2Sam 21 - ÎVUKU RÎA ÛVORO MWARO

Njiarwa cia Saûlo nîciaûragirwe

¹ Vîndî îrîa Daudi aathanaga, nîkwagîre na yûra înene îvinda rîa mîaka îthatû. Kwoguo Daudi nîwavoire Ngai-Mûnene, nake Ngai-Mûnene akîmwîra atîrî, “Saûlo na andû a mûciî wake nîo matûmîte kûgîe na yûra nîûndû wa aûragani; nîmaûragithîtie andû a Gibeoni.”

² (Andû acio a Gibeoni matiarî Aisiraeli; maarî gakundi kanini ka andû a Amori. Aisiraeli nîmaamerîrîte atî nîmakûmagitîra, nwatî Saûlo nîwageretie kûmaûraga nîûndû nî kîîo kîrîa aarî nakîo kûrî andû a Isiraeli na a Juda.)

³ Kwoguo Daudi nîwetire andû acio a Gibeoni na akîmaûria atîrî, “Mûrenda nîmwîkîre atîa? Nîrenda kûmûrîvîrîria nîûndû wa maûndû macûku marîa mwekirwe nî Saûlo nîguo mûrathime andû a Ngai-Mûnene.”

⁴ Nao nîmaacokirie atîrî, “Thîna wetû na Saûlo na andû a mûciî wake ndûngîthirua nî sîlûva kana thaavu, na tûtingîenda kûûraga Mûisiraeli wanarî ûmwe.” Daudi nîwacokire akîmaûria rîngî atîrî, “Rîu mûreciria mbagîrîrwe nî kûmwîkîra atîa?”

⁵ Nao nîmaacokerie mûthamaki atîrî, “Saûlo eendaga gûtûthiria tuonthe nîguo gûtikethîrwe kûrî na mûndû wanarî ûmwe wetû ûngîatigarire vûrûrirî wonthe wa Isiraeli.

⁶ Kwoguo tûnengere arîû mûgwanja ake nîguo tûmacurie mbere ya Ngai-Mûnene kûu Gibea, îtûûra rîa Saûlo. Saûlo nîke mûthamaki ûrîa wathuurîtwe nî Ngai-Mûnene.” Mûthamaki nîwamacokerie atîrî, “Nîngûmûnengera o.”

⁷ Nwatî Daudi nîwavonokirie Mefiboshethu, mûvîcî wa Jonathani. Jonathani aarî mûvîcî wa Saûlo. Daudi aavonokirie Mefiboshethu nîûndû wa mwîvîtwa ûrîa ke mwene na Jonathani meevîtanîrîte mbere ya Ngai-Mûnene.

⁸ Nîwocire Arimoni na Mefiboshethu, anake a Rizipa arîa aaciarîre Saûlo. Rizipa aarî mwarî wa Aia. Nîwacokire agîoca anake atano a Merabu arîa Merabu aaciarîre Adirieli. Merabu aarî mwarî wa Saûlo, nake Adirieli aarî mûvîcî wa Barizilai ûrîa waumîte Mehola.

⁹ Daudi nîwamanenganîre kûrî andû a Gibeoni, nao makîmacuria vandû kîrîmarî îgûrû mbere ya Ngai-Mûnene. Andû acio onthe mûgwanja nîmaakwire vîndî îmwe. Maaûragirwe vîndî ya maketha rîrîa cairi yambagîrîria gûkethwa.

¹⁰ Rizipa mwarî wa Aia, ûrîa warî mûndûmûka wa Saûlo wa kwigwa nîwacokire agîtuma kanyomba ka nguo cia macakaya îgûrû rîa îthiga varîa ciimba icio ciarî. Nîwekarire vo kuuma rîrîa maketha maambîrîîrie nginya rîrîa mbura ya mûratho yaringire. Rizipa ndeetîkagîria iconi cia rîerarî ivutie ciimba icio îvinda rîa mûthenya, wana kana ivutue nî nyamû cia kîthaka îvinda rîa ûtukû.

