2Sam 24 - ÎVUKU RÎA ÛVORO MWARO

Daudi nîwatarire andû

¹ Ngai-Mûnene nîwarakarirue nî Aisiraeli rîngî, na nîwerire Daudi athiî kûrî o nîguo marakare na akîmwîra atîrî, “Thiî na ûtare andû a Isiraeli na a Juda.”

² Kwoguo mûthamaki Daudi nîwerire Joabu ûrîa warî mûnene wa athigari ake a mbaara atîrî, “Thiîni mîvîrîgarî yonthe ya Isiraeli kuuma mûthiia ûmwe nginya ûrîa wîngî mûrî na anene aku a athigari a mbaara mûgîtaraga andû. Nîngwenda kûmenya ûrîa megana.”

³ Nwatî Joabu nîwerire mûthamaki atîrî, “Mwathi wakwa, Ngai-Mûnene, Ngai waku arongerera andû a Isiraeli maita îgana makîria ya ûguo megana rîu, nawe ûrotûûratûûra nîguo ûkoona Ngai-Mûnene akîvingia ûndû ûcio. Nwatî mwathi wakwa mûthamaki ûrenda gûtara andû nîkî?”

⁴ Nwatî mûthamaki nîwaringîrîrie Joabu na anene acio a athigari ake a mbaara na akîmatha mathîkîre watho ûcio wake. Kwoguo Joabu na anene acio nîmaaumire varî mûthamaki na makîthiî gûtara andû a Isiraeli.

⁵ Nîmaaringire Rûnjî rwa Jorodani na makîamba magema mao mwena wa îveti wa Aroeri, îtûûra rîrîa rîarî gatagatî ga Kîamnda kîrîa Kîamrî vûrûrirî wa Gadi. Mauma kûu, nîmaathiîre mwena wa rûgûrû na magîkinya Jazeri.

⁶ Nîmaacokire makîthiî Gileadi na Kadeshi vûrûrirî wa Ahiti. Nîmaacokire makiuma kûu na makîthiî Dani, na mauma Dani nîmaathiîre Sidoni mwena wa îthûîro.

⁷ Nîmaacokire makîthiî îtûûra rîrîa rîarî ririgîre rîa Turo na makîthiî matûûrarî monthe ma Ahivi na Aakanaani, na mûthiiarî nîmaathiîre mwena wa îveti wa Juda.

⁸ Vuva wa mîeri kenda na mîthenya mîrongo îîrî, nîmaacokire Jerusalemu. Vîndî îo maarî arîkiu kûthiî vûrûrirî wonthe.

⁹ Joabu nîwacokire akîva mûthamaki ûvoro wîgiî ûrîa andû onthe meegana. Andû arîa mangîavotire kûthiî mbaararî kuuma kûu Isiraeli maarî andû ngiri magana manana (800,000) nakuo Juda kwarî na andû ngiri magana matano (500,000).

¹⁰ Daudi arîkia gûtara andû, nîwambîrîrie kûthînua nî thamiri yake, na nîwerire Ngai-Mûnene atîrî, “Nînjîvîtie mûno nîûndû wa ûguo mbîkîte! Nakûthaitha ûnjovere, nîûndû mbîkîte ûguo na ûrimû.”

¹¹ Ngai-Mûnene nîwerire Gadi, ûrîa warî mûrathi wa Daudi atîrî,

¹² “Thiî na wîre Daudi atî nînîmûva maûndû mathatû, nîguo athuure ûndû ûmwe ûrîa ngûmwîkîra gatagatîrî ka mo. Kîraûko kîu kîngî Daudi aarîkia kûramûka.”

¹³ Gadi nîwathiîre kûrî ke, akîmwîra ûrîa Ngai-Mûnene aaugîte na akîmûria atîrî, “Ûrenda ûndû ûrîkû? Kûgîe yûra îvinda rîa mîaka îthatû vûrûrirî waku, ûûre nî nthû ciaku ikûvinyûrîtie mîeri îthatû kana kûgîe na mûthiro mîthenya îthatû vûrûrirî wonthe. Rîu îîcirie na ûmbîre ûrîa ngûthiî kwîra Ngai-Mûnene.”

