3Joh 1 - ÎVUKU RÎA ÛVORO MWARO

¹ Nie mûthuuri, nîrakwandîkîra we Gayo mûrata wakwa ûrîa mendete na ma.

² Mûrata wakwa, nîravoya maûndû maku monthe methîrwe marî maro na wîthîrwe ûrî na ûgima wa mwîrî, nîûndû nîmbîcî atî ngoro yaku nî mbaro.

³ Nînîrakenire mûno rîrîa akristiano marakinyire na makîmbîra ûrîa we ûrî mwîvokeku ûvororî wa ma, wata ûrîa ûtûûraga ûvororî ûcio wa ma.

⁴ Gûtirî ûndû wîngî ûngenagia tiga kwîgua atî ciana ciakwa nîitûûraga ûvororî wa ma.

Gayo nîwakumirue

⁵ Mûrata wakwa, we wîthagîrwa ûrî mwîvokeku wîrarî waku ûrîa ûrutagîra akristiano arîa engî wana ethîrwa marî andû ûtecî.

⁶ Nîmararutire ûira kanitharî ûvoro wîgiî wendo waku. Matethagie nîguo mathiî na njîra îrîa îngîkenia Mwathani.

⁷ Nîûndû maumaga kwao na makathiî gûtungatîra Kristû, na matiîtîkagîra kîndû kuuma kûrî andû arîa matetîkîtie Jesû Kristû.

⁸ Kwoguo tue akristiano nîtwagîrîrwe nî gûtethia andû aya, nîguo twîthîrwe tûrî aruti wîra vamwe nao ûvororî ûrîa wa ma.

Dioterefe na Demetirio

⁹ Nînandîkîîre kanitha kamaarûa gakuvî, nwatî Dioterefe ûrîa wîtucaga mûnene wao ndetîkagîra maûndû marîa mbugaga.

¹⁰ Kwoguo rîrîa ngaaûka nîngaaumbûra maûndû monthe marîa ekaga. Nîngaaumbûra ûrîa aragia maûndû meengî macûku matwîgiî. Na twa mau monga, ke mwene ndagwataga ariû na aarî a îthe wetû arîa engî ûgeni na nîagiragia arîa makwenda kûmagwata ûgeni mamagwate na akamengata kanitharî!

¹¹ Mûrata wakwa, ndûkarûmîrîre maûndû marîa macûku, nwatî rûmagîrîra maûndû marîa maro. Mûndû wa wonthe wîkaga waro nî wa Ngai, nake mûndû wa wonthe wîkaga maûndû macûku ndaanona Ngai.

¹² Andû onthe maragia maûndû maro megiî Demetirio. Ûma guo mwene nîwaragia ûvoro mwaro ûmwîgiî. Wanatue nîtwaragia maûndû maro mamwîgiî na nîmwîcî atî maûndû marîa twaragia nîma ma.

Ngethi cia mûthiia

¹³ Nîrî na maûndû meengî mûno ma gûkwîra, nwatî ndirenda gûkwîra mo na maarûa.

¹⁴ Nîngwîvoka atî nîtûkwonana wa rîu na nîtûkwaranîria metho kwa metho.

¹⁵ Gîa na thayû. Arata aku onthe nîmagûkethia. Kethia arata etû onthe wa mûndû wa mûndû.