2Sam 7 - ÎVUKU RÎA ÛVORO MWARO

Ndûmîrîri ya Nathani kûrî Daudi

¹ Mûthamaki Daudi nîwatûûrire nyombarî yake, na Ngai-Mûnene akîmûgitîra kuuma kûrî nthû ciake cionthe.

² Mûthamaki nîwerire mûrathi Nathani atîrî, “Ta roria wone atî rîu mbîkaraga nyombarî îtumîtwe na mîtarakwe, nwatî îthandûkû rîa kîrîkanîro Kîam Ngai rigîtwe îgemarî!”

³ Nake Nathani nîwacokerie mûthamaki atîrî, “Îka wa ûrîa wonthe ûreciria gwîka, nîûndû Ngai-Mûnene arî vamwe nawe.”

⁴ Nwatî ûtukû wa ûcio Ngai-Mûnene nîwerire Nathani atîrî,

⁵ “Thiî ûkeere ndungata yakwa Daudi atîrî, ‘We tîwe ûkaandumîra hekarû mbîkarage kuo.

⁶ Kuuma rîrîa naarutire andû a Isiraeli Misiri nginya ûmûnthî, ndirî natûûra hekarûrî; ndwîre nthiîcaga ngîkaraga îgemarî.

⁷ Kûrîa kuonthe nanathiî na andû a Isiraeli ndianaûria mûtongoria wanarî ûmwe wa arîa naathuurire matongorie andû akwa a Isiraeli kîrîa gîatûmire marega kûndumîra hekarû ya mîtarakwe.’

⁸ “Kwoguo îra ndungata yakwa Daudi, atî nie Ngai-Mûnene mwene vinya wonthe nîramwîra atîrî, ‘Nie naakûrutire kîthakarî kûrîa warîthagia ng'ondu nîguo ûtuîke mûtongoria wa andû akwa a Isiraeli.

⁹ Mbîthîrîtwe nîrî nawe kûrîa kuonthe wanathiî, na ngakûvootanîra kûrî nthû ciaku cionthe. Nîngûtûma ûgîe na îgweta wata atongoria a gûkû nthî arîa marî îgweta mûno.

¹⁰ Nî nthuurîrîte andû akwa a Isiraeli kûndû kwa gûtûûra na nîngaatûma matûûre kuo, nîguo na matigacoke kûvinyîrîrua rîngî ta ûrîa meekagwa mbererî nî andû arîa aganu.

¹¹ Kuuma rîrîa nathuurîre andû akwa a Isiraeli atongoria na magîtonya vûrûrirî ûyû, matûîre matharîkagîrwa nî nthû, nwatî ûndû ûyû ndûgeekîka rîngî. Nîrakwîrîra atî, nîngaakûgitagîra kuuma kûrî nthû ciaku cionthe na ngûve njiarwa.

¹² Rîrîa ûgaakua na ûthikwe, nîngaatua ûmwe wa anake aku mûthamaki na nîngaatûma ûthamaki wake ûgîe na vinya.

¹³ Ûcio nîke ûkaandumîra hekarû na nîngaatûma ûthamaki wake ûtûûre tene na tene.

¹⁴ Nîngaatuîka îthe, nake atuîke mûvîcîwa. Angîkaavîtia nîngaamûverithia wata ûrîa mwana averithagua nî îthe.

¹⁵ Nwatî ndikaamûthengutîria wendo wakwa ûtathiraga ûrîa nîmwendete naguo ta ûrîa naathengutîrie Saûlo nîguo we ûtuîke mûthamaki.

¹⁶ Nî ûkaagîa na njiarwa vîndî cionthe na ûthamaki waku ndûkaathira. Nakîo gîtî gîaku Kîam ûthamaki nî gîgaatûûra tene na tene.’ ”

¹⁷ Nathani nîwerire Daudi maûndû monthe marîa Ngai aamûguûrîrîtie.

Îvoya rîa Daudi rîa gûcokia ngatho

¹⁸ Mûthamaki Daudi nîwatoonyire îgemarî, agîkara nthî mbere ya Ngai-Mûnene na akîvoya akiugaga atîrî, “Ûûi Mwathani Ngai-Mûnene, nie na nyomba yakwa ndirî mwagîrîru wa gwîkîrwa maûndû mau monthe ûmbîkîte,

¹⁹ Nwatî wonete kau karî kaûndû kanini we Mwathani Ngai-Mûnene. Nîûthondekete ciîranîro îgûrû rîgiî njiarwa ciakwa mîaka mîîngî îgaaûka. Na nîwîtîkîrîte mone ûndû ûyû, we Mwathani Ngai-Mûnene!

²⁰ Nîngîkwîra rîngî atîa? We nîûmbicî nie ndungata yaku, we Mwathani Ngai-Mûnene!

²¹ Warî wendi na mûvango waku wa gwîka ûguo. Wîkîte maûndû mama monthe manene ûguo nîguo ûnthomithie,

²² Kaî wî mûnene we Ngai-Mûnene, Ngai-î! Gatagatîrî ka arîa onthe twaneegua gûtirî wîngî wîkariî tawe.

²³ Gûtirî andû engî gûkû nthî mekariî ta Aisiraeli, arîa wakûûrire kuuma ûkomborî na ûkîmatua andû aku. Maûndû manene na ma magegania marîa wekire nîûndû wao matûmîte ngumo yaku îtambe nthî yonthe. Nîwengatire ndûrîrî irîa ciîngî wa vamwe na ngai ciacio kuuma kûrîa kuonthe andû aku maavîtûkagîrîra, andû wa acio wakûûrîte kuuma Misiri na magatuîka andû aku.

²⁴ We nîûtuîte Aisiraeli andû aku we mwene tene na tene, nawe Ngai-Mûnene ûgatuîka Ngai wao.

²⁵ “Na rîu, Ngai-Mûnene, Ngai, tûûra ûmvingagîria kîîranîro kîrîa wathondekire kîmbîgiî na njiarwa ciakwa, na wîke wata ûrîa waugire nîûgwîka.

²⁶ Rîîtwa rîaku nî rîtûûra rînenevetue, na andû matûûre maugaga atî, ‘Ngai-Mûnene mwene vinya wonthe nîke Ngai wa Isiraeli.’ Nî ûkaamenyerera ûthamaki wakwa tene na tene.

²⁷ Ngai-Mûnene mwene vinya wonthe, Ngai wa Isiraeli! Ndingîtigîra ngîkûvoya îvoya rîîrî, nîûndû nîûnguûrîrîtie maûndû mama monthe nie ndungata yaku, na nîûmbîrîte atî nîûgaatûma njiarwa ciakwa ituîke athamaki.

²⁸ “Na rîu, Mwathani Ngai-Mûnene, we nîwe Ngai; We nîûvingagia irîkanîro ciaku vîndî cionthe, na nîûmbîrîrîte kîrîkanîro gîkî Kîamro ûguo.

²⁹ Rîu nîngûkûria ûrathime njiarwa ciakwa nîguo itûûre ikenagîra wega waku. We Mwathani Ngai-Mûnene, nîwe weranîre ûguo, na nîûtûûra ûrathimaga njiarwa ciakwa tene na tene.”