2Sam 2 - ÎVUKU RÎA ÛVORO MWARO

Daudi nîwatuirwe mûthamaki wa Juda

¹ Vuva wa maûndû mau, Daudi nîwaûririe Ngai-Mûnene atîrî, “Nîûkwenda nthiî ngatave îtûûra rîmwe rîa Juda?” Nake Ngai-Mûnene nîwamûcokerie atîrî, “Îî thiî.” Daudi nîwaûririe atîrî, “Nî nthiî îtûûrarî rîrîkû?” Nake Ngai-Mûnene nîwerire Daudi atîrî, “Thiî Heburoni.”

² Kwoguo Daudi na aka ake aîrî nîmaathiîre Heburoni. Nao aka acio nî: Ahinoamu ûrîa waumîte Jezireeli, na Abigaeli ûrîa vau mbererî warî mûndûmûka wa Nabali ûrîa kwao kwarî Karimeli.

³ Wana nîwathiîre na andû arîa meethagîrwa marî nake vamwe na andû a mîciî yao. Nao nîmaatûûrire matûûrarî ma Heburoni.

⁴ Nao andû a Heburoni nîmaathiîre Juda na makîthuura Daudi atuîke mûthamaki wa Juda. Rîrîa Daudi aamenyithirue atî andû a Jabeshi îrîa îrî kûu Gileadi nîo maathikire Saûlo,

⁵ nîwatûmire anjama amwe mathiî kuo makeere andû a Jabeshi atîrî, “Ngai-Mûnene aromûrathima nîûndû wa gîtîîo kîrîa mwonirie mûthamaki wenyu Saûlo na njîra ya kûmathika.

⁶ Nake Ngai-Mûnene aromûva wendo ûrîa ûtathiraga na amwîkage maûndû ma kîvooto. Nanie ngaamûtungatagîra waro nîûndû wa ûguo mwekire.

⁷ Rîu îyûmîrîrieni na mûgîe na vinya! Nîûndû Saûlo mûthamaki wenyu nî mûkuû, na andû a Juda nîmanthuurîte nduîke mûthamaki wao.”

Ishiboshethu nîwatuirwe mûthamaki wa Isiraeli

⁸ Abineri mûvîcî wa Neri, ûrîa warî mûnene wa mbûtû ya mbaara ya Saûlo nîwatorokete na Ishiboshethu mûvîcî wa Saûlo akathiî nake mûringo wa Jorodani na magîkinya Mahanaimu.

⁹ Nao marî kûu, Abineri nîwatuire Ishiboshethu mûthamaki wa mavûrûri ma Gileadi, Aashuri, Jezireeli, Efiraimu, Benjamini na Isiraeli kuonthe.

¹⁰ Ishiboshethu aatuîkire mûthamaki wa Isiraeli arî na ûkûrû wa mîaka mîrongo îna, na aathanire îtîîna rîa mîaka îîrî. Nwatî mûvîrîga wa Juda nîwathîkîre Daudi.

¹¹ Nake Daudi nîwathanire Juda arî kûu Heburoni îtîîna rîa mîaka mûgwanja na nuthu.

Mbaara gatagatîrî ka Isiraeli na mûvîrîga wa Juda

¹² Abineri mûvîcî wa Neri, na ndungata cia Ishiboshethu nîmaaumire Mahanaimu na makîthiî îtûûrarî rîa Gibeoni.

¹³ Nake Joabu, ûrîa ng'ina eetagwa Zeruia na ndungata icio ciîngî cia Daudi nîmaathiîre na magîtûngana na Ishiboshethu na andû ake vakuvî na karia ka Gibeoni, nao onthe magîkara nthî. Gîkundi kîmwe nîgîekarire nthî mwena ûmwe wa karia, nakîo gîkundi kîu kîngî gîgîkara mwena ûcio wîngî wa karia kau.

¹⁴ Nake Abineri nîwerire Joabu atîrî, “Tiga anake a mîena yoîrî mathake na indo ciao cia mbaara tûkîonaga.” Nake Joabu nîwacokirie atîrî, “Îî nîmathake.”

¹⁵ Kwoguo anake îkûmi na aîrî kuuma mwena wa Ishiboshethu na mûvîrîga wa Benjamini nîmaarûire na anake îkûmi na aîrî a Daudi.