¹⁴ Daudi nîwerire Gadi atîrî, “Nînîrathînîka mûno! Nwatî ndikwenda kûverithua nî andû. Nî kava tûverithue nî Ngai-Mûnene ke mwene nîûndû arî ntha nyîngî.”

¹⁵ Kwoguo Ngai-Mûnene nîwatûmire kûgîe na mûthiro kûu Isiraeli kuuma kîraûko kîu nginya îvinda rîrîa aatuîte. Vûrûri ûcio wonthe kuuma Dani nginya Beeri-shiba Aisiraeli ngiri mîrongo mûgwanja nîmaakwire.

¹⁶ Rîrîa mûraika wa Ngai-Mûnene aarî vakuvî gûcûkangia Jerusalemu Ngai-Mûnene nîwericûkirwe ûvororî wîgiî kûverithia andû ake na akîra mûraika ûcio waûraganaga atîrî, “Tiga rîu! Ûguo nî mwîganu!” Mûraika ûcio aarî vakuvî na varîa Arauna, ûrîa warî Mûjebusi aavûûragîra ngano.

¹⁷ Daudi oona mûraika ûrîa waûragaga andû, nîwerire Ngai-Mûnene atîrî, “Nînie njîvîtie. Nînie mbîkîte naaî. Gûtirî ûndû andû aya mekîte. Nînie mbagîrîrwe nî kûverithua vamwe na andû a mûciî wakwa.”

¹⁸ Mûthenya wa ûcio, Gadi nîwathiîre kûrî Daudi na akîmwîra atîrî, “Thiî varîa Arauna avûûragîra ngano na ûtumîre Ngai-Mûnene metha ya kîgongoona vo.”

¹⁹ Nake Daudi nîwekire ûrîa aathîtwe nî Ngai-Mûnene na akîthiî wata ûrîa eerîtwe nî Gadi.

²⁰ Arauna nîwaroririe na akîona mûthamaki na ndungata ciake mathiîte kûrî ke. Nîwegwîthirie nthî mbere ya Mûthamaki Daudi

²¹ na akîmûria atîrî, “Mwathi wakwa waûka kûrî nie ndungata yaku nîkî?” Daudi nîwamûcokerie atîrî, “Naûka kûgûra varîa ûvûragîra ngano njoke ndumîre Ngai-Mûnene metha ya kîgongoona vo. Vuva wa ûguo Ngai-Mûnene nîakûthiria mûthiro ûyû.”

²² Nake Arauna nîwerire Daudi atîrî, “Oca we mwathi wakwa, na ûrutîre Ngai-Mûnene kîrîa ûkwona Kîamgîrîrîte. Ndegwa cia kûruta îgongoona rîa kûvîvua nîcio ino; namo macoki ma cio na mîvûûro ya ngano ûtûmîre irî ngû.”

²³ Arauna nîwavere mûthamaki indo icio cionthe na agîcoka akîmwîra atîrî, “Ngai-Mûnene, Ngai waku aroetîkîra îgongoona rîaku.”

²⁴ Nwatî mûthamaki nîwacokerie Arauna atîrî, “Naarî, nîkwa ngûkûrîva. Ndingîrutîra Ngai-Mûnene, Ngai wakwa magongoona gûtarî kîndû ndutîte nîûndû wamo.” Kwoguo Daudi nîwagûrire vandû vau vaavûragîrwa ngano vamwe na ndegwa icio na tûcunjî mîrongo îtano twa sîlûva.

²⁵ Daudi nîwacokire agîtumîra Ngai-Mûnene metha ya kîgongoona vau, na akîrutîra magongoona ma kûvîvua na ma thayû vo. Kwoguo Ngai-Mûnene nîwegwire mavoya make na agîtûma mûthiro ûcio ûthire kûu Isiraeli.