2Maû 6 - ÎVUKU RÎA ÛVORO MWARO

Solomoni nîwarîrie andû

¹ Mûthamaki Solomoni nîwacokire akiuga atîrî, “Ngai-Mûnene, we ûtuîte ûtûûrage ndumarî ndumanu.

² Nwatî nîngûtumîrîte hekarû îrî na riiri, kûrîa ûgaatûûra tene na tene.”

³ Mûthamaki Solomoni nîwavûgûkîre andû onthe a Isiraeli wa marûngamîte na akîmarathima.

⁴ Nîwaugire atîrî, “Kumiani Ngai-Mûnene, Ngai wa Isiraeli! Ke nîavingîtie kîîranîro kîrîa erîîre vava Daudi rîrîa aamwîrire atî,

⁵ ‘Kuuma rîrîa naarutire andû akwa vûrûrirî wa Misiri, ndianathuura îtûûra wanarî rîmwe vûrûrirî wonthe wa Isiraeli kûrîa kûngîtumwa hekarû atî nîguo ngoocagîrwe kuo, kana nthuura mûndû wanarî ûmwe wa gûtongoria andû akwa, Aisiraeli.

⁶ Nwatî rîu nînthuurîte îtûûra rîa Jerusalemu rîtuîke vandû varîa ngaagoocagîrwa na nînthuurîte Daudi atuîke mûtongoria wa andû akwa, Aisiraeli.’ ”

⁷ Solomoni nîwathiîre na mbere kuga atîrî, “Vava Daudi nîwendete gûtuma hekarû ya kûgoocagîra Ngai-Mûnene, Ngai wa Isiraeli,

⁸ nwatî Ngai-Mûnene nîwerire vava Daudi atî, ‘Nîwaro nîûndû nîwagîre na wendi wa kûndumîra hekarû,

⁹ kûnarî ûguo, tîwe ûkaandumîra yo. Mûvîcîguo, mwana wa nthakame yaku nîke ûkaandumîra hekarû.’

¹⁰ “Ngai-Mûnene nîavingîtie kîîranîro gîake kîrîa eeranîre. Nie nînduîkîte mûthamaki wa andû a Isiraeli vuva wa vava Daudi wata ûrîa Ngai-Mûnene eeranîre na nîndumîte hekarû ya kûgoocagîra Ngai-Mûnene, Ngai wa Isiraeli.

¹¹ Kûu hekarûrî nîmbigîte îthandûkû rîa kîrîkanîro rîrî na ivengere cia Maathani ma Ngai-Mûnene marîa aarîkanîre na andû a Isiraeli.”

Îvoya rîa Solomoni

¹² Solomoni nîwacokire akîrûngama mbere ya metha ya kîgongoona na mbere ya andû onthe a Isiraeli arîa maagomanîte na agîûkîrîria njara ciake.

¹³ (Solomoni nîwatumîte vandû vatûgîru va gîcango gatagatî ga kîvaro. Ûraca wa vo warî mita igîrî na cendimita mîrongo îîrî (2.20), wariî wa mita igîrî na cendimita mîrongo îîrî (2.20) na ûraca na îgûrû wa mita îmwe na cendimita mîrongo îthatû (1.30). Nake nîwatwîre na agîturia maru vo andû onthe a Isiraeli arîa maagomanîte makîonaga. Nîwacokire agîûkîrîria njara ciake na îgûrû)

¹⁴ na akîvoya atîrî, “Ngai-Mûnene, Ngai wa Isiraeli, îgûrû na nthî gûtirî Ngai wîngî ta we. We nîûvingagia kîrîkanîro gîaku na andû aku na nîwonanagia wendo waku ûtathiraga kûrî ndungata ciaku irîa ikwathîkagîra na ngoro yonthe.

¹⁵ Nîûvingîtie kîîranîro kîrîa werîre vava Daudi, ndungata yaku. Weranîre na kanyua gaku na we mwene nîûvingîtie maûndû mau na vinya waku.

¹⁶ Rîu we Ngai-Mûnene, Ngai wa Isiraeli, vingia kîîranîro kîrîa werîre vava Daudi ndungata yaku. Wamwîrire atî vîndî cionthe nî gûkethagîrwa kûrî na mûndû kuuma njiarwarî ciake wa gwîkarîra gîtî Kîam ûthamaki Kîam Isiraeli ethîrwa nî igûtûûra ciathîkagîra watho waku ta ûrîa ke eekaga.

¹⁷ Kwoguo, we Ngai-Mûnene, Ngai wa Isiraeli, tûma kîîranîro gîaku na Daudi ndungata yaku kîvinge.

¹⁸ “Nwatî we Ngai, nama nwa ûtûûre gûkû nthî na andû? Taroria, îgûrû, wana îgûrû mûno matuurî ndûngîganîra kuo, kwoguo ûngîvota kwîganîra atîa hekarû îno ndumîte?

¹⁹ Kûnarî ûguo, we Ngai-Mûnene, Ngai wakwa nakûthaitha ûthikîrîrie mavoya makwa nie ndungata yaku na ûmve kîrîa nîrakûvoya.

²⁰ Menyagîrîra hekarû îno ûtukû na mûthenya nîûndû nîweranîre atî gûkû nîkuo ûkaagoocagîrwa. Îgucaga mavoya makwa rîrîa ngûkûvoya mberekerete hekarû îno.

