2Maû 9 - ÎVUKU RÎA ÛVORO MWARO

Mûndûmûka ûrîa warî mûthamaki wa Sheba nîwathiîre gwa Solomoni

¹ Rîrîa mûndûmûka ûrîa warî mûthamaki wa Sheba eegwire ngumo ya mûthamaki Solomoni, nîwathiîre Jerusalemu nîguo akagerie Solomoni na ciûria nyûmû. Mûndûmûka ûcio mûthamaki wa Sheba nîwathiîre na ndungata nyîngî na ngamîîra nyîngî ikuuîte mînyamû mînungi waro, thaavu na mathiga ma goro. Rîrîa aakinyire kûrî mûthamaki Solomoni, nîwamwîrire maûndû monthe marîa maarî ngororî yake.

² Solomoni nîwamûcokerie ciûria cionthe irîa aamûririe na gûtirî ûndû wanarî ûmwe Solomoni aaremirwe nî kûmûtarîria.

³ Rîrîa mûthamaki wa Sheba oonire ûûgî ûrîa warî na Solomoni na akîona nyomba îrîa aatumîte,

⁴ irio irîa ciarî metharî yake, kûrîa ndungata cia Solomoni ciekaraga, ûrîa aatungatagîrwa nî ndungata ciake, nguo cia ndungata icio, ndungata irîa ciamûviragîra gîa kûnyua na magongoona ma kûvîvua marîa Solomoni aarutagîra hekarûrî ya Ngai-Mûnene, nîwamakire mûno na akîremwa nî kwaria.

⁵ Nake nîwerire mûthamaki Solomoni atîrî, “Ûrîa neguire nîrî vûrûrirî wakwa ûvoro wîgiî maûndû marîa wîkîte na ûûgî waku nî ma ma!

⁶ Nwatî ndietîkia maûndû mau nginya rîrîa nîraûkire na ngîyonera nie mwene na metho makwa. Ûrîa nerîtwe wana tî mwîganu nuthu ya ûûgî waku. Ûûgî waku na wîra waku nî makîria ya ûrîa neguîte.

⁷ Kaî aka aku marî na mûnyaka-î! Kaî ndungata ciaku irîa igûtungataga vîndî cionthe na ciîgucaga ciugo ciaku cia ûûgî irî na mûnyaka-î!

⁸ Ngai-Mûnene, Ngai waku arokumua, nîûndû nîwakenirue nîwe na agîtûma wîkaragîre gîtî Kîam ûthamaki vandûrî vake. Nîûndû Ngai-Mûnene nîendete andû ake, Aisiraeli na nîendete kûmatûûria tene na tene. Nîakûthuurîte ûtuîke mûthamaki wao nîguo wathanage na kîvooto na ûma.”

⁹ Kwoguo mûndûmûka ûcio mûthamaki wa Sheba nîwanengere mûthamaki Solomoni iveo irîa aamûvirîrîte. Iveo icio ciarî: thaavu ya ûrito wa makîria ma kilo ngiri inya (4,000), mînyamû mînungi waro mîîngî, na mathiga ma goro. Gûtiarî mînyamû mînungi waro ta îo mûndûmûka ûcio mûthamaki wa Sheba aveere mûthamaki Solomoni.

¹⁰ Andû a mûthamaki Hiramu na andû a mûthamaki Solomoni nîmaaretire thaavu kuuma Ofiri, mîtî ya mîthengera na mathiga ma goro.

¹¹ Mûthamaki Solomoni nîwatûmîre mîtî îo ya mîthengera gûtuma ngathî cia hekarû na nyomba ya mûthamaki, na akîrûtha ngita na mîtûrirû ya aini a nyîmbo. Gûtionekete indo ta icio mbererî kûu vûrûrirî wa Juda.

¹² Mûthamaki Solomoni nîwavere mûndûmûka ûcio mûthamaki wa Sheba indo cionthe irîa eetirie gûtagûtarwa indo irîa Solomoni aamûveete nîûndû wa iveo irîa aamûvirîrîte. Kwoguo mûndûmûka ûcio mûthamaki wa Sheba marî na ndungata ciake nîmaacokire vûrûrirî wa Sheba.

Ûtonga wa mûthamaki Solomoni

¹³ Mwaka wa mwaka, mûthamaki Solomoni nîwaviragîrwa thaavu ya ûrito wa vakuvî kilo ngiri mîrongo îîrî na ithatû (23,000),

¹⁴ îgûrû rîa gooti îrîa yarîvagwa nî andû arîa meendagia na maagûraga indo. Athamaki onthe a Arabia na anene a icunjî cia vûrûri wa Isiraeli wanao nîmaaretagîre Solomoni sîlûva na thaavu.

