2Sam 10 - ÎVUKU RÎA ÛVORO MWARO

Daudi nîwavootire Aamoni na andû a Sîria

¹ Vuva wa kavinda kanini, Nahashu mûthamaki wa Aamoni nîwakwire, nake mûvîcî Hanuni agîtuîka mûthamaki.

² Mûthamaki Daudi nîwaugire atîrî, “Nie nwanginya mbîke Hanuni mûvîcî wa Nahashu maûndû maro wata ûrîa îthe aambîkire.” Kwoguo Daudi nîwatûmire anjaama mathiî makamûkinyîrie macakaya make. Rîrîa maakinyire kûu vûrûrirî wa Aamoni,

³ atongoria a Aamoni nîmeerire mûthamaki atîrî, “Ûreciria atî nîûndû Daudi nîatûmîte anjaama maûke magûcakaithie nîkwa atîîte aguo mûno? Naarî tî ûguo! Amatûmîte gûkû marî athigani matuîrie îtûûra nîguo atûvoote!”

⁴ Kwoguo Hanuni nîwanyitire anjaama acio a Daudi, akîmenjithia nderu mwena ûmwe wa mûndû wa mûndû, agîcoka agîtinithia nguo ciao kuuma kîûnûrî kûthiî na nthî, na akîmeera mathiî.

⁵ Rîrîa Daudi aamenyithirue ûvoro ûcio, nîwatûmanire matûngwe nîûndû andû acio nîmegucaga nthoni nyîngî mûno. Nîwacokire akîmeera mekare Jeriko nginya rîrîa nderu ciao ikaneneva rîngî macoke macoke.

⁶ Rîrîa Aamoni moonire atî nîmatuma ûthû na Daudi, nîmaakomborire athigari ngiri mîrongo îîrî cia Sîria kuuma Bethireehobu na Zoba, athigari ngiri îkûmi na igîrî kuuma Tobu, na mûthamaki wa Maaka na athigari ake ngiri îmwe.

⁷ Rîrîa Daudi eegwire ûvoro ûcio, nîwamatûmîre Joabu na athigari a mbaara onthe arîa maarî njamba.

⁸ Nao Aamoni nîmaathiîre marî na indo ciao cia mbaara na makîrûngama kîvingorî Kîam Raba. Raba rîarî îtûûra rîao rîrîa rînene. Nao andû a Sîria na andû arîa maaumîte Tobu wa vamwe na arîa maaumîte Maaka nîmaarûngamire kûu maarî werûrî.

⁹ Vîndî îrîa Joabu oonire atî athigari a nthû ciake nîmakûvûrana nake maumîte mwena wa mbere na wa vuva, nîwathuurire athigari arîa maarî njamba a Isiraeli na akîmaiga meerekanîrîte na andû a Sîria.

¹⁰ Nîwacokire akiga athigari acio engî marî rungu rwa mûrwang'ina Abishai, ûrîa nake wacokire akiga athigari acio meerekanîrîte na Aamoni.

¹¹ Joabu nîwerire Abishai atîrî, “Wona andû a Sîria takwa makûmvoota, ûûke ûndethererie. Nanie nona andû a Aamoni takwa magûkûvoota nîngûka gûgûtethereria.

¹² Îyûmîrîrie! Tûrûe na vinya nîûndû wa andû etû na matûûra ma Ngai wetû. Nake Ngai-Mûnene aroeka wa ûrîa akwona kwagîrîre.”

¹³ Joabu na andû ake nîmaathiîre mbere kûtharîkîra andû a Sîria, nao andû a Sîria magîtoroka.

¹⁴ Rîrîa Aamoni moonire atî andû a Sîria nîmatoroka, nîmaatiganîrie Abishai na magîcoka îtûûrarî rîao. Joabu nîwatigire kûrûa na Aamoni na agîcoka Jerusalemu.

¹⁵ Nwatî rîrîa andû a Sîria moonire atî nîmavootwa nî Aisiraeli nîmaacokanîrîrie andû ao onthe vamwe.

¹⁶ Nake mûthamaki Hadadezeri nîwatûmanîre andû arîa maarî mûringo ûcio wîngî wa Rûnjî rwa Farati maûke. Nao nîmaaûkire Helamu matongoretue nî Shobaku, mûnene wa athigari a mbaara a Hadadezeri ûrîa warî mûthamaki wa Zoba.

¹⁷ Rîrîa Daudi aamenyithirue ûvoro ûcio nîwacokanîrîrie athigari onthe a Isiraeli, makîringa rûnjî rwa Jorodani na magîkinya Helamu, kûrîa andû a Sîria maarûngamîte mevarîrîtie kûrûa nake. Nayo mbaara nîyambîrîrie

¹⁸ na andû a Isiraeli makîngata athigari a Sîria. Nake Daudi na andû ake nîmaaûragire andû magana mûgwanja a Sîria arîa maatwarithagia ikaari cia mbarathi na andû ngiri mîrongo îna arîa maathiîcaga matûîte mbarathi. Nîmaacokire magîtivia Shobaku, mûnene wa nthû ciao na agîkuîra kûu mbaararî.

¹⁹ Rîrîa athamaki onthe arîa maarî ndungata cia Hadadezeri moonire atî nîmavootwa nî Aisiraeli, nîmegucanire na Aisiraeli na magûtuîka ndungata cia Aisiraeli. Kwoguo andû a Sîria nîmeetigîre gûcoka gûtethia Aamoni rîngî.