Aefeso 2 - ÎVUKU RÎA ÛVORO MWARO

Gûtûûra ûtûûro mûcerû

¹ Mue mwarî akuû kîîroho nîûndû wa ûremi na mevia menyu.

² Vîndî îo mwarûmagîrîra maûndû macûku ma nthî îno. Mwathîkagîra mûnene wa maavinya ma kîîroho marîa marî rîerarî. Roho ûcio nîke wathaga andû arîa maregaga kwathîkîra Ngai.

³ Ûma nî atî wa natue tuonthe twekaga wa tao. Twatûûraga twathagwa nî merirîria metû ma kîîndwîre na tûgekaga maûndû marîa meriragîrua nî mîîrî yetû na meciria metû, na twarî tûkinyîrwe nî marakara ma Ngai wata andû arîa engî.

⁴ Nwatî ntha cia Ngai nî nyîngî mûno na nîatwendete mûno.

⁵ Wana rîrîa twarî akuû kîîroho nîûndû wa ûremi wetû, nîwatûmire tûtûûre mwoyo vamwe na Kristû. Nî wega wa Ngai ûtûmîte mûvonoke.

⁶ Ke nîwatûriûkirie tûrî kîndû kîmwe na Jesû Kristû nîguo twathane vamwe nake kûu îgûrû.

⁷ Eekire ûguo nîguo mavindarî monthe marîa magaaûka akoonania magegania na ûnene wa wega wake. Eekire ûguo na njîra ya wendo ûrîa aatwonirie na njîra ya Jesû Kristû.

⁸ Nî wega wa Ngai ûtûmîte mûvonokue na njîra ya gwîtîkia. Ûvonokio wenyu ndumanîte na mawîra marîa mwanaruta, nwatî nî kîveo kuuma kûrî Ngai.

⁹ Kwoguo gûtirî mûndû ûngîîtîîa nîûndû wa kîo.

¹⁰ Ngai aatûmbire ûguo twîkariî na njîra ya Kristû nîguo twîkage ciîko mbaro irîa aavangîte twîkage.

Kîndû kîmwe na Kristû

¹¹ Mue mûtiaciarwa mûrî Ayahudi. Mue nîmue andû arîa Ayahudi metaga “andû matarî aruu.” (Kûrua kwao nî kwa mîîrî). Taririkanani ûrîa mwatûûraga vîndî ya tene.

¹² Vîndî îo mûtiarî na Kristû. Mûtiarî a ngwatanîro ya andû arîa Ngai athuurîte na kwoguo mwarî ageni. Mûtiarî na vandû irîkanîrorî irîa ciaumanîte na ciîranîro cia Ngai kûrî andû ake. Mwatûûraga gûkû nthî îno mûtarî na mwîrîgîrîro na mûtarî na Ngai.

¹³ Nwatî rîu, nîûndû mûrî kîndû kîmwe na Jesû Kristû, mue arîa mwarî varaca na Ngai, nîmûretaretetwe vakuvî nake na njîra ya nthakame ya Kristû.

¹⁴ Nîûndû Kristû nîke thayû wetû. Ke nîanyitithanîtie Ayahudi na andû a Ndûrîrî magatuîka kîndû kîmwe. Maagaûkanîte takwa vaarî na rûthingo gatagatîrî kao, nwatî Kristû nîwatharirie rûthingo rwa rûmena na njîra ya kûruta mwîrî wake.

¹⁵ Kristû nîwathiririe watho wa Ayahudi na maathani maguo nîguo athondeke rûrîrî rûcerû na rûrî kîndû kîmwe nake kuumana na ndûrîrî icio igîrî. Kwoguo nîwatûmire andû magîe na thayû.

¹⁶ Na njîra ya kwîruta akue mûtharavarî, Kristû nîwathirîrie ndûrîrî icio igîrî ûthû na agîciîgwithania na Ngai igîtuîka mwîrî ûmwe.

¹⁷ Kwoguo Kristû nîwaûkire na akîvunjia Ûvoro Mwaro wa thayû kûrî mue andû a Ndûrîrî arîa mwarî kûraca na Ngai na kûrî Ayahudi arîa maarî vakuvî nake.

¹⁸ Na njîra ya Kristû, tuonthe Ayahudi na andû a Ndûrîrî nîtûvotithagua nî Roho ûmwe gûkinya kûrî Vava wetû.

¹⁹ Kwoguo, mue andû a Ndûrîrî mûtirî ageni kana avîtûki rîngî, nwatî rîu nîmûtuîkîte kîndû kîmwe na andû a nyomba ya Ngai.

²⁰ Wa namue mwîkariî ta nyomba îrîa yatumirwe îgûrû rîa atûmwa na arathi marî ta o mûcingi. Nake Kristû ke mwene nîke îthiga rîrîa rîa vata mûno rîa nyomba îo.

²¹ Ke nîke ûtûmaga nyomba îo yonthe îgwatane vamwe na îneneve îtuîke hekarû ntheru îtegeretwe Mwathani.

²² Na mûrî na ûrûmwe na Kristû, wa namue nîmûratumwa vamwe na arîa engî onthe nîguo mûtuîke gîkaro Kîam Roho wa Ngai na njîra ya Roho.