2Sam 23 - ÎVUKU RÎA ÛVORO MWARO

Ciugo cia mûthiia cia Daudi

¹ Daudi mûvîcî wa Jesse, aarî mûndû watûgîrîtue mûno nî Ngai, na nîke Ngai wa Jakovu aathuurire nîguo atuîke mûthamaki. Daudi nîke watungîre Aisiraeli nyîmbo mbaro mûno cia thaburi. Ino nîcio ciugo cia mûthiia cia Daudi:

² Roho wa Ngai-Mûnene nî araria na njîra yakwa; ndûmîrîri yake îrî kanyuarî gakwa.

³ Ngai wa Isiraeli nîwaririe; Ke ûrîa Mûgitîri wa Isiraeli ambîrire atîrî, “Mûthamaki ûrîa wathanaga na kîvooto, ûrîa wathanaga etigîrîte Ngai,

⁴ ethagîrwa ekariî ta riûa rîkîara kîraûko tene rîrîa gûtarî na matu, riûa rîrîa rîtûmaga nyaki îmere mbura yaura.”

⁵ Ûguo nîguo Ngai akaarathima njiarwa ciakwa, nîûndû nîwathondekire kîrîkanîro Kîam gûtûûra tene na tene nanie, kîrîkanîro kîu nî kîrûmu na gîtingîcenjekia. Ûndû ûcio nîguo nîîriragîria; nîûndû nîguo ûgaatuîka ûvootani wakwa, Ngai nîagaatûma ûndû ûcio ûvinge.

⁶ Nwatî andû arîa matetigîrîte Ngai methagîrwa mekariî ta mîgua îrîa îtecagwa, nîûndû gûtirî mûndû ûngîmînyita na njara ntheri.

⁷ Mûndû akîmînyita nwanginya avûthîre kîndû kîthondeketwe na cuuma kana mûtî wa îtumû, nacio nwanginya ivîvue viû na mwaki.

Athigari a Daudi arîa maarî îgweta

⁸ Mama nîmo marîîtwa ma athigari a Daudi arîa maarî îgweta: Wa mbere aarî Joshebu-bashebethu wa kuuma Takemoni. Joshebu-bashebethu nîke warî mûnene wa anene arîa engî a athigari a mbaara arîa meecîkene ta “Njamba ithatû”, Joshebu-bashebethu nîwarûire na andû magana manana na akîmaûraga onthe na îtumû rîake.

⁹ Mûndû wa kaîrî gatagatîrî ka andû arîa maarî îgweta aarî Eleazaru mûvîcî wa Dodo. Eleazaru aarî wa mbarî ya Ahohi. Vîndî îmwe Eleazaru marî na Daudi nîmaaruire na Afilisiti arîa maaûnganîte nîguo marue na Aisiraeli. Aisiraeli nîmeetigîre na makîûra,

¹⁰ nwatî Eleazaru nîwarûire na Afilisiti nginya njara yake îkînoga na îkîûmagara ûndû îtangîavotire kûrekia rûviû rûrîa aanyitîte. Ngai-Mûnene nîwatûmire ûvootani mûnene wonekane mûthenya ûcio. Mbaara yathira Aisiraeli nîmaacokire varîa Eleazaru aarî na magîoca indo irîa ciatigîtwe nî andû arîa maaûragîtwe.

¹¹ Nake wa kathatû aarî Shama mûvîcî wa Agee wa kuuma Harari. Afilisiti nîmaaûnganîte kûu Lehi, kûrîa kwarî na mûgûnda warî na njûgû. Nao Aisiraeli nîmaaûrire nî Afilisiti.

¹² Nwatî Shama nîwarûngamire mûgûndarî ûcio, akîûgitîra, na akîûraga Afilisiti. Ngai-Mûnene nîwatûmire ûvootani mûnene wonekane mûthenya ûcio.

¹³ Rîrîa maketha maarî vakuvî kwambîrîria, anene athatû gatagatîrî ka athigari a mbaara arîa meecîkene ta “Njamba Mîrongo îthatû” nîmaathiîre na magîkinya ngurungarî ya Adulamu kûrîa Daudi aarî. Vîndî îo athigari a Afilisiti maambîte magema mao Kîandarî Kîam Refaimu.

¹⁴ Vîndî îo, Daudi aarî vandû kîrîmarî Kîamrî kîgitîre mûno, nakîo gîkundi kîmwe Kîam athigari a mbaara a Afilisiti Kîamrî Bethilehemu.

¹⁵ Daudi nîwacokire akîgua anyonda mûno na akiuga atîrî, “Narî kethîra nwa mone mûndû ûngîmindîra manjî ma kûnyua kuuma kîthimarî kîrîa kîrî vakuvî na kîvingo Kîam Bethilehemu!”

