2Sam 12 - ÎVUKU RÎA ÛVORO MWARO

Ndûmîrîri ya mûrathi Nathani na kwîrira kwa Daudi

¹ Ngai-Mûnene nîwatûmire mûrathi Nathani kûrî Daudi. Nake Nathani nîwathiîre kûrî Daudi na akîmwîra atîrî, “Nîkwarî na arûme aîrî maatûûraga îtûûrarî rîmwe; ûmwe aarî gîtonga nake ûcio wîngî aarî mûthîni.

² Mûndû mûrûme ûcio warî gîtonga aarî na ng'ondu na ng'ombe nyîngî,

³ nwatî mûndûmûrûme ûcio warî mûthîni aarî na kamwatî kamwe tu aagûrîte. Nîwakamenyerere na gagîkûrîra kûu gwake mûciî vamwe na ciana ciake. Nako kaarîcaga irio wa irîa ke mwene aarîcaga na gakanyunyaga kîrîa ke aanyunyaga. Kaamamaga vakuvî nake na kûrî ke, kamwatî kau geekariî ta mwarî.

⁴ Mûthenya ûmwe mûndû ûcio warî gîtonga nîwagîre na mûgeni gwake mûciî. Gîtonga kîu gîtietîkîra kûthînjîra mûgeni wakîo nyamû îmwe ya ndîthia ciakîo nîguo kîmûthondekere irio. Vandû va ûguo, ke aanyitire kamwatî ka mûndû ûcio mûthîni na gîkîrugîra mûgeni wakîo.”

⁵ Daudi nîwarakarirue nî gîtonga kîu mûno na akîîra Nathani atîrî, “Nevîta na Ngai-Mûnene ûrîa ûtûûraga mwoyo, atî mûndû ûrîa wîkîte ûguo agîrîrwe nî gûkua!

⁶ Na nwanginya arîve kamwatî kau maita mana nîûndû wa gwîka gîîko ta kîu na nîûndû ndaarî na ntha.”

⁷ Nake mûrathi Nathani nîwerire Daudi atîrî, “We nîwe mûndû ûcio, na Ngai-Mûnene, Ngai wa Isiraeli arauga atîrî, ‘Naagûtuire mûthamaki wa Isiraeli na ngîkûvonokia kuuma kûrî Saûlo.

⁸ Nînaakûvere ûthamaki wake wana aka ake; nînaagûtuire mûthamaki wa Isiraeli na Juda. Ethîrwa maûndû mau matingîakwîganire, nîngîakûongerera mengî.

⁹ Rîu nîndûî gîtûmîte ûkararie watho wa Ngai-Mûnene? Nîndûî gîtûmîte wîke ûndû ûyû mûcûku ûguo? Watûmire Uria aûragîrwe mbaararî nî Aamoni na ûgîcoka ûgîoca mûndûmûka wake!

¹⁰ Nîûndû wa ûguo, andû amwe kuuma njiarwarî ciaku cionthe magaakua gîkuû Kîam ruuo nîûndû nîûregete kûmbathîkîra na nîwocete mûndûmûka wa Uria.

¹¹ Nînevîta nauga atî nîngaatûma mûndû wa kuuma mûciî waku akûretere thîna. Ûndû ûcio nîûkawona rîrîa ngaagûcuna aka aku na nîmavecane kûrî mûndû wîngî, nake nîakaamenyana nao kîîmwîrî mûthenya riûa rîarîte.

¹² Ûndû ûcio wekire, wekire na nthitho, nwatî nie ngeeka ûguo riûa rîarîte Aisiraeli onthe makîonaga.’ ”

¹³ Daudi nîwerire Nathani atîrî, “Nie nîmvîtîrîtie Ngai-Mûnene.” Nake Nathani nîwerire Daudi atîrî, “Ngai-Mûnene nîwakûovera mevia maku, na tîûkua.

¹⁴ Nwatî na njîra ya gîîko kîu wîkîte, nîûnyararîte Ngai-Mûnene. Kwoguo kaana kau nwanginya gagaakua.”

¹⁵ Nathani nîwacokire akînenûka gwake mûciî. Ngai-Mûnene nîwatûmire kaana kau mûndûmûka wa Uria maaciarîte na Daudi karûare mûno.

