2Sam 20 - ÎVUKU RÎA ÛVORO MWARO

Sheba nîwareganire na Daudi

¹ Kûu Giligali kwarî na mûndû warî kîmaramari wetagwa Sheba. Sheba aarî mûvîcî wa Bikiri wa kuuma mûvîrîga wa Benjamini. Sheba nîwavuvire karumbeta na akiuga atîrî, “Tue tûtikwenda Daudi! Tûtikûmûrûmîrîra! Andû a Isiraeli nîtwînûkeni wa mûndû gwake mûciî!”

² Kwoguo andû onthe a Isiraeli nîmaatiganîrie Daudi na makîrûmîrîra Sheba. Nwatî andû a Juda nîmaathiîre na mbere kwathîkîra Daudi na makîmûrûmîrîra kuuma Jorodani nginya Jerusalemu.

³ Rîrîa Daudi aakinyire gwake mûciî Jerusalemu, nîwocire aka îkûmi arîa aaigîte na aatigîte mamenyagîrîra mûciî na akiuga maigwe vandû nyomba mekarage marangîrîtwe. Nîwamavecaga kîrîa kîonthe maavataraga, nwatî ndaacoka kûmenyana nao kîîmwîrî. Maatûûrire mavingîrîtwe mekariî ta aka a ndigwa nginya rîrîa maakuire.

⁴ Mûthamaki nîwacokire akîîra Amasa atîrî, “Nakûva mîthenya îthatû ûcokanîrîrie andû onthe a Juda vamwe, na we mwene wîthîrwe ûrî vo.”

⁵ Amasa nîwathiîre gwîta andû a Juda, nwatî nîwacererwe na akîremwa nî gûcoka îvinda rîrîa mûthamaki aatuîte.

⁶ Kwoguo mûthamaki Daudi nîwerire Abishai atîrî, “Sheba mûvîcî wa Bikiri nîke ûgûtûthînia makîria ya Abusalomu. Oca ndungata ciakwa ûmûrûmîrîre na îvenya mbere ya akinya matûûra marîa mairigîre na atûthînie.”

⁷ Andû a Joabu na athigari arîa maarangagîra mûthamaki vamwe na andû onthe arîa maarî njamba nîmaaumire Jerusalemu marî vamwe na Abishai na makîrûmîrîra Sheba na îvenya.

⁸ Rîrîa maakinyire îthigarî rîrîa înene rîrîa rîarî Gibeoni, Amasa nîwathiîre kûmatûnga. Joabu eekîrîte nguo cia mbaara na aarî na rûviû rûrî njûrarî arûovererete mûcivirî wake. Joabu athiîte, rûviû rwake nîrwagûîre nthî.

⁹ Nake Joabu nîwaûririe Amasa atîrî, “Ûrî mwaro mûrata wakwa?” Nîwacokire akînyita nderu cia Amasa na njara yake ya ûrîo nîguo amûmumunye.

¹⁰ Nwatî Amasa ndoonaga rûviû rûu Joabu aanyitîte na njara yake ya ûmotho. Kwoguo Joabu nîwamundire Amasa îvu, na mara make magîtîka nthî. Amasa nîwakwire vîndî wa îo na Joabu ndaamûmunda rîngî. Joabu marî na mûrwang'ina Abishai nîmaacokire makîrûmîrîria Sheba na îvenya.

¹¹ Ûmwe wa andû a Joabu nîwarûngamire vakuvî na kimba Kîam Amasa na akiuga atîrî, “Mûndû wa wonthe ûrîa ûrî mwena wa Joabu na Daudi nîarûmîrîre Joabu!”

¹² Kimba kîu Kîam Amasa Kîammamîte gatagatî ka njîra gîcûrîte nthakame. Rîrîa mûndû ûcio watigîtwe nî Joabu oonire atî andû onthe arîa maavîtûkagîrîra vau nî maarûngamaga makinya vo, nîwakururirie kimba kîu kuuma njîrarî, agîkîvira vandû kîthakarî na agîgîkunîkîra na nguo.

¹³ Rîrîa kimba kîu Kîamthengutirue njîrarî, andû onthe nîmaarûmîrîre Joabu nîguo mavinyûrie Sheba mûvîcî wa Bikiri.

