2Sam 13 - ÎVUKU RÎA ÛVORO MWARO

Amunoni na Tamarû

¹ Abusalomu mûvîcî wa Daudi aarî na mwarwang'ina mûthaka mûno wetagwa Tamarû. Nake Amunoni, ûmwe wa anake a Daudi nîwendire Tamarû.

² Amunoni nîwendire Tamarû mûno nginya akîîrwarithia nîûndû wa mwarwang'ina. Tamarû aarî nthingi na Amunoni ndangîavotire gwîka wanarî ûndû nake.

³ Nwatî Amunoni aarî na mûratawe wetagwa Jonadabu mûvîcî wa Shama. Shama aarî mûrwang'ina na Daudi. Nake Jonadabu aarî mûndû mwara mûno.

⁴ Jonadabu nîwaûririe Amunoni atîrî, “We wî mûvîcî wa mûthamaki. Nîndûî kîrakûthînia nîûndû monaga wî mûrakaru mîthenya yonthe?” Amunoni nîwamûcokerie atîrî, “Nîmendete Tamarû mwarwang'ina na Abusalomu mûrwaiya.”

⁵ Jonadabu nîwamwîrire atîrî, “Îîrwarithie na ûthiî ûkamame ûrîrî. Rîrîa aguo agaûka gûkwona ûkaamwîra atîrî, ‘Nakûthaitha wîre Tamarû mwarwaiya aûke amve irio. Nîmenda aûke anthondekere irio gûkû ngîonaga na acoke amve irio ke mwene ndîe.’ ”

⁶ Kwoguo Amunoni nîwerwarithirie na akîthiî ûrîrî. Rîrîa mûthamaki Daudi aathiîre kûmwona, Amunoni nîwamwîrire atîrî, “Nakûthaitha tu ûreke Tamarû aûke gûkû anthondekere tûmîgate ngîonaga na acoke amve ke mwene ndîe.”

⁷ Kwoguo Daudi nîwatûmanîre Tamarû akeerwe athiî mûciî kwa mûrwang'ina Amunoni na amûthondekere irio.

⁸ Tamarû nîwathiîre kuo na akîthîra Amunoni amamîte ûrîrî. Tamarû nîwocire kîmere Kîam mûtu wa ngano na akîruga mîgate wa Amunoni akîonaga.

⁹ Nîwacokire akîmwîvûrîra, nwatî nîwaregire kûrîa. Amunoni nîwerire Tamarû atîrî, “Îngata andû onthe maume nja.” Nao andû onthe nîmaaumire nja.

¹⁰ Amunoni nîwacokire akîra Tamarû atîrî, “Ndetere mîgate ava ûrîrîrî na ûmbakîrie we mwene.” Nake Tamarû nîwocire mîgate na akîmûvirîra.

¹¹ Nwatî rîrîa Tamarû aamûkuvîvîrie, Amunoni nîwamûnyitire njara na akîmwîra atîrî, “Ûka tûmame nawe mwarwaiya.”

¹² Tamarû nîwamûcokerie atîrî, “Naarî tiga kûningîrîria mbîke ûndû wa gîconoko kînene ûguo! Ûndû ta ûcio ndwanekwa gûkû Isiraeli!

¹³ Nie ndingîvota kûthiî nîûndû wa nthoni. We nawe nî wîthîrwa ûconorithîtue Isiraeli kuonthe. Nakûthaitha tu warie na mûthamaki, na nîrî na ma atî nîakûmvecana kûrî we.”

¹⁴ Nwatî Amunoni ndaathikîrîria ûguo eeragwa nî Tamarû. Na nîûndû ke aarî na vinya kûrî Tamarû, nîwamûnyitire na akîmenyana nake kîîmwîrî na vinya.

¹⁵ Vuva wa ûguo, Amunoni nîwamenire Tamarû mûno. Nîwamûmenire gûkîra ûrîa aamwendete mbererî. Amunoni nîwacokire akîîra Tamarû atîrî, “Ûkîra na ûthiî.”

¹⁶ Nwatî Tamarû nîwamwîrire atîrî, “Naarî, kûmîngata nî îvîtia rînene gûkîra ûguo wambîka!” Nwatî Amunoni ndaamûthikîrîria.

¹⁷ Amunoni nîwetire ndungata yake na akîmîra atîrî, “Thengutia mûndûmûka ûyû ava methorî makwa! Mûrute nja na ûcoke ûvinge mûrango!”

¹⁸ Kwoguo ndungata îo yake nîyarutire mûndûmûka ûcio nja na îkîvinga mûrango. Tamarû eekîrîte nguo ndaca ya ûthamaki îrî na njara ndaca. Vîndî îo, nguo cia mûthemba ûcio nîcio ciekagîrwa nî mwarî wa mûthamaki atarî mûviku.

¹⁹ Tamarû nîweîtîrîrie mûu kîongorî gîake, agîtembûranga nguo îo yake ndaca, agîcoka akîîmika ûthiû wake na njara na akîthiî akîrîraga.

²⁰ Nwatî rîrîa mûrwang'ina Abusalomu aamwonire nîwamûûririe atîrî, “Nîkwa Amunoni akûnyita na vinya? Nakûthaitha mwarwaiya, ndûkareke ûndû ûcio ûkûthînia mûno. Amunoni nî mûrwanyûkwe. Kwoguo ndûkeere mûndû wanarî ûmwe ûvoro ûcio.” Nake Tamarû nîwatûûrire mûciî kwa mûrwang'ina Abusalomu arî na kîeva na nthoni nyîngî.