²¹ Îgucaga mavoya makwa, nie ndungata yaku na ma andû aku a Isiraeli rîrîa magûkûvoya merekerete vandû ava. Îgucaga mavoya metû ûrî kûu îgûrû ûtûûraga na ûtûovagîre.

²² “Mûndû angîvîtîria mûndû ûrîa wîngî na avirwe mbere ya metha yaku ya kîgongoona hekarûrî îno na evîtithue,

²³ we Ngai-Mûnene nakûthaitha ûkaathikîrîria ûrî kûu îgûrû na ûtue ciira wa ndungata ciaku. Ûkaaverithia mûndû ûrîa ûkethîrwa avîtîtie na ûkaarekereria mûndû ûrîa ûkethîrwa atarî na mavîtia kûringana na ûthingu wake.

²⁴ “Andû aku a Isiraeli mangîkaavootwa nî nthû ciao nîûndû wa mevia marîa mekîte, mangîgaagûcokerera menyivîtie na makûvoe ûmovere marî hekarûrî îno,

²⁵ ûkeegua mavoya mao ûrî kûu îgûrû. Ûkaamovera mevia mao na ûmacokie vûrûrirî ûrîa wamaveere na ûkîva methe mao.

²⁶ “Vîndî îrîa ûkaavinga matu ma mbura îtige kuura nîûndû wa ûrîa andû makethîrwa makûvîtîrîtie na macoke merire na makûvoe marî na wînyivia merekerete hekarûrî îno,

²⁷ nakûthaitha ûkaamathikîrîria ûrî kûu îgûrû na wovere andû aku a Isiraeli, ndungata ciaku. Ûgaacoka ûmathomithie mîtugo mîaro îrîa magîrîrwe nî kûvingia na ûtûme mbura yure vûrûrirî ûyû waku ûrîa waveere andû aku ûtuîke îgai rîao.

²⁸ “Vîndî îrîa gûkaagîa yûra vûrûrirî ûyû kana milideu, kana ndavaîki, kana ngige, kana igunyû, kana andû matharîkîrwe nî nthû ciao, kana kwîthîrwe na mûthiro, kana mûrimû wa wonthe,

²⁹ mûndû wa wonthe angîkaavoya kana andû aku onthe a Isiraeli makûvoe wa mûndû arî na mathîna make na ruuo rwa ngoro na avoe atambarûkîtie njara ciake erekerete hekarûrî îno,

³⁰ ûkegua mavoya mao ûrî kûu îgûrû. Ûcoke ûmovere nîûndû we, nîwe wicî ngoro cia andû. Ûgeeka kûringana na ûrîa wa mûndû agîrîrwe

³¹ nîguo andû aku magwîtigagîre na makwathîkagîre vîndî cionthe rîrîa magûtûûra vûrûrirî ûyû waveere methe metû.

³² “Vîndî îrîa mûgeni ûtarî ûmwe wa andû aku a Isiraeli agaaûka aumîte vûrûri wa kûraca nîûndû nîeguîte ngumo ya rîîtwa rîaku, vinya waku na ûgitîri waku, aûke gûkûvoya arî hekarûrî îno,

³³ ûkaamwîgua ûrî kûu gwaku îgûrû. Ûcoke ûvingîrie mûgeni ûcio mavoya make nîguo andû onthe a nthî makûmenye na magwîtigîre wata ûrîa andû aku a Isiraeli magwîtigîrîte na mamenye atî hekarû îno ndumîte îtanîtue na rîîtwa rîaku.

³⁴ “Vîndî îrîa andû aku makaathiî kûrûa na nthû ciao, na marî wa kûrîa kuonthe ûkethîrwa ûmavirîte makûvoe merekerete îtûûra rîîrî ûthuurîte na hekarû îno îtanîtue na rîîtwa rîaku,

³⁵ ûkeegua mavoya mao ûrî kûu gwaku îgûrû na îkaamava ûvootani.

³⁶ “Vîndî îrîa andû aku magaakwîvîria nîûndû gûtirî mûndû ûtevagia, nawe ûrakare na ûmarekererie mavootwe nî nthû ciao na matavwe mavirwe vûrûri wîngî ûrî kûraca kana gûkuvî,

³⁷ mangîkeerira na makûvoe makiumbûraga ûrîa mevîtie na makarûtha maûndû macûku marî kûu maavirirwe marî mîgwate,

³⁸ ethîrwa nama nîmakerira na kinyi marî vûrûri ûcio mûgeni na mavoe merekerete vûrûri ûrîa waveere methe mao, îtûûra rîîrî ûthuurîte na hekarû îrîa ndumîte îtanîtue na rîîtwa rîaku,

³⁹ ûkeegua mavoya na mathaithana mao ûrî kûu gwaku îgûrû na ûmovere mevia mao monthe.

⁴⁰ “Rîu we Ngai wakwa, tûrorie na ûthikîrîrie mavoya marîa tûkûvoya tûrî ava.

⁴¹ Rîu Ngai-Mûnene, Ngai nîngûkûthaitha ûûke ûtonye vandû ava tûgûtumîrîte na twigîte îthandûkû rîaku rîa kîrîkanîro rîrîa rîonanagia vinya waku. We Ngai-Mûnene, Ngai, nakûvoya atî rîrîa athînjîri-Ngai aku manîrîra ûvonokio waku, andû aku amûre makenage nî maûndû maku maro.

⁴² Ûûi Ngai-Mûnene, Ngai, ndûkaarege mûthamaki ûrîa we ûthuurîte. Ririkana wendo ûtathiraga ûrîa warî naguo kûrî ndungata yaku Daudi.”