2Sam 22 - ÎVUKU RÎA ÛVORO MWARO

Rwîmbo rwa Daudi rwa ûvootani

¹ Rîrîa Ngai-Mûnene aavonokirie Daudi kuuma kûrî Saûlo na nthû irîa ciîngî ciake cionthe Daudi nîwainîre Ngai-Mûnene rwîmbo rûrû:

² Ngai-Mûnene nîke mûngitîri, nîke vandû vakwa varîa vagitîre mûno, na nîke ûmvonokagia.

³ Ngai wakwa nîke ûgitîri wakwa, nîthithaga kûrî ke. Nîke ngo yakwa îrîa îngitagîra, na akambîkaria na thayû. Nîke mûvonokia wakwa; angitagîra na akamvonokia kuuma kûrî maûndû marîa macûku.

⁴ Ngaagîra Ngai-Mûnene, ûrîa wagîrîrwe nî kûgoocwa! Nîamvonokagia kuuma kûrî nthû ciakwa.

⁵ Naarigicîrîtue nî ngûngi cia gîkuû mîena yonthe, ngûngi cia wanangi nîciambîthîrîrie.

⁶ Nanyitîtwe na mînyororo ya kwa arîa akuû, nayo mîtego ya gîkuû îgategagwa nîguo înyiite.

⁷ Nakaîre Ngai-Mûnene nîrî mînyamaarorî, nînakaîre Ngai wakwa nîguo andethie. Nîwegwire mûgambo wakwa arî hekarûrî yake, nîwegwire makaya makwa.

⁸ Nthî nîyacokire îkîthingitha, itina cia matuurî nîciainainire na ikîthingitha, nîûndû Ngai aarî mûrakaru!

⁹ Ndogo yaunûkagia îkiumaga maniûrûrî make, naguo mwaki wa gûcûkangia na makara ciaumaga kanyuarî gake.

¹⁰ Nîwatuîkanîrie matuurî na akînyûrûrûka nthî, nayo nduma ndumanu yarî rungu rwa magûrû make.

¹¹ Aathiîte akuuîtwe nî kerubi îgûrûkîte, aakuuîtwe nî mathagu ma rûkûngi.

¹² Eekunîkîrîte na nduma, matu mathimbu mecûrîte manjî mamûthiûrûrûkîrîtie.

¹³ Mveni nîciaumaga makararî marîa maakanaga, nî ûkengu ûrîa aarî naguo.

¹⁴ Ngai-Mûnene nîwarurumithirie marurumî îgûrû, naguo mûgambo wa Ngai mwene vinya wonthe ûkîguwa.

¹⁵ Nîwaikirie nthû ciake mîguî na akîmanyagania, nîwamaretithîrie mveni nao makîûra.

¹⁶ Vîndî îo kûndû kûrîa kûrikîru mûno kwa îria nîkwonekire, mîcingi ya nthî ikîguûrua rîrîa Ngai-Mûnene aarumire nthû ciake, na agîikaania arî na marakara.

¹⁷ Ngai-Mûnene nîwakûnjûrire njara yake arî îgûrû na nîwanyitire, nîwangucirie na akînduta kuuma manjîrî mau marikîru.

¹⁸ Nîwamvonokirie kuuma kûrî nthû ciakwa irîa ciarî na vinya, na kuuma kûrîa arîa onthe mamenete, nîûndû maarî na vinya kûrî nie.

¹⁹ Nîmaantharîkîre rîrîa naarî mathînarî, nwatî Ngai-Mûnene nîwangitîre.

²⁰ Nîwandethirie na ngiuma ûgwatirî. Amvonokirie nîûndû nîwakenetue nînie.

²¹ Ngai-Mûnene andathimaga nîûndû mbîkaga maûndû marîa magîrîrîte, andathimaga nîûndû ndirî na ûcuke.

²² Nîmbathîkîrîte mawatho ma Ngai-Mûnene, na ndirî nagarûrûka ngatiganîria Ngai wakwa.

²³ Nîmbathîkîrîte mawatho make, na ndirî natiganîria kîrîra gîake.

²⁴ Nîmbîthîrîtwe ndarî na ûcuke mbere yake, na ngerigîrîria gwîka maûndû macûku.

²⁵ Kwoguo Ngai-Mûnene nîwandathimire nîûndû mbîkaga maûndû marîa magîrîrîte, na nîwonaga atî nîrî mûtheru.

