Aefeso 5 - ÎVUKU RÎA ÛVORO MWARO

Tûûragani ûtherirî

¹ Nîûndû mûrî ciana mende cia Ngai, geragiani kûvanana nake.

² Tûûragani na mîkarîre ya wendani wata ûrîa Kristû aatwendire na akîîruta nîûndû wetû ekariî ta îtega na îgongoona rînungaga waro na rîkenagia Ngai.

³ Na nîûndû mûrî andû a Ngai, maûndû mamwe matiagîrîrwe wana nî kûgwetwa gatagatîrî kenyu, namo nî ûmaraa, ûûra nthoni na ûkoroku.

⁴ Mûtiagîrîrwe mwaragie mîario îrî na nthoni, ya îtherû rîcûku na ya ûrimû. Vandû va ûguo mwagîrîrwe nî gûcokagia ngatho kûrî Ngai.

⁵ Menyani na ma atî mûndû ûrîa ûvûraga ûmaraa, ûrîa ûrî na ûûra nthoni kana ûkoroku (nîûndû gûkoroka nî gûtungatîra ngai cia mîvuanano) ndakaagîa na îgai ûthamakirî wa Kristû na wa Ngai.

⁶ Mûtigetîkîre mûndû wana ûrîkû amûveenererie na ciugo ntheri, nîûndû mîtugo ta îo nîyo îtûmaga Ngai arakarue nî andû arîa matamwathîkagîra.

⁷ Kwoguo tigagani kûgwatanîra na andû ta acio.

⁸ Vîndî îmwe mwatûûraga ndumarî, nwatî rîu mûtûûraga ûtherirî nîûndû nîmûtuîkîte andû a Mwathani. Kwoguo tûûragani ta andû marî ûtherirî,

⁹ nîûndû ûtheri nîguo ûretaga maûndû monthe maro, ma ûthingu na ma ma.

¹⁰ Geragiani kûmenya maûndû marîa makenagia Mwathani.

¹¹ Tigagani kûgwatanîra na andû arîa mekaga maûndû marîa matarî vata na mekagîrwa ndumarî. Vandû va ûguo, tigagani maûndû mau mamenyekanage nî andû.

¹² (Nî ûndû ûrî na nthoni mûno wana nginya kwaria ûvoro wîgiî maûndû marîa mekagîra nthithorî.)

¹³ Rîrîa maûndû monthe maretwa ûtherirî, mwîkarîre wamo wa ma nîûguûragua cararûkû;

¹⁴ nîûndû ûndû wa wonthe ûguûrîtue cararûkû nîûtuîkaga ûtheri. Na kîu nîkîo gîtûmaga kwîrwe atîrî: “We ûmamîte ûkîra, na ûriûke ume kûrî arîa akuû, na Kristû nîagûkûva ûtheri.”

¹⁵ Kwoguo menyagîrîrani mîkarîre yenyu. Tigagani gwîkara ta andû aritu, îkaragani ta andû aûgî.

¹⁶ Kanya wa konthe karîa mûrî nako kavûthagîreni waro, nîûndû mîthenya îno nî mîcûku.

¹⁷ Kwoguo tigagani gûtuîka irimû. Nwatî geragiani kûmenya ûrîa Mwathani endaga mwîke.

¹⁸ Tigagani kûrîwa nî ndivei nîûndû ûrîu nîkwa ûkûmwananga, vandû va ûguo îcûragwani nî Roho.

¹⁹ Aranagîriani na ciugo cia thaburi, nyîmbo cia gûkumia Ngai na nyîmbo cia kîîroho. Inagîrani Mwathani na mûmûkumagie na ngoro cienyu cionthe.

²⁰ Na rîîtwa rîa Mwathani wetû Jesû Kristû, cokagiani ngatho kûrî Ngai Vava maûndûrî monthe.

Aka na Athuuri

²¹ Athîkanagîrani mûndû na ûrîa wîngî nîûndû wa ûrîa mûtîîte Kristû.

²² Mue aka, athîkagîrani athuuri enyu wata ûrîa mûngîathîkîra Mwathani.

²³ Nîûndû mûthuuri nîke wathaga mûndûmûka wata ûrîa Kristû arî ke wathaga kanitha. Na Kristû ke mwene nîke Mûvonokia wa Kanitha, ûrîa arî guo mwîrî wake.

²⁴ Kwoguo mûndûmûka nîathîkagîre mûthuuri wake maûndûrî monthe wata ûrîa kanitha wathîkagîra Kristû.

²⁵ Namue athuuri, endagani aka enyu wata ûrîa Kristû eendire kanitha na akîîruta nîûndû waguo.

²⁶ Eekire ûguo nîguo awamûrîre Ngai na njîra ya kiugo gîake. Nîwatheririe kanitha na njîra ya kûûthambia na manjî.

²⁷ Aakwire nîguo egîîre na kanitha wîkariî ta mûviki, ûrî na riiri na mûtheru, na ûtarî na îvîtia, wîvia, naaî kana ûcûku wana ûrîkû.

²⁸ Mûthuuri agîrîrwe nî kwendaga mûka wake wa ta ûrîa endete mwîrî wake. Mûndû ûrîa wendete mûka nîke wîyendete.

²⁹ (Gûtirî mûndû ûmenete mwîrî wake. Vandû va ûguo, mûndû wa wonthe nîavecaga mwîrî wake irio na akaûmenyerera. Na ûguo nwa ta guo Kristû ekaga kanitha;

³⁰ nîûndû tûrî ciîga cia mwîrî wake.)

³¹ Wa ta ûrîa mandîko matheru maugîte atîrî, “Nîûndû wa gîtûmi gîkî mûndû mûrûme agatigaga îthe na ng'ina na akagwatana na mûka, na oîrî magatuîka kîndû kîmwe.”

³² Gîcunjîrî gîkî Kîam mandîko matheru varî na nthitho ya vata mûno, na nîrona atî ciugo ino iraria ûvoro wîgiî Kristû na kanitha.

³³ Nwatî ciugo ino nwa iraria ûvoro ûmwîgiî atî: mûthuuri wa wonthe nwanginya endage mûka wata ûrîa eyendete, na mûndûmûka wa wonthe nwanginya atîîage mûthuuri wake.