Aefeso 1 - ÎVUKU RÎA ÛVORO MWARO

¹ Kuuma kûrî nie Paûlo, ûrîa Ngai aatuire mûtûmwa wa Jesû Kristû nîûndû ûcio nîguo warî wendi wake. Kûrî andû a Ngai arîa marî Efeso, arîa evokeku ûtûûrorî wao na marî kîndû kîmwe na Jesû Kristû.

² Mûrogîa na wega na thayû wa Ngai Vava wetû wana wa Mwathani Jesû Kristû.

Irathimo cia kîîroho varî Kristû

³ Tigani tûkumie Ngai Îthe wa Mwathani wetû Jesû Kristû! Tûrî kîndû kîmwe na Kristû, Ngai nîatûrathimaga na irathimo cionthe cia kîîroho irîa irî îgûrû.

⁴ Na njîra ya kwîthîrwa tûrî kîndû kîmwe na Kristû, Ngai nîwatûthuurire tûtuîke andû ake atheru na matarî na ûcuke mbere yake. Nîûndû wa wendo wake,

⁵ Ngai nîwatuîte wa mbere atî nîagaatûtua ciana ciake na njîra ya Jesû Kristû. Ûcio nîguo warî mworoto wa wendi wake.

⁶ Tigani tûkumie Ngai nîûndû wa riiri wa wega wake, na nîûndû wa kîveo kîrîa atûvete mana na njîra ya Mûriû wake mwende!

⁷ Nîtûrutîtwe meviarî na njîra ya nthakame ya Kristû, ûguo nîkuga nîtwoveretwe mevia metû nîûndû wa wega wake mwîngî

⁸ ûrîa atûvete na njîra îtarî kîthimi! Ngai arî na ûûgî na ûmenyo wake,

⁹ nîwatûmenyithirie nthitho ya wendi wake. Ûguo nîguo eendete na nîguo aavangîte nîagwîka na njîra ya Kristû.

¹⁰ Mûvango ûrîa Ngai akaavingia kavinda karîa kagîrîru gakinya, nî wa gûcokanîrîria indo cionthe irîa irî îgûrû na irî nthî, na Kristû ethîrwe arî ta ke kîongo.

¹¹ Maûndû monthe mekagwa kûringana na mûvango wa Ngai na îtua rîake. Nake Ngai aatûthuurire tûtuîke andû ake tûrî kîndû kîmwe na Kristû nîûndû mûvango ûcio nîguo aatuîte kuuma wa Kîammbîrîria atî nîakaaûvingia.

¹² Tigani tue arîa twathuurirwe na twarî a mbere kwîrîgîrîra Kristû tûkumie riiri wa Ngai!

¹³ Wa namue nîmwatuîkire andû a Ngai vîndî îrîa mwegwire ndûmîrîri ya ma, na nîyo ûvoro mwaro wa kûvonokua kwenyu. Nîmwetîkirie Kristû na Ngai akîmûvûra mûvûri wa kwonania atî mûrî ake na njîra ya kûmûva Roho Mûtheru ûrîa aamwîrîrîte.

¹⁴ Roho nîke ûtûmenyithagia na ma atî nîtûkaagîa na kîrîa Ngai eerîre andû ake. Ke nîatwonagia na ma atî Ngai nîakaavecana wîyathi mwîganu kûrî arîa ake. Tigani tûkumie riiri wake!

Îvoya rîa Paûlo

¹⁵ Nîûndû wa gîtûmi kîu, kuuma wa rîrîa neguire ûrîa mwîtîkîtie Mwathani Jesû na ûrîa mwendete andû onthe a Ngai

¹⁶ nditigithagîrîria gûcokia ngatho kûrî Ngai nîûndû wenyu. Rîrîa rîonthe nîravoya nîmûririkanaga.

¹⁷ Mvoyaga Ngai wa Mwathani wetû Jesû Kristû, ûrîa arî ke Îthe wetû ûrî riiri amûve Roho ûrîa ûgûtûma mûvîge na ûkûmûguûrîria Ngai nîguo mûmûmenye waro.

¹⁸ Mvoyaga Ngai avingûre metho ma ngoro cienyu, nîguo mûmenye nî kîîrîgîrîro kîrîkû atwîtîrîte na mûmenye ûtonga na riiri wa îgai rîrîa erîrîte andû ake.

¹⁹ Mvoyaga mûmenye tue arîa twîtîkîtie ûrîa tûratethua nî vinya wake mwîngî. Vinya ûyû ûratûtethia, nwaguo vinya

²⁰ ûrîa aatûmîre vîndî îrîa aariûkirie Kristû na akîmwiga mwenarî wake wa ûrîo kûu îgûrû.

²¹ Kûu Kristû athanaga arî îgûrû rîa anene onthe, athani, maavinya na mothamaki. Ke arî na rîîtwa rîkîrîte marîa mengî monthe ma mavinda ma rîu wana ma mavinda marîa magaaûka.

²² Ngai nîwaigire maûndû monthe rungu rwa magûrû ma Kristû na akîmûtua Mwathani wa indo cionthe nîûndû wa kanitha.

²³ Kanitha nî mwîrî wa Kristû, na nîîcûrîtwe nî Kristû ûrîa arî ke wîcûru wa maûndû monthe marîa marî kûndû kuonthe.