²⁶ Ngai-Mûnene we ûrî mwîvokeku kûrî arîa makwîvokete, na nîwîkaga maûndû maro kûrî andû arîa matarî na ûcuke.

²⁷ We ûrî mûtheru mbere ya arîa metheretie, nwatî ûrî mwaganu mbere ya arîa matarî evokeku.

²⁸ Nîûvonokagia arîa menyivagia, nwatî nîwagithagia kîene arîa metîîaga.

²⁹ We Ngai-Mûnene nîwe ûtheri wakwa, nîwe wîngataga nduma kuuma kûrî nie.

³⁰ We nîwe ûmvecaga vinya wa kûtharîkîra nthû ciakwa, na nwawe ûmvotithagia kûrûûga nthingo ciao cia kwîgitîra.

³¹ Ciîko cia Ngai ûyû nî nginyanîru, nacio ciîranîro ciake nî cia kwîvokeka! Nîke ngo ya arîa onthe macaragia ûtethio wake.

³² Ngai-Mûnene tu nîke Ngai; Ngai wetû tu nîke ûtûgitagîra.

³³ Ngai ûyû nîke ûgitîri wakwa ûrîa ûrî vinya, nîke ûngitagîra njîrarî ciakwa.

³⁴ Nîatûmaga mvinyûre ta nthwariga, nîangitagîra nîrî îgûrû rîa kîrîma.

³⁵ Nîke ûnthomithagia maûndû ma mbaara, nîguo mvote gûtûmîra ûta ûrîa ûrî vinya mûno.

³⁶ Ngai-Mûnene nîwe ûngitagîra na ûkamvonokia, ûtethio waku nîguo ûtûmîte neneve.

³⁷ We nîwe ûngitîrîte nîguo ndikanyitwe na ndianagwa.

³⁸ Naavinyûririe nthû ciakwa nginya ngîivoota, ndianacoka na vuva nginya rîrîa naicûkangirie viû.

³⁹ Nairingire ikîgwa nthî na itiacoka gûkîra, ciamaamire nthî mbere yakwa irî mvooteku.

⁴⁰ We nîwe ûmvecaga vinya wa kûrûa mbaara, na ûkamvotithia kûvoota nthû ciakwa.

⁴¹ Nîwe watûmire nthû ciakwa ciûre nînie, na ngîcûkangia arîa onthe maamenete.

⁴² Nîmaarîrîre ûtethio, nwatî gûtirî wanarî mûndû wamavonokirie. Nîmeetire Ngai-Mûnene, nwatî ndaamathikîrîria.

⁴³ Naamarivire nginya magîtuîka ta rûkûngû, na ngîmakinyanga ta ndaka îrîa îthagîrwa îrî njîrarî.

⁴⁴ Nîwe wamvonokirie kuuma kûrî andû arîa maangararagia, ûkîndua mûnene wa ndûrîrî. Andû arîa ndaaicî nîmaatuîkire ndungata ciakwa.

⁴⁵ Andû a ndûrîrî nîmanyînamagîrîra, na rîrîa megua mûgambo wakwa nîmambathîkagîra.

⁴⁶ Andû acio a ndûrîrî nîmaaûrirwe nî vinya na magîûka makinainaga maumîte matûûrarî mao marîa mairigîre.

⁴⁷ Ngai-Mûnene atûûraga mwoyo! Ke ûrîa ûngitagîra arokumua! Ngai wakwa arokumua! Ke nîke mûngitîri na ûvonokio wakwa!

⁴⁸ Ke nîke Ngai ûrîa wamvotithirie kûvoota nthû ciakwa, na akîmvotithia kwatha ndûrîrî.

⁴⁹ Nîke Ngai ûrîa ûmvonokagia kuuma kûrî nthû ciakwa. Ngai-Mûnene, we nîûtûmaga mvoote nthû ciakwa, na ûkangitîra kuuma kûrî andû arîa aganu.

⁵⁰ Kwoguo nîngûgûkumia nîrî gatagatî ka ndûrîrî, minaga nyîmbo ngîkumia rîîtwa rîaku.

⁵¹ Ngai-Mûnene nîatûmaga mûthamaki wake agîe na ûvootani mûnene. Nîwonanagia wendo wake ûtathiraga kûrî mûndû ûrîa ke athuurîte, kûrî Daudi na njiarwa ciake tene na tene.