²¹ Rîrîa mûthamaki Daudi eegwire ûrîa gwekîkîte, nîwarakarire mûno.

²² Nake Abusalomu nîwamenire Amunoni mûno nîûndû wa kûnyita mwarwang'ina Tamarû na vinya na ndaacoka kwarîria Amunoni rîngî.

Abusalomu nîwerîvîrîrie

²³ Vuva wa mîaka îîrî, Abusalomu nîwenjaga ng'ondu ciake guoya kûu Baali-hazoru, na nîwetire anake a mûthamaki nîguo methîrwe marî vo. Baali-hazoru yarî vakuvî na îtûûra rîa Efiraimu.

²⁴ Abusalomu nîwathiîre kûrî Mûthamaki Daudi na akîmwîra atîrî, “Mwathi wakwa mûthamaki nînîrenjithia ng'ondu ciakwa guoya. Nakûthaitha ûûke mûrî na ndungata ciaku nîguo tûnyitanîre.”

²⁵ Nwatî mûthamaki nîwerire Abusalomu atîrî, “Naarî mûvîcîwa, tûngîthiî tuonthe twavota gûgûkuithia mûrigo mûrito.” Abusalomu nîwaringîrîrie mûthamaki mathiî, nwatî mûthamaki nîwaregire na nîwarathimire Abusalomu na akîmwîra athiî.

²⁶ Abusalomu nîwacokire akîîra mûthamaki atîrî, “Ethîrwa tî mûka, îra wanarî mûrwaiya Amunoni tûthiî nake.” Nake mûthamaki nîwamûûririe atîrî, “Ûrenda kûthiî nake nîkî?”

²⁷ Nwatî Abusalomu nîwathiîre na mbere kûringîrîria mûthamaki nginya mûthiiarî Daudi akîrekereria Amunoni na anake acio engî onthe ake mathiî na Abusalomu. Abusalomu nîwathondekire kîrugo ta Kîam mûthamaki

²⁸ na akîatha ndungata ciake agîciîra atîrî, “Tuîriani mûmenye waro vîndî îrîa Amunoni agaatuîka mûrîu, na rîrîa ngaamwîra mûmûrage, mûgeka guo. Mûtigetigîre nîûndû nînie ngaûrua nwatî tî mue. Îyûmîrîrieni na mûgîe na ûcamba!”

²⁹ Kwoguo ndungata cia Abusalomu nîciekire wata ûrîa Abusalomu aaciathîte na nîciaûragire Aamoni. Nao anake acio engî onthe a mûthamaki Daudi nîmaatûîre mvunda ciao na makîûra.

³⁰ Vîndî îrîa maarî njîrarî menûkîte, Daudi nîwerirwe atîrî, “Abusalomu nîaûragîte anake aku onthe na gûtirî wanarî ûmwe ûtigarîte!”

³¹ Vîndî îo mûthamaki nîwarûngamire, agîtembûranga nguo ciake na akîmama nthî nîûndû wa kîmako. Wana ndungata cionthe ciake irîa ciarî vamwe nake nîciatembûrangire nguo ciacio.

³² Nwatî Jonadabu mûvîcî wa Shama, Shama ûrîa warî mûrwangîna na Daudi nîwaugire atîrî, “Mwathi wakwa, ndûgecirie atî ciana cionthe ciaku nîciaûragwa; Amunoni wenga tu nîke mûkuo. Abusalomu nîke wathanire aûragwe, nîûndû kuuma vîndî îrîa Amunoni anyitire mwarwang'ina na vinya na akîmûmenya kîmwîrî, Abusalomu ethîrîtwe akîvanga kwîrîvîrîria.

³³ Kwoguo we mwathi wakwa ndûgecirie atî ciana cionthe ciaku nî nguû. Amunoni wenga tu nîke mûkuo.”

³⁴ Kavindarî wa kau Abusalomu nîwaûrire. Nake mûthigari ûrîa warangagîra nîwaroririe na akîona gîkundi kînene Kîam andû kînyûrûkîte na varavara kuuma Horonaimu, îthiîte na rûtere rwa kîrîma.

³⁵ Nake Jonadabu nîwerire mûthamaki Daudi atîrî, “Taroria avîcî a mûthamaki nîmaûka wata ûrîa ndungata yaku yaugire, nîguo gwatuîka”

³⁶ Nake arîkia kuga ûguo, anake a Daudi nîmaakinyire na makîambîrîria kûrîra maugîrîtie. Nake Daudi na ndungata ciake cionthe nîmaarîrire mûno.

³⁷ Abusalomu nîwatorokire na akîthiî kûrî Talimai mûvîcî wa Amihudi. Amihudi aarî mûthamaki wa Geshuri. Nake Daudi nîwacakaîre mûvîcî gwa kavinda karaca.

³⁸ Abusalomu nîwathiîre na agîkara Geshuri îvinda rîa mîaka îthatû

³⁹ Nwatî rîrîa Daudi aathirirwe nî kîeva gîa gîkuû Kîam Amunoni, nîwerirîrie kwona mûvîcî Abusalomu.