2Sam 6 - ÎVUKU RÎA ÛVORO MWARO

Îthandûkû rîa kîrîkanîro nîrîavirirwe Jerusalemu

¹ Daudi nîwacokanîrîrie athigari arîa maarî na vinya kûu Isiraeli rîngî. Nao onthe maarî athigari ngiri mîrongo îthatû.

² Nîwacokire akîthiî nao nginya Baala îrîa îrî Juda, nîguo makagîre îthandûkû rîa kîrîkanîro Kîam Ngai kuuma kuo. Îthandûkû rîu rîandîkîtwe rîîtwa rîa Ngai-Mûnene mwene vinya wonthe, ûrîa wîkaraga îgûrû rîa Akerubi.

³ Nîmaarutire îthandûkû rîa Kîrîkanîro rîa Ngai nyombarî ya Abinadabu îrîa yarî îgûrû rîa kîrîma makîrigîrîra îgûrû rîa gîkaari gîcerû. Nao anake a Abinadabu; Uza na Ahio nîo maathiîre na gîkaari kîu.

⁴ Ahio nîke watongoretie.

⁵ Daudi na Aisiraeli onthe nîmaainire makîrûgaga na vinya wao wonthe nîguo makumie Ngai-Mûnene. Vîndî îo nîmaavûraga ngita, mîtûrirû, ndarama na ithaani irîa iringithanagua.

⁶ Rîrîa maakinyire Nakoni Makori varîa ngano ciavûûragîrwa, ndegwa nîciavîngirwe. Nake Uza nîwanyitîrîre îthandûkû rîa Kîrîkanîro nîguo rîtikagwe.

⁷ Nake Ngai-Mûnene nîwarakarirue nî Uza na akîmûraga nîûndû wa gûturîra îthandûkû rîa kîrîkanîro gîtîîo. Uza aakwîrîre vau vakuvî na îthandûkû rîa kîrîkanîro Kîam Ngai.

⁸ Daudi nîwarakarire nîûndû Ngai-Mûnene nîwaverithirie Uza na marakara. Kwoguo vandû vau vetagwa Perezi-uza nginya ûmûnthî.

⁹ Nake Daudi nîwegwire guoya nîûndû wa Ngai-Mûnene na akiuga atîrî, “Rîu nîngîvota kûthiî na Îthandûkû rîa Ngai-Mûnene gwakwa atîa?”

¹⁰ Kwoguo Daudi ndeendaga kûvira îthandûkû rîa kîrîkanîro Jerusalemu îtûûrarî rîa Daudi; vandû va ûguo, ke nîwagarûrûkire na akîrîvira mûciî kwa Obedi-edomu, ûrîa watûûraga îtûûrarî rîa Gathu.

¹¹ Îthandûkû rîa Kîrîkanîro nîrîekarire mûciî kwa Obedi-edomu îtîîna rîa mîeri îthatû, na Ngai-Mûnene nîwarathimire Obedi-edomu vamwe na andû onthe a mûciî wake.

¹² Mûthamaki Daudi nîwegwire, atî Ngai-Mûnene nîarathimîte Obedi-edomu na kîrîa kîonthe arî nakîo vamwe na andû onthe a mûciî wake nîûndû wa îthandûkû rîa kîrîkanîro. Kwoguo nîwathiîre akîruta îthandûkû rîa kîrîkanîro mûciî kwa Obedi-edomu na akîrîvira îtûûrarî rîa Daudi na gîkeno kînene mûno.

¹³ Na rîrîa andû acio maakuîte îthandûkû rîa Kîrîkanîro maakinyûkirie makinyo matandatû, Daudi nîwamarûngamirie na akîrutîra Ngai-Mûnene îgongoona rîa ndegwa na njaû ino noru.

¹⁴ Nake Daudi nîwainîre Ngai-Mûnene na vinya wake wonthe ekîrîte Efodi.

¹⁵ Kwoguo Daudi na andû onthe a Isiraeli nîmaavirire îthandûkû rîa Kîrîkanîro kûu Jerusalemu makiugagîrîria nîûndû wa gûkena na makîvuvaga tûrumbeta.

¹⁶ Rîrîa îthandûkû rîa kîrîkanîro Kîam Ngai-Mûnene rîatonyagua îtûûrarî rîa Daudi, Mikali mwarî wa Saûlo nîwarorererie ndiricarî na akîona mûthamaki Daudi akinîra Ngai-Mûnene akîrûgarûgaga. Nake nîwanyararire Daudi.

¹⁷ Nîmaaretire Îthandûkû rîa Ngai-Mûnene na makîriigîrîra vandû va rîo îgemarî rîrîa Daudi aatumîte nîûndû wa rîo. Daudi nîwacokire akîrutîra Ngai-Mûnene magongoona ma kûvîvua na ma thayû.

¹⁸ Rîrîa Daudi aarîkirie kûruta magongoona mau, nîwarathimire andû na rîîtwa rîa Ngai-Mûnene mwene vinya wonthe,

¹⁹ na akîmagaîra irio onthe. Nîwamavere wa mûndûmûrûme na mûndûmûka wa wonthe wa Isiraeli mûgate, gîcunjî Kîam nyama îrî mvîvie na geki ya thavibu ino nyûmithie. Andû nîmaacokire wa mûndû akînûka gwake mûciî.

²⁰ Vuvarî rîrîa Daudi aathiîre kûrathima andû a mûciî wake, Mikali mwarî wa Saûlo nîwathiîre kûmûtûnga na akîra Daudi atîrî, “Kaî mûthamaki wa Isiraeli nîatûmîte atîwe ûmûnthî-î! Ke eguûririe nguo yake ya ûthamaki methorî ma ndungata ciake cia erîtu ta mûndû mûritu!”

²¹ Nake Daudi nîwerire Mikali atîrî, “Nîminaga ngîtîîa Ngai-Mûnene, ûrîa wanthuurire nîguo nduîke mûtongoria wa andû ake a Isiraeli vandûrî va aguo na andû a mûciî wake. Na nwa ngûthiî na mbere kwina ngîtîîa Ngai-Mûnene.

²² Nîngûthiî na mbere kwîyagithia gîtîîo makîria ya ûguo mbîkariî rîu. We wavota gwîciiria atî nîrî mûndû ûtarî kîene, nwatî erîtu acio makandîîaga mûno!”

²³ Mikali mwarî wa Saûlo ndaagîa na ciana nginya rîrîa aakwire.