2Pet 3 - ÎVUKU RÎA ÛVORO MWARO

Kîîranîro kîa gûka kwa Mwathani

¹ Arata akwa, îno rîu nîyo maarûa yakwa ya kaîrî kûmwandîkîra. Maarûarî wa cioîrî, nîngeretie kûrurumûkia meciria menyu mevokeku na njîra ya kûmûririkania maûndû mama.

² Nîrenda mûririkane ciugo irîa ciarirue tene mûno nî arathi arîa atheru na rîathani rîrîa mwaveerwe nî atûmwa enyu riumîte kûrî Mwathani na Mûvonokia.

³ Îgûrû rîa maûndû monthe, nwanginya mûmenye atî mîthenyarî ya kûrigîrîria, nîgûkaumîra andû amwe marî na mîkarîre yathagwa nî merirîria mao macûku. Nao nîmakaamûnyûrûria

⁴ makiugaga atîrî, “Na kinthî ndaamwîrire nîagaaûka? Arî kû rîu? Nîûndû kuuma wa rîrîa methe metû ma tene maakwire, kwîthîrîtwe gwîkariî wa ta ûrîa gwekariî kuuma wa Kîammbîrîria gîa kûmbwa kwa nthî!”

⁵ Makîmenyaga na ma atî tene mûno Ngai nîwathanire kûgîe îgûrû na nthî. Nthî yaûmbirwe kuuma kûrî manjî.

⁶ Na nthî îrîa yarî kuo vîndî ya tene yacûkangirue na mwîcûro wa manjî.

⁷ Nwatî îgûrû na nthî irîa irî kuo rîu cigîtwe na njîra ya rîathani wa rîu rîa Ngai nîguo ikaathirua na mwaki. Nacio cigîtwe nîûndû wa mûthenya ûrîa andû arîa matarî na ûngai magaatuîrwa na mathirue.

⁸ Nwatî arata akwa ende, mûtikariganîrwe nî ûndû ûyû ûmwe! Varî Mwathani mûthenya ûmwe nî ta mîaka ngiri îmwe, na mîaka ngiri îmwe nî ta mûthenya ûmwe.

⁹ Mwathani ndavingagia ciîranîro ciake arî na ûtururu ta ûrîa andû amwe meciragia. Vandû va ûguo nîamûkiragîrîria nîûndû gûtirî mûndû wana ûmwe endaga akaaûra, nwatî endaga andû onthe merire mevia mao.

¹⁰ Nwatî Mûthenya wa Mwathani ûgaakinya ta ûrîa mwîi aûkaga. Mûthenya ûcio îgûrû nîrîkaathira na mûrurumo mûnene. Ciûmbe cionthe irîa irî îgûrû nîikaavîvua na mwaki ithire. Nayo nthî na indo cionthe irîa irî kuo nîikaavîvua viû.

¹¹ Na nîûndû indo ino cionthe ikaathirua na njîra ta îo, mwagîrîrwe nî kwîthîrwa mûrî andû a mûthemba ûrîkû? Mwagîrîrwe nî kwîthîrwa mûrî na mîtugo mîtheru na mwîvecanîte kûrî Ngai,

¹² wa mûgîetagîrîra na mûkîîriragîria mûno Mûthenya wa Ngai ûkinye. Vîndî îrîa Mûthenya ûcio ûgaaûka, îgûrû nîrîkaavîvua na mwaki rîthire, nacio ciûmbe cionthe irîa irî îgûrû ivîe nî mwaki irarûke.

¹³ Nwatî kûringana na kîîranîro gîake, tue twetererete îgûrû rîcerû na nthî njerû, kûrîa gûkethîrwa gwîcûrîte ûthingu.

¹⁴ Kwoguo arata akwa ende, wa mûgîetagîrîra Mûthenya ûcio, geragiani wa ûrîa mûngîvota nîguo mwîthagîrwe mûrî atheru na mûtarî na ûcuke mbere ya Ngai, na mûrî na thayû.

¹⁵ Tucagani gûkirîrîria kwa Mwathani wetû ta kamweke aramûva nîguo mûvonoke. Mûrû wa îthe wetû mwende Paûlo nîwamwîrire wa guo vîndî îrîa aamwandîkîre maarûa kûringana na ûûgî ûrîa Ngai aamûveete.

¹⁶ Ûguo nîguo augîte maarûarî ciake cionthe rîrîa rîonthe andîkîte îgûrû rîa ûvoro ûyû. Maûndû mamwe marî maarûarî cia Paûlo nî maûmû mûno mûndû gûtaûkîrwa nîmo. Nao andû arîa methagîrwa matarî athomu na arîa matekindîrîtie wîtîkiorî nîmataaragîria maûndû mau na njîra ya maveeni, wata ûrîa mataaragîria icunjî irîa ciîngî cia Mandîko Matheru. Kwoguo nîmethiragia o ene.

¹⁷ Nwatî mue arata akwa ende nîmûrîkîtie kûmenya ûguo. Kwoguo îîmenyagîrîreni mûtikaume wîtîkiorî ûcio wenyu ûrîa mwîkindîrîtie nîûndû wa kûvîtithua nî andû arîa mareganaga na watho.

¹⁸ Nwatî thiîni na mbere gûkûra mûrî na wega na ûûgî wa Mwathani na Mûvonokia wetû Jesû Kristû. Ke arokumua rîu nginya tene na tene! Ameni.