Mûvîcî wa Daudi nîwakwire

¹⁶ Daudi nîwavoere kaana kau nîguo kavone. Nîwenyerekirie na ûtukû nîwatonyaga nyomba gwake na akarara amamîte nthî.

¹⁷ Nacio ndungata cia gwake mûciî nîciathiîre kûrî ke na ikîgeria kûmûkîria, nwatî nîwaregire kûrîcanîra irio nacio.

¹⁸ Vuva wa kiumia kîmwe kaana kau nîgaakuire. Nacio ndungata cia Daudi nîcietigîre kûmwîra ûvoro ûcio, na nîmeeranire atîrî, “Vîndî îrîa kaana kau kararî mwoyo, Daudi ndaratwaragîria wana twamwarîria. Tûngîvota kûmwîra atîa atî kaana nî gakuû? Avota kwîgera ngero!”

¹⁹ Nwatî rîa Daudi oonire ndungata ikîvevanîrîra, nîwamenyire atî kaana kaarî gakuû. Kwoguo nîwaûririe ndungata ciake atîrî, “Nîkwa kaana karî gakuû?” Nacio nîciamwîrire atîrî, “Îî nî gakuû.”

²⁰ Daudi nîwaûkîrire varîa aamamîte nthî, akîîthambia agîîcanûra njuîrî, na agîcenjia nguo. Nîwacokire akîthiî nyombarî ya Ngai-Mûnene na akîvoya. Vuva wa ûguo nîwacokire gwake mûciî agîtia irio na akîrîa.

²¹ Nacio ndungata ciake nîciamwîrire atîrî, “Tue tûtiramenya ûguo ûreka. Nîûndû rîrîa kaana kaarî mwoyo, we nîwakarîrîre na ûkîînyerekia. Nwatî rîrîa karakwire ûraûkîrire na warîa irio!”

²² Daudi nîwacokirie atîrî, “Îî nîguo nînîrenyerekagia na ngarîra rîrîa kararî mwoyo. Nîreciragia Ngai-Mûnene nîakûmbîguîra ntha na avonie kaana kau.

²³ Nwatî rîu nîûndû nîgakuû-î, nîngîînyerekia nîkî. Nie nwa nîkariûkie rîngî? Nie nîmbîcî atî mûthenya ûmwe nîngaathiî kûu karî, nwatî ko gatingîcoka kûrî nie.”

Solomoni nîwaciarirwe

²⁴ Daudi nîwavorerie mûndûmûka wake Bethisheba, akîmenyana nake kîîmwîrî na agîciara kavîcî. Daudi nîwatuîrîre kaana kau rîîtwa Solomoni. Ngai-Mûnene nîwendire kavîcî kau

²⁵ na akîatha mûrathi Nathani agatuîre rîîtwa Jedidia nîûndû Ngai-Mûnene nîwakendete.

Daudi nîwatavire Raba

²⁶ Joabu nîwarûire na Raba, îtûûra rîrîa rîarî rînene rîa Aamoni na akîrîtava.

²⁷ Nîwacokire agîtûma anjaama mathiî kûrî Daudi makamwîre atîrî, “Nîntharîkîrîte Raba na ngatava ithima ciakuo cia manjî.

²⁸ Kwoguo cokanîrîria athigari acio engî aku, mûtharîkîre îtûûra rîu na mûrîtave, kana nîrîtave na rîcoke gwîtanua na rîîtwa rîakwa.”

²⁹ Daudi nîwacokanîrîrie athigari ake, makîthiî Raba, makîtharîkîra îtûûra rîu na makîrîtava.

³⁰ Nîwacokire akîruta nthûmbî ya thaavu îrîa yarî kîongorî Kîam mûthamaki wa Aamoni. Nayo yarî na ûrito wa kilo ta mîrongo îthatû na ithano na yarî na tûthiga twa goro ndarî ya yo. Daudi nîwamigîrîre kîongorî gîake. Nîwacokire agîkuua indo nyîngî irîa ciatavîtwe kuuma îtûûrarî rîu.

³¹ Nîwacokire agîtua andû a kuo aatûri a mbaû na mîcumano, aruti wîra na macembe ma cuuma, na mathanwa ma cuuma, na athondeki a matuvarî. Ûguo nîguo eekire andû onthe a matûûra mau mengî ma Aamoni. Nake Daudi na andû ake onthe nîmaacokire Jerusalemu.