2Sam 11 - ÎVUKU RÎA ÛVORO MWARO

Daudi na Bathisheba

¹ Kîambîrîriarî Kîam mwaka vîndî îrîa athamaki maamenyerete kûthiî mbaararî, Daudi nîwatûmire Joabu, vamwe na ndungata ciake wana Aisiraeli onthe mathiî vamwe. Nao nîmaavootire Aamoni na makîthiûrûrûkîria îtûûra rîa Roba. Nwatî Daudi ke mwene nîwatigirwe Jerusalemu.

² Mûthenya ûmwe kîvwaî, Daudi nîwaûkîrire akiuma varîa aanogokaga na agîtwa îgûrû rîa nyomba ya Mûthamaki. Rîrîa aacerangaga kûu îgûrû, nîwonire mûndûmûka akîîthambia. Mûndûmûka ûcio aarî mûthaka mûno.

³ Kwoguo Daudi nîwatûmire mûnjaama agatuîrie amenye ûvoro wîgiî mûndûmûka ûcio. Nake mûnjaama ûcio nîwamenyire atî mûndûmûka ûcio aarî Bathisheba mwarî wa Eliamu, na aarî mûndûmûka wa Uria ûrîa Mûhiti.

⁴ Daudi nîwatûmire anjaama mathiî makagîre Bathisheba, na mamûrete kûrî ke. Daudi nîwamenyanire nake kîîmwîrî. (Nake Bathisheba aarî wa vîndî arîkia îvinda rîake rîa kwîtheria wata ûrîa eekaga wa mweri). Bathisheba nîwacokire akînûka kwao mûciî.

⁵ Vuvarî, Bathisheba nîwamenyire atî aarî na nda na agîtûmana ndûmîrîri kûrî Daudi akavewe ûvoro ûcio.

⁶ Nake Daudi nîwatûmanîre Joabu akeerwe atîrî, “Ndetere Uria ûrîa Mûhiti.” Nake Joabu nîwarekererie Uria athiî kûrî Daudi.

⁷ Rîrîa Uria aakinyire kûrî Daudi, Daudi nîwamûûririe kana Joabu na athigari nwa aro, na ûrîa mbaara yathiîcaga na mbere.

⁸ Nîwacokire akîîra Uria atîrî, “Thiî gwaku mûciî wambe ûkanogoke vanini.” Nake Uria nîwaumire nyombarî ya mûthamaki na akîthiî. Daudi nîwacokire akîmûtûmîra kîveo gwake mûciî.

⁹ Nwatî Uria ndeenûka gwake mûciî. Vandû va ûguo ke aamamire kîvingorî Kîam nyomba ya mûthamaki marî na ndungata irîa ciarangagîra nyomba ya mûthamaki.

¹⁰ Rîrîa Daudi aamenyithirue atî Uria ndeenûka gwake mûciî, ke nîwaûririe Uria atîrî, “Ndwîthîrîtwe mûciî gwa kavinda karaca, ûraregire kûthiî mûciî nîkî?”

¹¹ Nake Uria nîwacokerie Daudi atîrî, “Andû a Isiraeli na Juda marî mbaararî na îthandûkû rîa Kîrîkanîro. Nake mwathi wakwa, Joabu vamwe na ndungata ciake mambîîte magema mao werûrî. Nîngîrathiîre mûciî ngarîe, ngînyunyaga na njoke menyane kîîmwîrî na mûndûmûka wakwa atîa? Nînîvîta na Ngai-Mûnene ûrîa ûtûûraga mwoyo atî, ndîngîrekire ûndû ta ûcio!”

¹² Daudi nîwerire Uria atîrî, “Îkara gûkû ûmûnthî na nîngaakûrekereria rûyû ûthiî.” Kwoguo Uria nîwekarire kûu Jerusalemu mûthenya ûcio na mûthenya ûcio wîngî.

¹³ Daudi nîwetire Uria makarîcanîre irio cia kîvwaî nake na akîmûva gîa kûnyua. Uria nîwarîwe nî ndivei, na mûthenya ûcio wanaguo ndaathiî gwake mûciî; nwatî aamamire gîtandarî gîake marî na ndungata cia mwathi wake.

¹⁴ Kîraûko, Daudi nîwandîkîre Joabu maarûa na agîtûma Uria athiî nayo akîmûvirîra.

¹⁵ Maarûarî îo, aandîkire atîrî, “Iga Uria mbere varîa mbaara îmatîrîte mûno, namue mûkînacoka mûmûtige aûragwe.”

¹⁶ Kwoguo rîrîa Joabu aathiûrûrûkagîria îtûûra rîu, nîwaigire Uria vandû varîa aaicî atî nîvo nthû irîa irî na vinya ciarî.

¹⁷ Nacio nthû cia îtûûra nîciaumire ikîthiî kûrûa na athigari a Joabu; nao athigari amwe a Daudi nîmaaûraganîrue vamwe na Uria.

¹⁸ Kwoguo Joabu nîwatûmire mûnjaama athiî akave Daudi ûvoro wîgiî mbaara îo,

¹⁹ na nîwataarire mûnjaama ûcio na akîmwîra atîrî, “Warîkia kûva mûthamaki ûvoro wonthe wîgiî mbaara,

²⁰ avota kûrakara na akûrie atîrî, ‘Mûrathiîre vakuvî na îtûûra rîu kûrûa nao nîkî? Nîkwa mûtaramenyaga mavota kûmûratha na mîguî marî nthingorî?

²¹ Nîkwa mûtararirikana ûrîa Abimeleki mûvîcî wa Gideoni aaûragirwe? Kinthî ndaaûragîrwe kûu Thebezi, rîrîa mûndûmûka aamwikîîrie îthiga rîa kîthîi arî rûthingorî; Mûrathiîre vakuvî na rûthingo nîkî?’ Ûkamûcokeria atîrî, ‘Wana ndungata yaku Uria ûrîa Mûhiti nîaraûragirwe.’ ”

²² Kwoguo mûnjaama ûcio nîwathiîre kûrî Daudi na akîmwîra maûndû monthe marîa Joabu aamûtûmîte akamwîre.

²³ Mûnjaama ûcio nîwerire Daudi atîrî, “Andû a îtûûra rîu nîmaatûkîririe vinya na nîmaaumîre îtûûrarî na magîûka kûrûa natue werûrî. Nwatî nîtwamacokithirie tûkîmakinyia mwîrîgarî wa îtûûra.

²⁴ Nao andû arîa maarathanaga na mîguî nîmaatuikirie mîguî marî rûthingorî îgûrû, na amwe a ndungata ciaku nîmaaûragirwe. Wanayo ndungata yaku, Uria ûrîa Mûhiti nîaraûragirwe.”

²⁵ Daudi nîwerire mûnjaama ûcio atîrî, “Ûmîrîria Joabu na ûmwîre ndagatangîke nîûndû wa ûndû ûcio, nîûndû gûtirî mûndû ûngîvota kûmenya nî mûndû ûrîkû ûngîkuîra mbaararî. Mwîre arîtharîkîre na vinya nginya avootane na acunane îtûûra rîu.”

²⁶ Rîrîa Bathisheba eegwire, atî mûthuuriwe aarî mûrage, nîwamûcakaîre.

²⁷ Rîrîa îvinda rîa macakaya rîathirire, Daudi nîwatûmanire Bathisheba agîrûe na avirwe kwa Daudi mûciî. Bathisheba nîwatuîkire mûndûmûka wa Daudi na nîwamûciarîre kavîcî. Nwatî Ngai-Mûnene ndaakenua nî ûguo Daudi eekîte.