2Sam 1 - ÎVUKU RÎA ÛVORO MWARO

Daudi nîwamenyire ûvoro wîgiî gîkuû gîa Saûlo

¹ Saûlo arîkia gûkua, Daudi nîwacokire kûu Zikilagi na agîkara kuo mîthenya îîrî arîkia kûvoota Amaleki.

² Naguo mûthenya wa kathatû mwanake ûmwe nîwaûkire aumîte kûrîa Saûlo maambîte magema. Eekîrîte nguo ino ndembûkangu na ageîtîrîria mûthetu kîongorî gîake. Rîrîa mwanake ûcio aakinyire kûrî Daudi, nîwenamîrîrie ûthiû wake nthî na gîtîîo mbere yake.

³ Nake Daudi nîwamûûririe atîrî, “Umîte kû?” Nake nîwerire Daudi atîrî, “Nie nîkwa natoroka kuuma kûrîa Aisiraeli maambîte magema.”

⁴ Nake Daudi nîwamwîrire atîrî, “Ta mbîra ûrîa gwîkarire.” Nake mwanake ûcio nîwacokerie Daudi atîrî, “Andû etû nîmaûrire mauma mbaararî na andû eengî mûno etû maûragwa. Saûlo na Jonathani wanao nîmaûragirwe.”

⁵ Daudi nîwaûririe mwanake ûcio atîrî, “We wicî atîa atî Saûlo na Jonathani nî akuû?”

⁶ Mwanake ûcio nîwacokerie Daudi atîrî, “Nie naarî vau kîrîmarî gîa Giliboa na nînoonire Saûlo anyitîte îtumû rîake. Nacio ikaari cia mbarathi na athigari arîa mathiîcaga matûîte mbarathi cia nthû, ciathiîte imûrûmîrîrîte na îvenya.

⁷ Rîrîa eevûgûrire na akîmona nîwambîtire nanie ngîcokia atîrî, ‘Nîrî ava mwathi wakwa!’

⁸ Nake nîwambûririe atîrî, ‘We wî û?’ Nanie nînaamûcokerie atîrî, ‘Nie nîrî Mûmaleki!’

⁹ Nake nîwacokire akîmbîra atîrî, ‘Ûka ûmbûrage! Nîûndû nie nîrîmûtivangie mûno na nîrî vakuvî gûkua!’

¹⁰ Kwoguo Nînathiîre na ngîmûûraga nîûndû nînaamenyaga atî ke ndangîavonire nîûndû aarî mûmunde mûno. Nînacokire ngîoca nthûmbî îrîa eekîrîte kîongorî gîake na mvang'iri îrîa yarî njararî yake na nîcio nakûretere, mwathi wakwa.”

¹¹ Daudi na andû arîa maarî nake nîmaatembûrangire nguo ciao nîûndû wa kîeva.

¹² Nîmaacakaire, makîrîra, na makîîvinga kûrîa irio nginya kîvwaî nîûndû wa Saûlo na Jonathani, na nîûndû wa Aisiraeli, andû a Ngai-Mûnene nîûndû eengî ao nîmaûragîrîtwe mbaararî.

¹³ Daudi nîwaûririe mwanake ûcio wamûvecaga ndûmîrîri îo atîrî, “We umîte kû?” Nake nîwamûcokerie atîrî, “Nie nîrî Mûmaleki, nwatî ndûûraga vûrûrirî ûyû waku.”

¹⁴ Daudi nîwamûûririe atîrî, “Wavotire kûûraga mûthamaki ûrîa Ngai-Mûnene athuurîte atîa?”

¹⁵ Daudi nîwetire ûmwe wa anake ake na akîmwîra atîrî, “Mûrage!” Nake mwanake ûcio nîwaringire Mûmaleki ûcio na akîmûraga.

¹⁶ Daudi nîwerire Mûmaleki ûcio atîrî, “Nthakame yaku îrogûcokerera nîûndû we nîwe waumbûra na kanyua gaku atî nîwe waûragire mûndû ûrîa Ngai-Mûnene aathuurire nîguo atuîke mûthamaki.”

Daudi nîwacakaire Saûlo na Jonathani

¹⁷ Daudi nîwainîre Saûlo na mûûriû wake Jonathani rwîmbo rûrû rwa kîeva,

¹⁸ na nîwathanire na akiuga rûrutwe andû a Juda. (Rwîmbo rûrû nî rwandîke îvukuurî rîa Jashari).

¹⁹ “Riiri waku we Isiraeli, nî ûragîrîtwe irîmarî ciaku! Andû etû arîa marî vinya nîmagwîte!

²⁰ Mûtikavecane ûvoro ûcio kûu Gathu, kana mûûvecana njîrarî cia Ashikeloni. Mûtigatûme erîtu a Afilisiti makena, mûtigatûme erîtu a andû arîa mataruaga makena.

²¹ “Mbura îrorega kuura kana îme rîgwa irîmarî cia Giliboa. Mîgûnda ya irîma icio îrotûûra îrî mîthaatu vîndî cionthe. Nîûndû kûu nîkuo ngo ya ûrîa ûrarî vinya îraikirue ta kîndû kîmene; Ngo ya Saûlo ndîkaavakwa maguta rîngî.

²² Ûta wa Jonathani ndûracokaga ûtarî na nthakame ya andû arîa ûûragîte, kana rûviû rwa Saûlo rûcoka rûtarî na maguta ma andû arîa marî vinya.

²³ “Saûlo na Jonathani marî mwoyo maarî a kwendeka na ega mûno, gûkua kana kûvona matiatigana; Maarî na îvenya gûkîra nderi, maarî na vinya gûkîra mînyambû.

²⁴ “Mue erîtu a Isiraeli rîrîrani Saûlo! Ke nîwamûvecaga nguo ndume na ciarî nthaka mûno, na nîwaigemagia na mathaga ma thaavu.

²⁵ “Na kaî andû arîa marî na vinya nîagwîu-î, maaûragîrwe mbaararî. Jonathani amamîte irîmarî ciaku arî mûkuû.

²⁶ “Nie nîrî na kîeva nîûndû waku mûrwaiya Jonathani; kûrî nie we ûraarî mûndû mwaro mûno! Wendo ûrîa ûramendete naguo ûrarî wa magegania, nîûndû ûrarî mûnene gûkîra wendo wa mûndû mûka.

²⁷ “Andû arîa marî na vinya nî magwîte, nacio indo ciao cia mbaara nî itiganîrîtue na igatura vata.”