¹⁴ Sheba nîwavîtûkîrîre vûrûrirî kûrîa kwarî na mîvîrîga yonthe ya Isiraeli na agîkinya îtûûrarî rîa Abeli-bethi Maaka, nao andû onthe a mûvîrîga wa Bikiri nîmaaûnganire vamwe na makîmûrûmîrîra kûu îtûûrarî.

¹⁵ Rîrîa andû arîa maarî na Joabu meegwire atî Sheba aarî îtûûrarî rîu, nîmaathiîre na makîrîrigicîria. Nîmaaûmbîrîre mûthetu rûthingorî rûrîa rwarî mwena wa nja, na makîambîrîria kwînja nthî ya rûthingo rûu nîguo rûomomoke.

¹⁶ Îtûûrarî rîu kwarî na mûndûmûka ûmwe warî mûûgî. Mûndûmûka ûcio nîwetanire arî rûthingorî na akiuga atîrî, “Tathikîrîriani! Tathikîrîriani! Îrani Joabu aûke ava, nîûndû nînîrenda kwaria nake.”

¹⁷ Nake Joabu nîwathiîre kûrî ke na mûndûmûka ûcio akîmûria atîrî, “We nîwe wîtagwa Joabu?” Nake Joabu nîwacokirie atîrî, “Îî nînie.” Mûndûmûka ûcio nîwaugire atîrî, “Thikîrîria ûrîa ngûkwîra mwathi wakwa.” Nake Joabu nîwaugire atîrî, “Nî nthikîrîrîtie.”

¹⁸ Mûndûmûka ûcio nîwerire Joabu atîrî, “Tene mûno, andû maaugaga atîrî, thiîni mûgatuîrie ûvoro îtûûrarî rîa Abeli na ûguo nîguo andû meekaga.

¹⁹ Tûrî andû a îtûûra înene gûkû Isiraeli. Tûrî andû arîa mendete thayû na evokeku mûno gûkû Isiraeli. Ûrenda gûcûkangia îtûûra nîkî? Nîndûî kîratûma wenda gûcûkangia kîrîa Ngai-Mûnene ethuurîrîte?”

²⁰ Nake Joabu nîwacokirie atîrî, “Naarî, nie ndigaacûkangia kana nthirie îtûûra rîenyu!

²¹ Ûcio tîguo mûvango wetû. Nwatî mûndû ûmwe wa kuuma vûrûrirî ûrîa ûrî irîma wa Efiraimu wîtagwa Sheba mûvîcî wa Bikiri, nîke wambîrîrie kûregana na mûthamaki Daudi. Nenganîrani mûndû ûcio na nîngûthenguta îtûûrarî rîîrî rîenyu?” Mûndûmûka ûcio nîwerire Joabu atîrî, “Nîtûgûgwikîria kîongo gîake mwena ûcio wîngî wa rûthingo.”

²² Mûndûmûka ûcio nîwacokire akîthiî kûrî andû onthe arî na mûvango ûcio na akîaria nao na njîra îrî na ûûgî. Nao nîmaatinirie kîongo Kîam Sheba na magîgikîria Joabu mwena ûcio wîngî wa rûthingo. Joabu nîwacokire akîvuva karumbeta nîguo andû ake maume îtûûrarî rîu na menûke wa mûndû gwake mûciî. Nake Joabu nîwacokire Jerusalemu kûrî mûthamaki.

Atongoria a athigari a Daudi

²³ Joabu nîke warî mûnene wa athigari onthe a mbaara a Isiraeli; nake Benaia mûvîcî wa Jehoiada nîke warî mûnene wa athigari arîa maarangagîra Daudi;

²⁴ Adoniramu nîke warî mûnene wa andû arîa maarutithagua wîra na vinya; nake Jehoshafati mûvîcî wa Ahiludi nîke wamenyagîrîra mandîko;

²⁵ Sheva nîke warî mwandîki; Zadoku na Abiatha nîo maarî athînjîri-Ngai;

²⁶ nake Ira ûrîa waumîte îtûûrarî rîa Jairi wa nake aarî ûmwe wa athînjîri-Ngai a Daudi.