¹⁶ Andû acio athatû maarî îgweta nîmaavîtûkanîrie kûrîa Afilisiti maatûûraga, magîtava manjî kuuma kîthimarî, na makîvirîra Daudi. Nwatî Daudi ndaanyua manjî mau. Vandû va ûguo, aameetûrûrire nthî rîrî îtega kûrî Ngai-Mûnene

¹⁷ na akiuga atîrî, “Ngai-Mûnene, nie ndingînyua manjî mama nîûndû ngamanyua nî takwa nîngîthîrwa ngînyua nthakame ya andû aya mateetigîra gûkua makîmatava!” Kwoguo nîwaregire kûmanyua. Mau nîmo maûndû ma ûcamba marîa athigari acio athatû maarî îgweta meekire.

¹⁸ Abishai mûrwang'ina na Joabu (arîa ng'ina eetagwa Zeruia) nîke warî mûtongoria wa athigari acio meecîkene ta njamba mîrongo îthatû. Nîwarûire na andû magana mathatû arî na îtumû rîake na akîmaûraga. Nîûndû wa ûguo, nîwacokire akîgîa îgweta înene gatagatîrî ka “Njamba icio mîrongo îthatû.”

¹⁹ Abishai nîke warî îgweta mûno gatagatîrî ka njamba icio mîrongo îthatû. Kwoguo nîwatuîkire mûtongoria wao, nwatî ndaarî na îgweta înene ta njamba irîa ithatû.

²⁰ Benaia mûvîcî wa Jehoiada wa kuuma Kabuzeeli, aarî mûthigari wîngî warî îgweta. Nîwekire ciîko nyîngî cia ûcamba. Imwe ciacio nî ta ino: nîwaûragire athigari aîrî maarî îgweta a Moabu. Vîndî îmwe kwarî na mbaravu, nîwathiîre na agîtonya îrimarî na akîûragîra mûnyambû kuo.

²¹ Benaia nîwacokire akîtharîkîra Mûmisiri na mûragi, akûmûcuna îtumû rîu aanyitîte na akîmûraga narîo.

²² Icio nîcio ciîko cia ûcamba irîa Benaia, ûrîa warî ûmwe wa njamba irîa mîrongo îthatû eekire.

²³ Nîke warî na îgweta mûno gatagatîrî ka njamba icio mîrongo îthatû, nwatî njamba irîa ithatû cia mbere ciarî na îgweta kûmûkîra. Nake Daudi nîwamûtuire mûnene wa athigari arîa maamûrangagîra.

²⁴ Athigari arîa maarî a gîkundi kîu Kîam njamba mîrongo îthatû maarî: Asaheli, mûrwang'ina na Joabu, Elihanani mûvîcî wa Dodo wa kuuma Bethilehemu,

²⁵ Shama na Elika arîa maaumîte Harodi

²⁶ Helezi wa kuuma Peleti, Ira mûvîcî wa Ikeshi wa kuuma Tekoa,

²⁷ Abiezeri wa kuuma Anathothi, Mebunai wa kuuma Husha,

²⁸ Zalimoni wa kuuma Aho, Maharai wa kuuma Netofa,

²⁹ Helebu mûvîcî wa Baana wa kuuma Netofa, Itai Mûvîcî wa Ribai wa kuuma Gibea Kûrîa kwarî vûrûrirî wa Benjamini.

³⁰ Benaia wa kuuma Pirathoni, Hidai wa kuuma tûrûnjîrî twa Gaashu,

³¹ Abialiboni wa kuuma Araba, Azimavethi wa kuuma Bahurimu,

³² Eliaba wa kuuma Sha-aliboni, Avîcî a Jasheni, Jonathani

³³ Shama wa kuuma Harari, Ahiamu mûvîcî wa Sharari wa kuuma Harari,

³⁴ Elifeleti mûvîcî wa Ahasibai wa kuuma Maaka, Eliamu mûvîcî wa Ahithofeli wa kuuma Gilo,

³⁵ Hezironi wa kuuma Karimeli, Paarai wa kuuma Arabia

³⁶ Igali mûvîcî wa Nathani wa kuuma Zoba, Bani wa kuuma Gadi,

³⁷ Zeleki wa kuuma Amoni, Naharai wa kuuma Be-erothi, ûrîa wakuuagîra Joabu mûvîcî wa Zeruia indo cia mbaara,

³⁸ Ira na Garebu a kuuma Ithiri na

³⁹ Uria ûrîa Mûhiti: Athigari onthe arîa maarî îgweta maarî mîrongo îthatû na mûgwanja.