Aefeso 6 - ÎVUKU RÎA ÛVORO MWARO

Ciana na Aciari

¹ Mue ciana, athîkagîrani aciari enyu nîûndû nîmwîtîkîtie Mwathani. Ûguo nîguo mwagîrîrwe nî gwîka.

² “Tîîa aguo na nyûkwe.” Rîîrî nîrîo rîathani rîa mbere rîrîa rîthagîrwa rîrî na kîîranîro,

³ “nîguo maûndû monthe maku mathiî waro na ûtûûre îvinda îraca gûkû nthî.”

⁴ Mue aciari tigagani gwîka ciana cienyu maûndû marîa mangîtûma irakare. Vandû va ûguo, imenyagîrîreni na mûitaarage ciîkage wata ûrîa mûndû ûrîa wîtîkîtie Mwathani agîrîrwe nî gwîka.

Ngombo na athani

⁵ Mue ngombo, athîkagîrani athani enyu mûrî na guoya na mûkinainaga. Îkagani ûguo mûrî na ngoro îmwe takwa mûrathîkîra Kristû.

⁶ Tigagani gwîkaga ûguo tu wa rîrîa mamûroretie atî nîûndû wa kwenda kwîyendithia kûrî o. Nwatî mûrî ta ngombo cia Kristû, vingagiani wendi wa Ngai mûkîvûthagîra vinya wonthe wenyu.

⁷ Rutagani wîra wenyu ta ngombo mûkenete, takwa mûratungatîra Mwathani nwatî tî andû.

⁸ Mûndû wa wonthe wana ethîrwa nî ngombo kana tî ngombo, nîamenyage atî Mwathani nîakaava wa mûndû kîveo nîûndû wa wîra mwaro ûrîa wa mûndû ekaga.

⁹ Wa namue athani, vecagani ngombo cienyu gîtîîo na mûtigage kûmekîra guoya. Menyagani atî mue na ngombo cienyu mûrî a Mwathani ûmwe ûrîa ûrî îgûrû, na atî ke atucagîra andû onthe cira atarî na kîmenyano.

Indo cia Mbaara cia Ngai

¹⁰ Rîu ngîrîkîrîria, nîramwîra mûgîcage na vinya mûmagîrîrie mûrî ndaarî ya Mwathani na mûvotithîtue nî vinya mwîngî wake.

¹¹ Îkîrani indo cionthe cia mbaara cia Ngai nîguo mûvotage kwîgitîra kuumana na mawara macûku ma Ngoma.

¹² Nîûndû tûtirarûa na andû nwatî tûrarûa na maavinya macûku ma kîîroho marîa marî îgûrû rîerarî, na tûkarûa na monene na maavinya na athani a nduma a gûkû nthî.

¹³ Kwoguo îkîrani wa rîu indo cia mbaara cia Ngai! Naguo mûthenya ûrîa maûndû marîa macûku mageekîka, nîmûkaavota kwîgitîra kuumana na nthû, na mwarîkia kûrûa nayo, mûgaatigwa mwîkindîrîtie.

¹⁴ Kwoguo îkaragani mwîkindîrîtie na mwîvotorete ûma ta arî guo mûcivi ûrîa mwîyovaga kîûnûrî, naguo ûthingu ta arî yo ngo yenyu ya kûgitîra kîthûri,

¹⁵ na wendi wenyu wa kûvunjia ûvoro mwaro wa thayû ta arî guo iratû irîa mwîkagîra.

¹⁶ Wîtîkio wenyu vîndî cionthe nîwîthagîrwe wîkariî ta ngo mwîkuuîrîte îrîa mûkaavotaga kûvoria nayo mîguî îrîa îthagîrwa îgîakana na ikagua nî Ûrîa Mûcûku.

¹⁷ Amûkîrani ûvonokio ta arî yo ngovia yenyu ya cuuma ya kûgitîra kîongo, na kiugo Kîam Ngai ta arî ruo rûviû rûrîa Roho amûvecaga.

¹⁸ Voyagani Ngai amûtethagie vîndî îrîa mûreka maûndû mama monthe. Voyagani vîndî cionthe mûtongoretue nî Roho. Nîûndû wa gîtûmi kîu, îkaragani mwîvarîrîtie na mûtikanakue ngoro. Voyagîrani andû onthe a Ngai vîndî cionthe.

¹⁹ Mvoyagîrani wa nanie atî rîrîa navingûra kanyua gakwa, Ngai amvecage ciugo nîguo mbaragie nthitho ya ûvoro mwaro ndarî na guoya.

²⁰ Nîrî mwarîrîria wa ûvoro mwaro, na nîreka ûguo rîu nîrî gûkû njeera. Mvoyagîrani nîguo mvunjagie ûvoro mwaro ndarî na guoya wata ûrîa mbagîrîrwe nî kwaria.

Ngethi cia Mûthiia

²¹ Tukiko, mûrû wa îthe wetû ûrîa twendete mûno na mûtungatîri mwîvokeku wîrarî wa Mwathani, nîke ûkaamwîra maûndû monthe nîguo mûmenye ûrîa mbîkariî na ûrîa nîreka.

²² Kîu nîkîo kîratûma nîmûtûme kûrî mue nîguo amwîre ûrîa tuonthe twîkariî na amûûmîrîrie.

²³ Mue muonthe arîa mwîtîkîtie Mwathani mûrogîa na thayû na wendani ûrî na wîtîkio kuuma kûrî Ngai Vava wa vamwe na Mwathani Jesû Kristû.

²⁴ Wega wa Ngai ûrekara na arîa onthe mendete Mwathani wetû Jesû Kristû marî na wendani ûrîa ûtathiraga.