¹⁶ Nao onthe, wa mûndû nîwanyitire nthû yake kîongo. Na wa mûndû nîwamundire ûrîa wîngî mbaru na rûviû nao onthe mîrongo îîrî na ana magîkua vamwe. Kwoguo vandû vau kûu Gibeoni vetagwa “Kîvaro Kîam Mviû.”

¹⁷ Nî gwacokire gûkîgîa na mbaara nene mûno mûthenya ûcio, na Abineri na Aisiraeli nîmaavootirwe nî andû a Daudi.

¹⁸ Nao anake athatû a Zeruia, Joabu, Abishai na Asaheli maarî vo. Asaheli ûrîa warî na îvenya ta nthwariga,

¹⁹ nîwavinyûririe Abineri arûngîrîrîtie.

²⁰ Nake Abineri nîwaroririe vuva na akiuga atîrî, “Anga nîwe Asaheli?” Nake Asaheli nîwacokirie atîrî, “Îî nî nie.”

²¹ Nake Abineri nîwerire Asaheli atîrî, “Tiga kûmvinyûria! Vinyûria ûmwe wa athigari na mûmûcune kîrîa arî nakîo.” Nwatî Isaheli nîwathiîre na mbere kûvinyûria Abineri.

²² Wa rîngî Abineri nîwerire Asaheli atîrî, “Tiga kûmvinyûria! Ûrenda ngûrage nîkî? Ngaumîrîra mûrwanyûkwe Joabu atîa?”

²³ Nwatî Asaheli ndeegua ûguo. Kwoguo Abineri nîwamundire Asaheli îvu na îtumû nginya rîkiumîrîra mûkurukuthu. Nake Asaheli nîwagwîre nthî na agîkua, na mûndû wa wonthe wakinyaga vau aamamîte arî mûkuû nîwarûngamaga vo.

²⁴ Nwatî Joabu na Abishai nîmaavinyûririe Abineri. Na mbere ya riûa rîthûe nîmaakinyire kîrîmarî Kîam Ama, kîrîa kîrî mwena wa îrathîro wa Gia, njîrarî îrîa yerekerete werûrî wa Gibeoni.

²⁵ Nao andû a mûvîrîga wa Benjamini nîmaacokanîrîre vamwe nîguo matethererie Abineri na makîrûngama kîrîmarî îgûrû.

²⁶ Abineri nîwetire Joabu na akîmûria atîrî, “Nîkwa tûgûtûûra tûrûaga tene na tene? Nîkwa ûtaramenya atî mûthiiarî gûtikethîrwa kûrî na umithio tiga marûrû matheri? Tûrî a îthe ûmwe. Nîkwa ûgakaania andû aku matige gûtûvinyûria rî?”

²⁷ Joabu nîwacokirie atîrî, “Nie nevîta na Ngai ûrîa ûtûûraga mwoyo, atî kethîrwa ndûnaria, andû akwa mangîathiî na mbere kûmûvinyûria nginya rûyû kîraûko.”

²⁸ Joabu nîwavuvire karumbeta nao andû ake onthe magîtiga kûvinyûria Aisiraeli, na kwoguo mbaara nîyathirire.

²⁹ Abineri na andû ake nîmaatuîkanîrie Kîamndarî Kîam Jorodani ûtukû wonthe. Nîmaaringire Rûnjî rwa Jorodani na maakinyire Mahanaimu kîvwaî Kîam mûthenya ûcio wîngî.

³⁰ Rîrîa Joabu aatigire kûvinyûria Abineri, nîwacokanîrîrie andû ake onthe na akîona atî matatarîte Asaheli andû îkûmi na kenda matiarî vo.

³¹ Andû a Daudi nîmaaûragîte andû a Abineri magana mathatû ma mîrongo îtandatû kuuma mûvîrîga wa Benjamini.

³² Nake Joabu na andû ake nîmoocire mwîrî wa Asaheli na makîûthika mbîrîrarî ya andû a mûciî îrîa yarî Bethilehemu. Nîmaacokire makîrara makîthiî ûtukû mûgima, na magîkinya Heburoni kûthiîte gûkîa.