2Tim 3 - ÎVUKU RÎA ÛVORO MWARO

Mîthenya ya kûrigîrîria

¹ Nîrenda ûmenye atî mîthenya ya kûrigîrîria nî gûkaagîa na mavinda maûmû.

² Nîûndû andû nîmagaatuîka eyendi, akorokeru mbeca, egani, arumani, andû matangîathîkîra aciari ao, andû matarî ngatho na matarî ndini.

³ Andû matangîtugana, andû matarî ntha, andû a ngutû, andû matûmaga andû magîa na guoya na andû mathûraga maûndû marîa maro,

⁴ nîmagaatuîka acukanîrîri, arûgîrîri na etîi mûno. Nîmagaatuîka andû a kwenda maûndû marîa macûku vandû va kwenda maûndû marîa maro.

⁵ Ciîko ciao nîta cia andû mecî Ngai, nwatî nîmaatigire kûmwîtîkia. Îîthemage andû ta acio.

⁶ Nîûndû andû amwe gatagatîrî kao nîmatonyaga mîciî yene na makenyitîra aka arîa methagîrwa matarî na vinya na arîa maritûvîrîtwe nî mevia meengî na matongoragua nî merirîria macûku.

⁷ Aka aya nîmageragia kûthoma maûndû nwatî matingîmenya ûma.

⁸ Wata ûrîa Jane na Jambare maakararirie Musa, ûguo nwaguo andû acio maakararirie ûvoro wa ma. Andû acio methagîrwa na meciria macûku na nîagwîu ûvororî wa wîtîkio.

⁹ Nwatî matikaavota kûthiî na mbere mûno na maûndû mao nîûndû andû onthe nîmakoona ûrimû wao wata ûrîa moonire wa Jane na Jambare

Mataaro ma mûthiia

¹⁰ Nwatî we nîûrûmîrîrîte maûndû marîa nthomithagia, mîtugo yakwa, mworoto wakwa, wîtîkio wakwa, gûkirîrîria gwakwa, wendo wakwa, wetereri wakwa na kûmîrîria gwakwa.

¹¹ Wana nîûrûmîrîrîte kûnyarirwa gwakwa, na mathîna makwa. We nîwîcî ûrîa naanyaririrwe rîrîa naarî Antiokia, Ikonia, Lusitera, na ngîûmîrîria! Nwatî Mwathani nîwandethûrire kuuma mînyamaarorî îo yonthe.

¹² Mûndû wa wonthe wendaga gûtûûra arî mûrûmîrîri wa Jesû Kristû nwa nginya anyamarue.

¹³ Nwatî andû arîa aganu na arîa maveenanagia nîkwa makaathiîcaga na mbere gûcûka. Andû acio makaaveenanagia na makîveenagua.

¹⁴ Nwatî we, thiî na mbere kûrûmîrîra ûvoro wa ma ûrîa wathomithirue ûkîwîtîkia na ûgîûkindîria nîûndû nîwîcî arîa maakûthomithirie.

¹⁵ Na ûririkane atî kuuma ûrî mwana nîwecî mandîko marîa matheru marîa mangîtûma ûgîe na ûûgî wa gwîtîkia Jesû Kristû ûkînavonoka.

¹⁶ Namo mandîko marîa monthe matheru, Ngai nîke waveere arîa maamandîkire ciugo irîa makwandîka nîguo ituîke cia kûthomithania ûvoro wa ma, kûmenyithia andû mavîtia mao nîguo meke maûndû marîa maro na matûûre na mûtûûrîre mwaro,

¹⁷ nîguo mûndû wonthe ûtungatagîra Ngai ethagîrwa arî mwagîrîru na arî mwîvarîriu gwîka ûndû wa wonthe mwaro.