2Sam 8 - ÎVUKU RÎA ÛVORO MWARO

Daudi nîwavootanire

¹ Vuvarî, Daudi nîwatharîkîre Afilisiti rîngî, akîmavoota na matiacoka kwathana rîngî.

² Nîwacokire akîvoota Amoabu na akîmeera mamame nthî marîte mîvari. Na wa varî andû athatû acio moovetwe nîwaûragire andû aîrî ao kana andû athatû ao. Kwoguo Amoabu nîmaatuîkire ndungata cia Daudi na makîambîrîria kûmûrutîra gooti.

³ Daudi nîwacokire akîvoota Hadadezeri, mûvîcî wa Rehobu. Hadadezeri aarî mûthamaki wa Zoba kûrîa kwarî Sîria. Daudi aavootire mûthamaki ûcio rîrîa mûthamaki aathiîte gûkûûra vûrûri wake ûrîa warî vakuvî na rûnjî rwa Farati.

⁴ Daudi nîwamûcunire athigari ngiri îmwe na magana mûgwanja (1,700) arîa maathiîcaga matûîte mbarathi na athigari ngiri mîrongo îîrî (20,000) arîa maathiîcaga na magûrû. Nîwatigaririe mbarathi cia kwîgana cia gûkururia ikaari îgana rîmwe, agîcoka agîtemanga icio ciîngî mîkiva ya magûrû ma vuva igîtuîka cionje.

⁵ Rîrîa andû a Damesiki maatûmire athigari a mbaara mathiî magatethie mûthamaki Hadadezeri, Daudi nîwaitharîkîre na akîûraga arûme ngiri mîrongo îrî na igîrî (22,000).

⁶ Nîwacokire agîtuma ciîkaro cia athigari ake vûrûrirî wa Damesiki, na andû a Sîria nîmaatuîkire ndungata ciake na nîmaarutaga gooti kûrî Daudi. Ngai-Mûnene nîwatûmire Daudi avootane kûrîa kuonthe aathiîcaga.

⁷ Daudi nîwocire ngo cia thaavu irîa ciakuuîtwe nî ndungata cia Hadadezeri na akîivira Jerusalemu.

⁸ Nîwacokire agîoca gîcango nyîngî mûno kuuma matûûrarî ma Beta na Berothai marîa maathagwa nî Hadadezeri.

⁹ Rîrîa Toi mûthamaki wa Hamathi eegwire atî Daudi nîwavooteete athigari onthe a mbaara a Hadadezeri,

¹⁰ nîwatûmire mûvîcî, Joramu kûrî mûthamaki Daudi akamûkethie akîmûcokagîria ngatho nîûndû wa kûvoota Hadadezeri, ûrîa Toi aatûîre arûaga nake. Joramu nîwavirîre Daudi iveo ciarûthîtwe na thaavu, sîlûva na gîcango.

¹¹ Mûthamaki Daudi nîwamûrîre Ngai-Mûnene indo icio, wa vamwe na sîlûva na thaavu irîa aarutire mavûrûrirî marîa aavootete, nîguo itûmagîrwe vîndî îrîa Ngai-Mûnene akûgoocwa.

¹² Namo mavûrûri marîa aavootete nîmo; Edomu, Moabu, Aamoni, Filisiti na Amaleki. Nîwavecanire wana gîcunjî kîmwe Kîam indo irîa aatavîte kuuma kûrî Hadadezeri.

¹³ Daudi nîwathiîre na mbere kûgîa îgweta rîrîa aacokire mûciî arîkia kûûragîra Aedomu ngiri îkûmi na inya Kîandarî gîa Cumbî.

¹⁴ Ke nîwatumire ciîkaro cia athigari ake a mbaara vûrûrirî wonthe wa Edomu, nao andû a kuo magîtuîka ndungata cia Daudi. Nake Ngai-Mûnene nîwatûmire Daudi avootane kûrîa kuonthe aathiîcaga.

¹⁵ Daudi nîwathanire Isiraeli kuonthe na agatwithanagia maciira kûrî andû ake onthe na kîvooto.

¹⁶ Joabu, ûrîa ng'ina eetagwa Zeruia nîke warî mûnene wa athigari. Nake Jehoshafati mûvîcî wa Ahiludi nîke wamenyagîrîra mandîko.

¹⁷ Zadoku mûvîcî wa Ahitubu, marî na Ahimeleku mûvîcî wa Abiatharu nîo maarî athînjîri-Ngai; nake Seraia nîke warî mwandîki.

¹⁸ Benaia mûvîcî wa Jehoiada nîke warî mûnene wa athigari arîa maarangagîra Daudi, nao avîcî a Daudi nîo maarî athînjîri-Ngai.