2Maû 7 - ÎVUKU RÎA ÛVORO MWARO

Hekarû nîyamûrirwe

¹ Rîrîa mûthamaki Solomoni aarîkirie kûvoya, mwaki nîwanyûrûrûkire kuuma îgûrû na ûkîvîvia magongoona na matega marîa maarutîtwe. Naguo riiri wa Ngai-Mûnene nîwecûrire hekarûrî.

² Athînjîri-Ngai nîmaaremirwe nî gûtonya hekarûrî nîûndû nîyecûrîtwe nî riiri wa Ngai-Mûnene.

³ Rîrîa andû a Isiraeli moonire mwaki wanyûrûrûka kuuma îgûrû na riiri wa Ngai-Mûnene ûrî îgûrû rîa hekarû, nîmaaturirie maru na magîturumithia mothiû mao vau vaarîtwe mathiga na makîgooca Ngai-Mûnene makiuga “Ke nî mwaro, wendo wake ûtathiraga nî wa tene na tene.”

⁴ Mûthamaki Solomoni na andû onthe nîmaacokire makîrutîra Ngai-Mûnene magongoona.

⁵ Solomoni nîwarutire ndegwa ngiri mîrongo îîrî na igîrî (22,000), ng'ondu ngiri îgana rîmwe rîa mîrongo îîrî (120,000) irî matega ma thayû. Kwoguo mûthamaki na andû onthe a Isiraeli nîmaamûrire hekarû.

⁶ Athînjîri-Ngai nîmaarûngamire varîa maavangîrîtwe marûngame, nao Alawi makîrûngama magîkumagia Ngai-Mûnene na indo cia nyîmbo irîa mûthamaki Daudi aarûthîte makiugaga atîrî, “Wendo wa Ngai-Mûnene ûtathiraga nî wa tene na tene!” Maainire ûguo wata ûrîa maathîtwe nî Daudi. Athînjîri-Ngai maavuvaga tûrumbeta nao andû onthe a Isiraeli marûngamîte.

⁷ Solomoni nîwamûrire gatagatî ga kîvaro kîrîa kîrî mbere ya hekarû ya Ngai-Mûnene. Arî vau nîwarutire magongoona ma kûvîvua na mathunya ma matega ma thayû, nîûndû metha ya kîgongoona ya gîcango îrîa aatumîte ndîngîavotire kwîganîra matega makûvîvua, ma irio na mathuma ma thayû.

⁸ Solomoni na andû onthe a Isiraeli nîmaacokire magîkûngûîra kîrugo gîa tûnyomba îvinda rîa mîthenya mûgwanja. Kîrugorî kîu kwarî na gîkundi kînene mûno Kîam andû, amwe ao maaumîte mwanyarî wa Hamathi mwena wa rûgûrû, na engî mwena wa îveti mûvakarî wa Misiri.

⁹ Mûthenya wa kanana nîmaagomanire vamwe kûgooca, nîûndû methîrîtwe mathirîtie mîthenya mûgwanja makîamûra metha ya kîgongoona na mîthenya îngî mûgwanja ya kîrugo.

¹⁰ Mûthenya wa mîrongo îîrî na îthatû wa mweri wa mûgwanja, Solomoni nîwerire andû menûke. Nao nîmaakenire nîûndû wa maûndû maro marîa Ngai-Mûnene eekîte Daudi, Solomoni na andû onthe a Isiraeli.

Ngai nîwaumîrîre Solomoni rîngî

¹¹ Solomoni nîwarîkirie gûtuma hekarû na akîrîkia nyomba yake ya ûthamaki na nîwarîkîtie kûrûtha maûndû monthe marîa eecirîtie gwîka ma hekarû na nyombarî yake ya ûthamaki.

¹² Ngai-Mûnene nîwamumîrîre kîrotorî ûtukû na nîwamwîrire atîrî, “Nîmbîguîte îvoya rîaku na nînthuurîte vandû ava vatuîke hekarû yakwa ya kûrutagîrwa magongoona.

¹³ Vîndî îrîa navinga matu mbura ndîkaure, kana natûma ngige irîe irio irîa mûvandîte mîgûndarî, kana natûma mûthiro kûrî andû akwa,

¹⁴ ethîrwa andû akwa arîa metanîtue na rîîtwa rîakwa nîmakaavera, mavoe na magarûrûke matige mîthiîre yao mîcûku, nîngaamegua nîrî îgûrû na nîngaamovera mevia mao na mvonie vûrûri wao.

¹⁵ Nîngagitîra hekarû îno na mbîgue mavoya marîa makaavoya marî ava,

¹⁶ nîûndû nî nthuurîte na ngamûra hekarû îno nîguo rîîtwa rîakwa rîtûûrage kuo na nîndûûra nîmîgitagîra na nîmîendete tene na tene.

¹⁷ Nawe Solomoni, ethîrwa ûkaathiîcaga na mîthiîre ta îrîa yarî na aguo Daudi na ûrûmagîrîre mawatho makwa na wîkage kûringana na ûrîa ngwathîte,

¹⁸ nîngaatûma ûthamaki waku wîvande wata ûrîa naarîkanîre na aguo Daudi atî, Isiraeli nîgûtûûra kwathagwa nî njiarwa ciake.

¹⁹ Nwatî mûngîkaagarûrûka na mûtige kwathîkîra kîrîra na maathani marîa nîmûvete, na mwambîrîrie kûgooca na gûtungatîra ngai ciîngî,

²⁰ nîngaamûruta vûrûrirî ûrîa nîmûvete na ndiganîrie hekarû îno nyamûrîte îtuîke vandû va kûngoocagîra. Andû a mavûrûri monthe nîmakaamîvûthîrîria na mamînyarare.

²¹ “Hekarû îno rîu îrî na ngumo mbaro, nwatî vîndî îo mûndû wa wonthe ûkaavîtûkîrîra varî yo nî akaamaka na aûrie atî, ‘Ngai-Mûnene ekire vûrûri ûyû na hekarû îno ûguo nîkî?’

²² Nao andû nîmakaamacokeria atî, ‘nîûndû nîmaatiganîrie Ngai-Mûnene Ngai wa methe mao ûrîa wamarutire vûrûri wa Misiri. Nîmenyitanîtie na ngai ciîngî, kûigooca na gûitungatîra. Kîu nîkîo gîtûmîte Ngai-Mûnene amaretera mûthiro ûyû wonthe.’ ”