2Sam 3 - ÎVUKU RÎA ÛVORO MWARO

¹ Mbaara nîyathiîre na mbere kavinda karaca gatagatîrî ka andû arîa maarî mwena wa Saûlo na arîa maarî mwena wa Daudi. Daudi na andû ake nîmaakîrîrîrie kûgîa vinya, nwatî Saûlo na andû ake magîkîrîrîria kûthira vinya.

Avîcî a Daudi

² Aya nîo avîcî atandatû a Daudi arîa maaciarîrwe Heburoni: Amunoni nîke warî îrikithathi, na ng'ina eetagwa Ahinoamu wa kuuma Jezireeli;

³ nake wa kaîrî eetagwa Kileabu na ng'ina aarî Abigaeli, mûndûmûka ûrîa watigirwe nî Nabali akua. Abigaeli aarî wa kuuma Karimeli; wa kathatû eetagwa Abusalomu, mûvîcî wa Maaka mwarî wa Talimai, ûrîa warî mûthamaki wa Geshuri;

⁴ wa kana eetagwa Adonija, mûvîcî wa Hagithi; wa gatano eetagwa Shefatia na ng'ina aarî Abitali;

⁵ nake wa gatandatû eetagwa Ithireamu, na ng'ina eetagwa Egila. Anake aya onthe maaciarîrwe Heburoni.

Abineri nîwanyitanîre na Daudi

⁶ Mbaara wa îkîthiîcaga na mbere gatagatîrî ka andû Daudi na andû a Saûlo, Abineri nîwakîrîrîrie kûgîa na vinya arî mûciî gwa Saûlo.

⁷ Saûlo nîwaigîte mûndûmûka wetagwa Rizipa, mwarî wa Aia. Mûthenya ûmwe Ishiboshethu mûvîcî wa Saûlo nîwaûririe Abineri atîrî, “Ûramamire na mûndûmûka ûrîa vava aigîte nîkî?”

⁸ Abineri nîwarakarire mûmo nîûndû wa ûguo aaûrirue nî Ishiboshethu na akîûria Ishiboshethu atîrî, “Ûreciria nwa njukanîrîre Saûlo? Kuuma wa Kîammbîrîrie ndûîre nîrî mwîvokeku kûrî andû wa aguo Saûlo, aa mûrwang'ina, na arata ake na ngakûvonokia kuuma kûrî Daudi; na atî ûmûnthî we nîwanthitanga atî nînjîvîtie na mûndûmûka!

^9-10 Ngai-Mûnene arombûraga ethîrwa tîmvingîria Daudi ûrîa Ngai-Mûnene aamwîrîîre na mwîvîtwa, atî nîakaaruta ûthamaki kuuma kûrî Saûlo na njiarwa ciake na atue Daudi mûthamaki wa Isiraeli na Juda, kuuma Dani îtûûra rîrîa rîrî mwena wa rûgûrû nginya Beerisheba îtûûra rîrîa rîrî mwena wa îveti.”

¹¹ Nake Ishiboshethu ndaavota gûcokeria Abineri ûndû wîngî nîûndû nîwamwîtigîre mûno.

¹² Abineri nîwatûmire anjaama kûrî Daudi kûu Heburoni makamwîre atîrî, “Nû ûkwathana vûrûri ûyû? Tûthondeke kîrîkanîro nawe, na nîngûgûtethereria kûnyita vûrûri wonthe wa Isiraeli ûtuîke waku.”

¹³ Daudi nîwacokirie atîrî, “Ûguo nî waro! Nîngûthondeka kîrîkanîro nawe ethîrwa nîûkûmbîka ûndû ûmwe. Naguo nî atî, nwanginya ûndetere Mikali mwarî wa Saûlo ûgîûka kûmona.”

¹⁴ Nake Daudi, nîwatûmire anjaama kûrî Ishiboshethu mûvîcî wa Saûlo makamwîre atîrî, “Nengera Mikali mûndûmûka wakwa, ûrîa watûmire ndwithie Afilisiti îgana rîmwe nîguo nîmûvikie.”

¹⁵ Kwoguo Ishiboshethu nîwatûmanîre Mikali akîgîîrwa kuuma kûrî mûthuuriwe Palitieli mûvîcî wa Laishi.

¹⁶ Nwatî mûthuuriwe Palitieli nîwarûmîrîre Mikali nginya îtûûra rîa Bahurimu. Nwatî rîrîa Abineri aamwîrire acoke mûciî, ke nîwacokire.

¹⁷ Abineri nîwaranîrie na atongoria a Isiraeli na akîmeera atîrî, “Gwa kavinda karaca mue nî mwîthîrîtwe mûkîenda Daudi atuîke mûthamaki wenyu.

¹⁸ Rîu mûrî na kamweke ka gwîka guo. Ririkanani atî Ngai-Mûnene aaugire atîrî, ‘Nîngaavûthîra ndungata yakwa Daudi kûvonokia andû akwa a Isiraeli kuuma kûrî Afilisiti, na kuuma kûrî nthû irîa ciîngî ciao.’ ”

¹⁹ Abineri nîwaririe na andû a mûvîrîga wa Benjamini na agîcoka akîthiî Heburoni kwîra Daudi ûrîa andû a Benjamini na Isiraeli maarîkanîrîte meke.