¹¹ Rîrîa Daudi aamenyithirue ûrîa Rizipa eekîte,

¹² nîwathiîre na agîoca mavîndî ma Saûlo na ma mûvîcî wa Saûlo, Jonathani kuuma kûrî andû a Jabeshi kûu Gileadi. (Andû a Jabeshi maaîîte mavîndî mau na makamaruta gatagatî ga îtûûra rîa Bethi Shani kûrîa Afilisiti maamacurîtie îgûrû mûthenya ûrîa maaûragîre Saûlo kîrîmarî Kîam Giliboa.)

¹³ Daudi nîwocire mavîndî ma Saûlo na Jonathani vamwe na mavîndî ma andû mûgwanja arîa maacuurîtue mûtîrî.

¹⁴ Andû a Daudi nîmaathikire mavîndî ma Saûlo na Jonathani mbîrîrarî ya Kishu, îthe wa Saûlo îrîa yarî Zela vûrûrirî wa Benjamini, na magîka ûrîa wonthe mûthamaki amaathîte. Vuva wa ûguo, Ngai nîwacokirie mavoya marîa maavoete nîûndû wa vûrûri wao.

Mbaara gatagatî ka Aisiraeli na Afilisiti

¹⁵ Nîgwacokire gûkîgîa mbaara îngî gatagatî ka Afilisiti na Aisiraeli. Daudi na andû ake nîmaathiîre na makîrûa na Afilisiti na Daudi akînoga mûno.

¹⁶ Mûndû ûmwe warî mûnene mûno wetagwa Ishibibenobu, ûrîa wakuuîte îtumû rîa gîcango rîrîa rîarî na ûrito wa kilo ta ithatû na nuthu nîweciririe kûûraga Daudi. Mûndû ûcio eyoveete rûviû rûrû rûcerû kîûnûrî.

¹⁷ Nwatî Abishai mûvîcî wa Zeruia nîwathiîre gûtethia Daudi. Nîwatharîkîre Mûfilisiti ûcio na akîmûraga. Nao andû a Daudi nîmaacokire makîmwîrîra na mwîvîtwa atîrî, “Tûtikaathiî mbaararî nawe rîngî, nîûndû we nîwe kîîrîgîrîro gîetû, na tûtingîenda kûrwa nîwe.”

¹⁸ Vuva wa ûguo; nîkwagîre na mbaara îngî gatagatîrî ka Aisiraeli na Afilisiti kûu Gobu. Mbaararî îo, Sibekai ûrîa waumîte Husha nîwaûragire mûndû wîngî mûnene mûno wetagwa Safu.

¹⁹ Nîkwagîre na mbaara îngî gatagatîrî ka Aisiraeli na Afilisiti kûu Gobu. Elihanani mûvîcî wa Jairi ûrîa waumîte Bethilehemu nîwaûragire Goliathu ûrîa waumîte Gathu. Goliathu aarî na îtumû rîarî na mûtî mûriku ta rûvaû rûrîa rwîthagîrwa rûrî macinirî ya gûtuma nguo.

²⁰ Nîgwacokire gûkîgîa na mbaara rîngî kûu Gathu, kûrîa kwarî na mûndû ûmwe mûnene mûno na wendeete kûrûa mûno. Wa njara îmwe ya mûndû ûcio yarî na ciara ithathatû. Nakuo wa kûgûrû kûmwe gwake kwarî na ciara ithathatû.

²¹ Mûndû ûcio nîwareganire na Aisiraeli, nake Jonathani mûvîcî wa mûrwang'ina wa Daudi ûrîa wetagwa Shama akîmûraga.

²² Andû acio ana maarî njiarwa cia andû arîa maarî vinya mûno maatûûraga Gathu, na nîmaaûragirwe nî Daudi na andû ake.