2Maû 5 - ÎVUKU RÎA ÛVORO MWARO

¹ Ûguo nîguo mûthamaki Solomoni aarîkirie wîra wonthe wa hekarû. Nîwacokire akîrete indo cionthe irîa îthe Daudi aamûrîrîte Ngai-Mûnene na agîciga tûnyombarî twa hekarû twa kwigwa indo. Indo icio ciarî sîlûva, thaavu na indo cionthe cia hekarû.

Îthandûkû rîa kîrîkanîro nîrîaretirwe hekarûrî

² Mûthamaki Solomoni nîwacokire akîgomania atongoria onthe a mîvîrîga na a mbarî cia andû a Isiraeli kûu îtûûrarî rîa Jerusalemu; nîguo magîre îthandûkû rîa kîrîkanîro Kîam Ngai-Mûnene kuuma Zayuni, îtûûra rîa Daudi.

³ Nao andû onthe a Isiraeli nîmaagomanire mbere ya mûthamaki vîndî ya kîrugo gîa tûnyomba mwerirî wa mûgwanja.

⁴ Rîrîa atongoria onthe a Isiraeli maagomanire vamwe, Alawi nîmoocire îthandûkû rîa kîrîkanîro,

⁵ na makîivira hekarûrî. Athînjîri-Ngai na Alawi nîmaacokire magîkuua îgema rîa Ngai-Mûnene, na indo cionthe irîa ntheru irîa ciarî îgemarî, na makîivira hekarûrî.

⁶ Mûthamaki Solomoni na andû onthe a Isiraeli nîmaagomanire mbere ya îthandûkû rîa kîrîkanîro na makîruta îgongoona rîa ng'ondu na ng'ombe nyîngî itangîatarîkire.

⁷ Kwoguo athînjîri-Ngai nîmaakuuire îthandûkû rîa kîrîkanîro na makîrîvira hekarûrî makîrîtonyia vandû varîa vatheru mûno varîa vaarûthîtwe nîûndû wa rîo rungu rwa akerubi.

⁸ Mathagu ma akerubi maambararîte magakunîkîra îthandûkû rîa kîrîkanîro wana mîtî ya kûrîkuua.

⁹ Mîtî ya gûkuua îthandûkû rîa kîrîkanîro yarî mîraca, na mîthiia yayo nîyonagwa nî mûndû arûngamîte vandû varîa vatheru mbere ya varîa vatheru mûno, nwatî ndîngîonekire nî mûndû arî vandû vengî. Mîtî îo îrî vo nginya ûmûnthî.

¹⁰ Îthandûkûrî rîa kîrîkanîro gûtiarî kîndû kîngî tiga ivengere igîrî cia mathiga irîa ciekîrirwe kuo nî Musa marî Kîrîmarî gîa Sinai. Rîrîa andû a Isiraeli maaumaga Misiri, vau Kîrîmarî gîa Sinai nîvo Ngai-Mûnene aarûthîre kîrîkanîro na andû a Isiraeli.

Riiri wa Ngai-Mûnene

¹¹ Athînjîri-Ngai onthe a ikundi cionthe arîa maagomanîte kuo nîmaaumire vandû varîa vatheru meyamûrîte na metheretie.

¹² Alawi arîa maarî aini a nyîmbo na nîo Asafu, Hemani, Jeduthuni, anake ao vamwe na andû ao nîmaarûngamire mwena wa îrathîro wa metha ya kîgongoona mekîrîte nguo mbaro. Nîmaavûraga indo cia kwina ta: ithaani irîa iringithanagua na ngita. Athînjîri-Ngai îgana rîmwe rîa mîrongo îîrî (120) nîmaarûngamire vamwe nao makîvuvaga tûrumbeta.

¹³ Aini a nyîmbo, ngita, ithaani irîa iringithanagua, tûrumbeta na indo irîa ciîngî cia kwina nîmaagwatanîre na makina na mûgambo ûmwe magîkumia Ngai-Mûnene na kûmûcokeria ngatho makiugaga atîrî, “Kumiani Ngai-Mûnene nîûndû nî mwaro, wendo wake ûtathiraga nî wa tene na tene.” Hekarû ya Ngai-Mûnene nîyecûrirwe nî îtu,

¹⁴ na athînjîri-Ngai matingîavotire kûthiî na mbere na wîra wao nîûndû hekarû nîyecûrirwe nî ûkengu wa riiri wa Ngai-Mûnene.