²⁰ Rîrîa Abineri aakinyire kwî Daudi kûu Heburoni arî na andû mîrongo îîrî, Daudi nîwamarugithîrie kîrugo.

²¹ Abineri nîwerire Daudi atîrî, “Nîngûthiî rîu ngakwarîrîrie we mwathi wakwa mûthamaki kûrî andû onthe a Isiraeli nîguo mathondeke kîrîkanîro nawe nîguo wathane vûrûri wonthe wata ûrîa wîriragîria.” Kwoguo Daudi nîwerire Abineri athiî atarî na guoya na Abineri akîthiî na thayû.

Abineri nîwaûragirwe

²² Vuvarî Joabu na ndungata irîa ciîngî cia Daudi nîmaacokire maumîte gûtava, na nîmaaûkire na indo nyîngî irîa maatavîte. Nwatî Abineri ndaarî vamwe na Daudi kûu Heburoni nîûndû Daudi nîwamûrekereretie na akathiî na thayû.

²³ Rîrîa Joabu na andû ake maakinyire, Joabu nîwerirwe atî Abineri nîwathiîte kwona mûthamaki Daudi, nake Daudi akîrekereria Abineri akîthiî na thayû.

²⁴ Kwoguo Joabu nîwathiîre kûrî Daudi na akîmûria atîrî, “Nîkwa wîkire atîa? Abineri aûka kûrî we ûmûrekereerie athiî wa ûguo nîkî?

²⁵ We nîwicî atî Abineri aûkire gûkûveenia na gûtuîria ûrîa wonthe wîkaga na kûrîa kuonthe ûthiîcaga!”

²⁶ Joabu arîkia gûtigana na Daudi, nîwatûmire anjaama mathiî makinyîre Abineri, nao nîmaamûkinyîre na makîmûcokithîria kîthimarî gîa Sira; nwatî Daudi ndaamenya ûguo.

²⁷ Rîrîa Abineri aakinyire Heburoni, Joabu nîwamûvirire vandû keverirî vakuvî na kîvingo takwa kwarî na kaûndû eendaga kûmwîra. Nao marî wa vau Joabu nîwamundire Abineri îvu na Abineri akînakua. Joabu aaûragire Abineri nîûndû Abineri nîke waûragîte mûrwang'ina na Joabu ûrîa wetagwa Asaheli.

²⁸ Rîrîa Daudi aamenyire ûvoro ûcio, ke nîwaugire atîrî, “Ngai-Mûnene nîwicî, atî nie mwene na andû akwa tûtirî na wîvia wanarî mûnini wîgiî kûûragwa kwa Abineri mûvîcî wa Neri.

²⁹ Ûru ûcio ûrocokerera Joabu na andû onthe a mûciî wake! Mûciî wake ûrogîa na mûndû ûrwarîte mûrimû wa gîcûnûnû kana mûndû ûrwarîte mûrimû mûcûku mûno wa ngothi, kana mûndû ûkûruta mawîra ma gûtuma vurana ta aka, kana mûndû ûragîrîtwe mbaararî, kana mûndû ûtarî na kîndû gîa kûrîa.”

³⁰ Kwoguo Joabu na mûrwang'ina Abishai maaûragire Abineri nîguo merîvîrîrie kûûragwa kwa mûrwang'ina Asaheli ûrîa Abineri aaûragîre mbaararî îrîa yarî Gibeoni.

Abineri nîwathikirwe

³¹ Nake Daudi nîwerire Joabu na andû ake matembûrange nguo ciao, mekîre nguo cia macakaya na marîrîre Abineri. Nao makîthiî kûmûthika, mûthamaki Daudi nîwaumire îthandûkû rîrîa rîekîrîtwe mwîrî wa Abineri vuva.

³² Abineri nîwathikirwe kûu Heburoni, nake mûthamaki na andû onthe nîmaarîrire maugîrîrîtie marî vau mbîrîrarî.

³³ Daudi nîwacakaîre Abineri na akîmwinîra rwîmbo rûrû: “Nîndûî gîatûmire Abineri akue ta kîrimû?

³⁴ Njara ciake itiarî njove magûrû make matiarî movanie, na aakwire ta mûndû aûragîtwe nî eki naaî.” Nao andû onthe nîmaacokire makîmûrîrîra rîngî.

³⁵ Mûthenya wonthe andû nîmaaringîrîrie Daudi arîe irio, nwatî Daudi nîwevîtire na akiuga atîrî, “Ngai arombûraga ethîrwa nîngûrîa kîndû mbere ya gûtuke!”

³⁶ Nao andû onthe nîmaamenyire ûguo na magîkena. Ûrîa wonthe mûthamaki eekire nîwakenirie andû.

³⁷ Kwoguo andû onthe a Daudi na andû onthe a Isiraeli nîmaamenyire, atî mûthamaki ndaanyitanîra na kûûragwa kwa Abineri.

³⁸ Mûthamaki nîwerire ndungata ciake atîrî, “Nîkwa mûtaicî, atî ûmûnthî mûtongoria mûnene nîakuîte kûu Isiraeli?

³⁹ Wana ethîrwa nînie mûthamaki ûrîa Ngai athuurîte, nînîregua nîrî mûthirîre nî vinya ûmûnthî. Avîcî aya a Zeruia marî na ûûru mwîngî mûno nîûndû wakwa. Ngai-Mûnene aroverithia eki naaî aya wata ûrîa magîrîrwe nî kûverithua!”