrî na maciaro; rîu ndiîcî ûndû ûrîa ngûthuura.

²³ Maûndû mau maîrî nîmarangucanîria. Nînîrerirîria mûno gûkua, nîguo ngatûûranie na Kristû nîûndû ûguo nîguo waro mûno.

²⁴ Nwatî nîguo nîmûtethie, kûrî na vata mûno ndûûre mwoyo.

²⁵ Nîrî na ma ya ûndû ûyû na kwoguo nîmbîcî nî ngûtûûra mwoyo. Nîndûûrania namue muonthe, nîguo ndûmage mûthiî na mbere na mûgîe na gîkeno kîîngî wîtîkiorî wenyu,

²⁶ nîguo rîrîa ngeethîrwa tûrî namue rîngî mûkeethîrwa mûrî na gîtûmi kîganu gîa gwîtîîa nîûndû wakwa mûtûûrîrerî wenyu mûrî na ûrûmwe na Kristû Jesû.

²⁷ Rîu, ûndû ûrîa ûrî na vata mûno nî atî mûtûûrage ta ûrîa ûvoro mwaro wa Jesû Kristû ûmwîraga mûtûûre, nîguo wana ethîrwa nîngûka kûmwona kana ndege gûka, nîngegua atî nîmûrûngamîte mwîkindîrîtie na mwî na ngoro îmwe, na atî nîmûrarûa mûnyitanîte vamwe nîûndû wa wîtîkio wa ûvoro ûrîa mwaro.

²⁸ Mûtigetigîre nthû cienyu. Îthagîrwani mûrî na ûmîrîru vingo cionthe. Mweka ûguo nîmûkwonia nthû cienyu atî itikaavootana, nwatî nîmûkaavootana nîûndû Ngai nîke ûtûmaga mûvootane.

²⁹ Mue nîmûvetwe kamweke ga gûtungatîra Kristû, tî na njîra ya kûmwîtîkia nwatî nî wana ya kûthînua nîûndû wake.

³⁰ Na rîu nwa mûnyitanîre nanie mbaararî. Mbaara îrîa mwonire ngîrûa mavinda marîa maavîtûkire nwa ta yo mûregua ngîrûa nginya rîu.