¹⁵ Solomoni nîwarûthire ngo nene magana maîrî (200) cia thaavu ya gûturwa. Wa ngo yavakîtwe thaavu ya ûrito ta wa kilo mûgwanja (7),

¹⁶ na ngo ciîngî nini magana mathatû (300). Wa îmwe ya ngo icio nini yavakîtwe thaavu ya ûrito ta wa kilo ithatû (3). Mûthamaki Solomoni nîwacigire nyombarî ya mûtitû wa Lebanoni.

¹⁷ Mûthamaki nîwatumire gîtî kînene Kîam ûthamaki. Gîtî kîu Kîam gîatumîtwe na mîguongo na gîkavakwa thaavu ntheri.

¹⁸ Gîtî kîu Kîam ûthamaki Kîamrî na ngathî ithathatû, na vandû va kwigîrîrwa magûrû varûthîtwe na thaavu na vanyitanîte na gîtî kîu Kîam ûthamaki. Mîenarî ya kîo yoîrî kwarî na vandû va kwigîrîrwa njara. Mîenarî yoîrî kwarî na mîvuano îîrî ya mînyambû vakuvî na vandû vau va kwigîrîrwa njara.

¹⁹ Ngathîrî icio ithathatû kwarî na mîvuano ya mînyambû îkûmi na îîrî (12). Wa mûthiiarî wa ngathî vaarî na mûvuano ûmwe wa mûnyambû. Gûtirî gîtî Kîam ûthamaki ta kîu Kîamrî Kîamnatumwa mbererî vûrûrirî wîngî.

²⁰ Ikombe cionthe cia mûthamaki Solomoni ciarî cia thaavu, na indo cionthe irîa ciarî nyombarî ya mûtitû wa Lebanoni ciarî cia thaavu ntheri. Sîlûva ndîonagwa ta kîndû vîndî ya ûthamaki wa Solomoni.

²¹ Meri cia mûthamaki ciathiîcaga Tarishishi ikîmenyagîrîrwa nî ndungata cia mûthamaki Huramu. Vuva wa mîaka îthatû, meri icio nîciaretaga thaavu, sîlûva, mîguongo, nthinwa, na ngoroi kuuma Tarishishi.

²² Mûthamaki Solomoni aarî mûtongu mûno na aarî mûûgî mûno gûkîra athamaki onthe a nthî.

²³ Athamaki onthe a nthî nîmaathiîcaga kwaranîria nake nîguo megue ûûgî ûrîa Ngai aamûveete.

²⁴ Wa mûthamaki nîmaaviragîra Solomoni iveo wa mwaka wa mwaka. Iveo icio ciarî indo cia thaavu, sîlûva, nguo, indo cia mbaara, maguta kuuma mûtî wa mare, mînyamû mînungi waro, mbarathi na nyûmbû.

²⁵ Mûthamaki Solomoni aarî na nyomba ngiri inya (4,000) cia mbarathi na ikaari ciacio, na athigari ngiri îkûmi na igîrî (12,000) arîa maathiîcaga matwîte mbarathi. Amwe a athigari acio aamaigire îtûûrarî rîa Jerusalemu kûrîa mûthamaki eekaraga, nao acio engî akîmaiga matûûrarî marîa maaigagwa ikaari cia mbarathi.

²⁶ Solomoni nîke warî mûthamaki mûnene gûkîra athamaki onthe arîa maathanaga kuuma rûnjîrî rwa Farati nginya vûrûrirî wa Afilisiti, na nginya mûvakarî vûrûri wa Misiri.

²⁷ Vîndî îo Solomoni aarî mûthamaki wa Isiraeli, sîlûva yengîvîte Jerusalemu ta mathiga, nayo mîtarakwe yengîvîte ta mîkûyû îrîa îrî Shefela.

²⁸ Mbarathi cia mûthamaki Solomoni ciagûragwa kuuma Misiri na kuuma mavûrûrirî marîa mengî.

Mûthamaki Solomoni Nîwakwire

²⁹ Maûndû mau mengî marîa mûthamaki Solomoni eekire kuuma Kîammbîrîria nginya mûthiia nîmandîke rûganorî rwa mûrathi Nathani, Ûrathirî wa Ahija wa kuuma Shilo, na cionekirî cia mwoni Ido ûvororî wîgiî Jeroboamu mûvîcî wa Nebati.

³⁰ Solomoni nîwathanire Isiraeli kuonthe arî Jerusalemu îvinda rîa mîaka mîrongo îna (40).

³¹ Nîwacokire agîkua na akîthikwa îtûûrarî rîa îthe, Daudi. Nake mûvîcî Rehoboamu agîtuîka mûthamaki vuva wake.