2Sam 16 - ÎVUKU RÎA ÛVORO MWARO

Daudi na Ziba

¹ Rîrîa Daudi aavîtûkire kîrîma kîu vandû vanini, nîwatûngirwe nî Ziba ndungata ya Mefiboshethu. Ziba aarî na mvunda igîrî ikuîte mîgate magana maîrî, ikundi îgana rîmwe cia thavibu, ikundi îgana rîmwe cia matunda ma gûtuuwa wa rîo na mbooro îcûrîte ndivei.

² Mûthamaki Daudi nîwaûririe Ziba atîrî, “Indo ino cionthe nî ciakî?” Nake Ziba nîwacokirie atîrî, “Mvunda ino nî cia gûkuuaga andû a mûciî wa mûthamaki, mîgate na matunda nî cia kûrîwa nî anake, nayo ndivei nî ya kûnyunyagwa nî andû arîa mathira vinya marî werûrî.”

³ Mûthamaki nîwaûririe Ziba atîrî, “Mefiboshethu mûvîcî wa mwathi waku arî kû?” Nake Ziba nîwamûcokerie atîrî, “Arî Jerusalemu, nîûndû nîetîkîtie, atî ûmûnthî Aisiraeli nîmakûmûcokeria ûthamaki wa îthe Saûlo.”

⁴ Mûthamaki nîwacokire akîra Ziba atîrî, “Indo cionthe irîa iraarî cia Mefiboshethu rîu nî ciaku.” Nake Ziba nîwacokirie atîrî, “Nie nîrî ndungata yaku, tiga nduîke mwagîrîru mbere yaku, we mwathi wakwa!”

Daudi na Shimei

⁵ Rîrîa mûthamaki Daudi aakinyire Bahurimu, mûndû ûmwe wa mûciî wa Saûlo wetagwa Shimei nîwathiîre gûtûnga Daudi akîmûrumaga. Shimei aarî mûvîcî wa Gera.

⁶ Shimei nîwambîrîrie gwikia Daudi na ndungata ciake mathiga, wana ethîrwa Daudi nîwathiûrûrûkîrîtue nî andû ake wana athigari arîa maamûrangagîra.

⁷ Shimei nîwarumire Daudi akîmwîraga atîrî, “Thiî! Thiî! Mûragani ûyû! Mwîki naaî ûyû!

⁸ Wocire ûthamaki wa Saûlo, na rîu nîkwa Ngai-Mûnene arakûverithia nîûndû wa ûrîa waûragire andû eengî a mûciî wa Saûlo. Ngai-Mûnene nîanenganîrîte ûthamaki waku kûrî mûvîcîguo Abusalomu, na rîu mûragani ûyû nîwathira!”

⁹ Abishai ûrîa ng'ina eetagwa Zeruia nîwerire mûthamaki atîrî, “Mwathi wakwa, ûretîkîra mûndû ûyû wîkariî ta ngui îno nguû akûrume nîkî? Tiga nthiî nîmûtinie kîongo!”

¹⁰ Nwatî mûthamaki nîwerire Abishai na mûrwang'ina Joabu atîrî, “Ûcio tî wîra wenyu. Ethîrwa aranuma nîûndû nî Ngai-Mûnene ûmwîrîte eke guo, nîûrîkû ûrî na kîvooto gîa kûmûria areka ûguo nîkî?”

¹¹ Daudi nîwerire Abishai na ndungata ciake cionthe atîrî, “Ethîrwa mûvîcîwa ke mwene nîarenda kûmbûraga, kinthî Mûbenjamini ûyû ndangîmbîka maûndû macûku makîria? Ngai-Mûnene nîke ûmwîrîte arumane, kwoguo tiganani nake arumane.

¹² Ngai-Mûnene avota kwona mînyamaaro yakwa, na ambîtîrîrie irathimo nyîngî makîria ya irumi irîa arumanîte ûmûnthî.”

¹³ Kwoguo Daudi na andû ake nîmaathiîre na mbere na rûgendo rwao, nake Shimei akîmarûmîrîria athiîrîrîte mwena ûcio wîngî wa kîrîma. Aathiîcaga akîrumanaga, agikagia Daudi mathiga na akîmûvuragîria mûthetu.

¹⁴ Mûthamaki na andû ake magîkinya Jorodani maarî anogu mûno, kwoguo nîmaanogokire kuo.

Abusalomu arî Jerusalemu

¹⁵ Abusalomu na Aisiraeli onthe arîa maarî nake nîmaatonyire Jerusalemu. Ahithofeli aarî vamwe nao.

¹⁶ Rîrîa Hushai, ûrîa warî mûrata ûrîa mwîvokeku wa Daudi aakinyire kûrî Abusalomu, nîwerire Abusalomu atîrî, “Ûrotûûratûûra mûthamaki! Ûrotûûratûûra mûthamaki!”

¹⁷ Abusalomu nîwaûririe Hushai atîrî, “Ûcio nîguo wîvokeku waku kûrî mûrataguo Daudi? Mûregire kûthiî nake nîkî?”

¹⁸ Nake Hushai nîwamûcokerie atîrî, “Nîngîvotire kûthiî atîa? Nie nîrî mwena wa ûrîa ûthuurîtwe nî Ngai-Mûnene, nî andû aya na andû onthe a Isiraeli. Nie nîtwîkara nawe.

¹⁹ Makîria ya ûguo, nîkwa mbagîrîrwe nî gûtungatîra û? Anga tî mûriû wa mwathi wakwa? Wata ûrîa nîratungatagîra aguo, nwaguo ngûgûtungatîra.”

²⁰ Vuva wa ûguo, Abusalomu nîwerire Ahithofeli atîrî, “Rîu twîre ûrîa twagîrîrwe nî gwîka.”

²¹ Nake Ahithofeli nîwacokirie atîrî, “Thiîni kûrîa aka akwiga arîa aguo aatigire nîguo mekaragie mûciî na mûmenyane nao kîîmwîrî. Mweka ûguo andû onthe a Isiraeli nîmakûmenya atî ûrî nthû ya aguo, nao andû arîa marî mwena waku nîmakûmîrîria mûno.”

²² Kwoguo nîmaambîre Abusalomu îgema îgûrû rîa nyomba îo, na Abusalomu akîthiî na akîmenyana kîîmwîrî na aka acio îthe aaigîte Aisiraeli onthe makîonaga.

²³ Kavindarî kau mataaro monthe marîa Ahithofeli aavecanaga maamûkagîrûa ta ciugo ciumîte kûrî Ngai ke mwene. Ûguo nwaguo Daudi na Abusalomu maamûkagîra mataaro kuuma kûrî Ahithofeli.