2Maû 8 - ÎVUKU RÎA ÛVORO MWARO

Maûndû marîa Solomoni eekire

¹ Solomoni aatumire hekarû na nyomba yake ya ûthamaki îvinda rîa mîaka mîrongo îîrî (20).

² Nîwacokire agîtuma rîngî matûûra marîa Huramu aamûveere na akîva andû a Isiraeli matûûre kuo.

³ Solomoni nîwatharîkîre vûrûri wa Hamathi Zoba na akîwîgwatîra.

⁴ Nîwatumire îtûûra rîa Tadimoru werûrî, na agîtuma nyomba cia kwigagwa indo matûûrarî marîa aatumire Hamathi.

⁵ Solomoni nîwacokire agîtuma Bethi Horoni ya mwena wa îgûrû na Bethi Horoni ya mwena wa ngurumo. Nîwamairigîre na nthingo, na agîkîra ivingo cia cuuma.

⁶ Nîwatumire rîngî Baalathi na akirigîra matûûra monthe marîa maarî na nyomba cia kwigagwa indo, na matûûra marîa maigîtwe mbarathi na ikaari ciacio. Nîwathiîre na mbere gûtuma kîrîa kîonthe endaga gûtuma Jerusalemu, Lebanoni na kûndû kuonthe kûrîa aathanaga.

⁷ Kûrî andû mataarî Aisiraeli maatigirwe matûûrage vûrûrirî ûcio. Andû acio maarî: Ahiti, Amori, Aperizi, Ahivi, na Ajebusi.

⁸ Andû acio nî arîa mataathirua nî andû a Isiraeli. Mûthamaki Solomoni nîwamatuire a kûrutaga wîra wake wa vinya. Njiarwa cia andû acio itûûraga irutaga wîra wa vinya nginya ûmûnthî.

⁹ Nwatî Solomoni ndaanatua andû a Isiraeli ngombo. Acio maarî athigari a mbaara, anene, anene a ikaari cia mbarathi na athigari arîa maathiîcaga matûîte mbarathi.

¹⁰ Solomoni nîwathuurire atongoria anene magana maîrî ma mîrongo îtano (250) a kûrûngamagîrîra aruti wîra wa mûthamaki.

¹¹ Solomoni nîwathaamirie mûka, mwarî wa mûthamaki wa Misiri kuuma îtûûrarî rîa Daudi akîmûvira nyombarî îrîa aamûtumîrîte. Nîwaugire atîrî, “Mûka wakwa ndagûtûûra nyombarî ya Daudi mûthamaki wa Isiraeli, nîûndû vandû wa vonthe varîa îthandûkû rîa kîrîkanîro Kîam Ngai-Mûnene rîanethîrwa rîrî nî vatheru.”

¹² Solomoni nîwarutîre Ngai-Mûnene matega ma kûvîvua metharî ya kîgongoona îrîa aatumîte îrî kîthakurî gîa hekarû.

¹³ Aarutaga magongoona mîthenya îrîa mîamûre kûringana na ûrîa watho wa Musa waugîte. Mîthenya îo nî: thavatû, karûngamo ka mweri, na vîndî ya irugo ithatû cia wa mwaka, na nîcio: kîrugo Kîam mîgate îtarî mîkîre ndawa ya kwimbia, kîrugo Kîam vîndî ya maketha, na kîrugo gîa tûnyomba.

¹⁴ Solomoni nîwarûthire mûvango wa wîra wa wa mûthenya wa athînjîri-Ngai na Alawi arîa maatethagia athînjîri-Ngai kwina na kûruta wîra wao kûringana na watho wa îthe Daudi. Nîwavangire arangîri a ivingo ikundi na akîmava wîra wa gwîkaragia ivingo cionthe wa mûthenya kûringana na ûrîa Daudi ndungata ya Ngai aathanîte.

¹⁵ Athînjîri-Ngai na Alawi nîmaavingirie maûndû monthe marîa maathîtwe nî Daudi wana ma nyomba irîa ciaigagwa indo.

¹⁶ Ûguo nîguo wîra wonthe ûrîa Solomoni aarî naguo wa gûtuma hekarû ya Ngai-Mûnene wathirire kuuma mûthenya ûrîa mûcingi wayo wambîrîrue. Kwoguo hekarû ya Ngai-Mûnene nîyarîkire.

¹⁷ Mûthamaki Solomoni nîwacokire akîthiî Ezioni-geberi na Elothi, matûûra marîa maarî rûtere rwa îria vûrûrirî wa Edomu.

¹⁸ Mûthamaki Huramu nîwatûmîre Solomoni meri itongoretue nî anene ake na ndungata ciake irîa ciaicî kûthiîrîra îriarî mûno. Nao, marî vamwe na andû a Solomoni nîmaathiîre vûrûrirî wa Ofiri na makîretere Solomoni thaavu ya ûrito wa makîria ma kilo ngiri îkûmi na ithano (15,000).