2Tim 2 - ÎVUKU RÎA ÛVORO MWARO

Mûthigari Mwîvokeku wa Jesû Kristû

¹ Kwoguo, we Timotheo mwana wakwa gîa na vinya nîûndû wa wega wa Ngai ûrîa twîthagîrwa tûrî naguo tûrî ndaarî ya Jesû Kristû.

² Maûndû marîa weguire ngîaria nîrî mbere ya aira eengî mathomithie andû arîa evokeku, nîguo nao mathomithie andû arîa engî.

³ Îtîkîra kûnyarirwa vamwe natue ta mûthigari mwaro wa Jesû Kristû.

⁴ Mûthigari arî mbaararî endaga gûkenia mûnene wake, kwoguo ndavutanagia na maûndû mengî tiga wa ûrîa avetwe.

⁵ Wana mûndû ûrîa ûthiîcaga mathakorî ma kûvinyûra ndangîvewa kîveo atathakîte akîrûmagîrîra mawatho.

⁶ Mûrîmi ûrîa ûrutaga wîra na kîîo nîke wagîrîrwe kûrîa maciaro ma mbere ma mûgûnda.

⁷ Ta îcirieni ûvoro ûcio nîrauga, nîûndû Mwathani nîakûmûvotithia gûtaûkîrwa nî maûndû mama monthe.

⁸ Taririkana Jesû Kristû ûrîa wariûkirue na aarî wa rûciaro rwa Daudi, wata ûrîa kûthomithanîtue ûvororî ûrîa mwaro mvunjagia.

⁹ Nîûndû wa kûvunjia ûvoro mwaro, nînyariragwa na ngekîrwa mvîngû ta mûgeri ngero. Nwatî ûvoro wa Ngai tî mwove na mvîngû.

¹⁰ Kwoguo nyûmagîrîria maûndû monthe nîûndû wa andû arîa athuure nî Ngai, nîguo atî wanao mavonokue nî Jesû Kristû na magîe na riiri wa tene na tene.

¹¹ Ûvoro ûyû nî wa ma atî: “Ethîrwa nîtwakwire vamwe nake, nîtûgatûûrania nake.

¹² Ethîrwa nîtûkûthiî na mbere kûmîrîria, nîtûkaathana nake. Ethîrwa nwa tûmûkaane, wanake nîagaatûkaana.

¹³ Ethîrwa tûtirî evokeku, ke atûûraga arî mwîvokeku, nîûndû ndangîveenia.”

Mûruti wîra mwîvokeku

¹⁴ Ririkania andû aku maûndû mama na ûmakaanie mbere ya Mwathani ûvoro wîgiî ngarari na gûteta îgûrû rîgiî ciugo irîa itarî na vata. Ciugo ta icio nîkwa ithûkagia andû arîa maithikagîrîria.

¹⁵ Geria mûno wa ûrîa ûngîvota gûtuîka mwîvokeku rîrîa ûkûruta wîra wa Ngai. Tuîka mûruti wîra ûrîa ûtaconokaga nî ûndû wa wîra ûrîa arutaga na mûndû ûthomithagia waro ûvoro wa ma wa Ngai.

¹⁶ Îîthemage mîario îtarî ya ûngai nîûndû nîtûmaga andû maracavanîrîrie na Ngai.

¹⁷ Mîaro ta îo îrendaga ta kîronda kîrîa gîtavoraga. Andû aîrî arîa maathomithagia maûndû ta mau nî Humenayo na Filetu.

¹⁸ Andû aya nîaumu ûvororî wa ma, nîûndû mavunjagia atî ûvoro wa kûriûka nîwavîtûkire, kwoguo magacûkia wîtîkio wa andû amwe.

¹⁹ Nwatî mûcingi ûrîa Ngai atumîte ndûngîenyenyeka; na îgûrû rîaguo kwandîkîtwe atîrî, “Mwathani nîwîcî andû ake na mûndû wa wonthe umbûraga Mwathani nwanginya atige gwîka maûndû ma waganu.”

²⁰ Nyombarî îrîa nene nîkwîthagîrwa kûrî na indo cia thaavu, na cia sîlûva, wana ciîngî cia mîtî na cia yûmba. Indo imwe cia icio îtûmagîrwa rîrîa kûrî na ûndû mûnene, nacio irîa ciîngî rîrîa gûtarî na ûndû mûnene.

²¹ Andû arîa metheragia kuuma kûrî maûndû monthe ma waganu, magaatûmagîrwa rîrîa kûrî na maûndû manene, nîûndû nîmeamûrîte magatuîka andû a vata kûrî mûmathi. Andû aya nîmevarîrîtie kûruta wîra wa wonthe mwaro.

²² Reganaga na maûndû marîa macûku meriragîrua nî andû ethî na wîrutanîrie kûgîa na ûthingu, wîtîkio, wendani na thayû, mûrî vamwe na andû arîa maumbûraga Mwathani marî na ngoro ntheru.

²³ Reganaga na ngarari cia ûrimû na gûtura ûmenyo, nîûndû we nîwîcî atî iretage înegene.

²⁴ Ta ndungata ya Mwathani ndwagîrîrwe nî kwîthîrwa ûrî wa înegene, nwatî wagîrîrwe nî kwîthîrwa ûrî mûndû wa ntha kûrî andû onthe, ûrî mwarimû mwaro na mûkirîrîria.

²⁵ Nîwagîrîrwe nîkwîthîrwa ûrî mûvoreri rîrîa ûgûtaara andû arîa magûkararagia, nîûndû Ngai avota kûmava kamweke ga kwîrira na makamenya ûvoro wa ma.

²⁶ Na njîra ta îno nwa mecokere na makaûrîra mûtego wa Ngoma ûrîa wamagwatire na agîtûma mekage ûrîa ke akwenda.