2Pet 1 - ÎVUKU RÎA ÛVORO MWARO

¹ Nie Simoni Petero ndungata na mûtûmwa wa Jesû Kristû, nîramwandîkîra mue andû arîa mavetwe wîtîkio wa goro wata ûrîa tûrî naguo na njîra ya ûthingu wa Ngai wetû na wa Mûvonokia wetû Jesû Kristû.

² Mûrotuîka a kwîngîvîrwa nî wega na thayû, nîûndû nîmûmenyete Ngai na Mwathani wetû Jesû.

Gwîtwa na kûthuurwa nî Ngai

³ Vinya wa Ngai nîûtûvete indo cionthe irîa tûvatarîte nîguo tûtûûre tûrî na ûngai ûrîa wa ma. Tûrî na indo icio nîûndû nîtûmenyete Jesû ûrîa watwîtire nîguo tûkaagaa riiri na wega wake.

⁴ Nîûndû wa maûndû mau, nîatûvete iveo cia vata mûno na cia goro, irîa ke eeranîre. Na njîra ya iveo ino nwa mûvote kûûrîra merirîria macûku ma gûkû nthî na mûgekara ta Ngai.

⁵ Na nîûndû wa gîtûmi kîu, geragiani mûno mwongagîrîre gwîka waro wîtîkiorî wenyu, na gwîka waro kwenyu mwongagîrîre ûmenyo,

⁶ ûmenyorî wenyu mwongagîrîre kwînyitia merirîria ma mwîrî, kwînyitia merirîria ma mwîrî mwongagîrîre ûmîrîru, ûmîrîrurî wenyu mwongagîrîre ûngai,

⁷ Ûngairî wenyu mwongagîrîre ûtaana kûrî aarî na ariû a îthe wetû, ûtaanarî wenyu kûrî aarî na ariû a îthe wetû mwongagîrîre wendani.

⁸ Nîmûvatarîte kwîthagîrwa mûrî na maûndû mama na mekarage makîongererekaga. Na ethîrwa maûndû mau makongererekaga kûrî mue magatûmaga mûtuîke andû a vata na marî na maciaro ûvororî wîgiî kûmenya Mwathani wetû Jesû Kristû.

⁹ Nwatî mûndû wa wonthe ûtarî na maûndû mau nî mûtumumu, na nîmûriganîre atî nîwathambirue mevia make marîa aarî namo tene.

¹⁰ Kwoguo ariû na aarî a îthe wetû, geragiani na kîîo mûno kwona atî na ma nîmwîtîtwe na mûkathuurwa nî Ngai. Ethîrwa nîmûgwîka ûguo, mûtigatiganîria wîtîkio wenyu.

¹¹ Na njîra îno nîmûkaamûkîrwa na ûtaana ûthamakirî wa tene na tene, wa Mwathani na Mûvonokia wetû Jesû Kristû.

¹² Mue nîmwîcî maûndû mama na nîmwîkindîrîtie waro ûvororî wa ma ûrîa mwamûkîrîte. Nwatî nwa ngwîkara ngîmûririkanagia mo.

¹³ Nîreciria nî ûndû mwaro mbîkare ngîmûririkanagia maûndû mama îvinda rîonthe rîrîa ngûtûûra mwoyo.

¹⁴ Nîmbîcî atî îvindarî îkuvî nîngûkua wa ta ûrîa monetue nî Mwathani wetû Jesû Kristû.

¹⁵ Kwoguo nîngûgeria wa ûrîa nîngîvota nîguo wana narîkia gûkua mûkaavotaga kûririkana maûndû mama vîndî cionthe.

Aira arîa moonire riiri wa Kristû

¹⁶ Vîndî îrîa tue twamûmenyithirie ûvoro wîgiî gûka kwa Mwathani wetû Jesû Kristû arî na ûvoti mûnene, tî ng'ano cia gwîtungîra twamûganagîra. Nwatî nîtweyonere ûnene wake na metho metû.

¹⁷ Twarî vo rîrîa aaveerwe gîtîîo na riiri nî Ngai Vava rîrîa mûgambo waumire kûrî ûrîa ûrî Riiri Mûnene ûkiuga atîrî, “Ûyû nîke Mûriû wakwa ûrîa mendete mûno, nîrî mûkenie mûno nîke.”

¹⁸ Nîtwegwire mûgambo ûcio kuuma îgûrû nîûndû twarî nake kîrîmarî kîrîa kîtheru.

¹⁹ Na tûrî na ûma makîrîa wa ndûmîrîri îrîa yanîrîrwe nî arathi. Nîmwagîrîrwe nî kûthikîrîria ndûmîrîri îo, nîûndû yo îkariî ta taa yakanîte vandû ndumarî nginya gûkîe, na ûtheri wa njata ya kîraûko ûgakengaga ngororî cienyu.

²⁰ Îgûrû rîa maûndû monthe, ririkanagani atî gûtirî mûndû ûngîvota gûtaûra ûrathi ûrîa ûrî Mandîkorî Matheru na ûvoti wake mwene.

²¹ Nîûndû gûtirî ûrathi wanaumana na wendi wa mûndû, nwatî andû managîrîra ndûmîrîri kuuma kûrî Ngai matongoretue nî Roho Mûtheru.