2Maû 4 - ÎVUKU RÎA ÛVORO MWARO

Indo cia hekarû

¹ Mûthamaki Solomoni nîwatumire metha ya kîgongoona ya gîcango ya ûraca wa mita kenda (9), na wariî wa mita kenda (9). Ûraca na wariî wayo nîcieganene. Naguo ûraca wayo na îgûrû warî wa mita inya na cendimita mîrongo îtano (4.50).

² Nîwacokire agîtuma îtangi rîa manjî rîa gîcango. Îtangi rîu rîarî rîa ûrikîru wa mita igîrî na cendimita mîrongo îîrî (2.20), wariî wa mita inya na cendimita mîrongo îna na inya (4.44) na mûthiûrûrûko warîo warî wa mita îkûmi na ithatû na cendimita mîrongo îîrî (13.20).

³ Ngurumo ya rûrengerero rwa îtangi mwena wa nja kwagemetue na mîvari îîrî ya mîvuanano ya ndegwa îrîthiûrûrûkîrîtie. Mîvari îo ya ndegwa yanyitanîte vamwe na îtangi.

⁴ Narîo îtangi rîekarîrîte mîvuano ya ndegwa îkûmi na igîrî cia gîcango. Ndegwa ithatû ciaroretie mwena wa rûgûrû, îthatû mwena wa îthûîro, îthatû mwena wa îveti, na îthatû mwena wa îrathîro.

⁵ Ûtungu wa mîena ya îtangi rîu warî wa cendimita mîrongo mûgwanja na ithano (75), naruo rûrengo rwarîo rwekariî ta rwa gîkombe, rwekûnjîte ta makoni ma maûa. Îtangi rîu nîrîagîcaga lita ngiri mîrongo îtandatû (60,000) cia manjî.

⁶ Mûthamaki Solomoni nîwacokire akîrûtha tûraî îkûmi twa kwîthambîria. Nîwaigire tûraî tûtano mwena wa îveti na tûtano mwena wa rûgûrû. Tûraî tûu twatûvûthagîra na kûthambîria indo cia matega ma kûvîvua, nwatî manjî ma îtangi maavûthagîrwa nî mûthînjîri-Ngai kwîthambia namo.

⁷ Nîwarûthire indo îkûmi cia kwigîrîrwa taa irûthîtwe na thaavu wata ûrîa gwataarîrîtue na agîciga hekarûrî. Ithano mwena wa îveti na ithano mwena wa rûgûrû.

⁸ Nîwacokire agîtuma metha îkûmi na agîciga hekarûrî. Nîwaigire metha ithano mwena wa îveti na icio ciîngî ithano agîciga mwena wa rûgûrû. Nîwacokire akîrûtha mbakûri îgana rîmwe cia thaavu.

⁹ Nîwarûthire kîvaro Kîam athînjîri-Ngai na akîrûtha kîvaro kîngî kînene kîrî na mîrango ya kîo. Nîwavakire mîrango ya kîvaro gîcango,

¹⁰ na akiga îtangi rîu rîa gîcango mûthiiarî wa hekarû gatagatî ka mwena wa îveti na wa îrathîro.

¹¹ Huramu nwa warûthire nyûngû, iciko na mbakûri. Kwoguo Huramu nîwarîkirie wîra wa gûtuma indo cia hekarû ûrîa aarutagîra mûthamaki Solomoni. Wîra ûcio warî:

¹² Itugî igîrî; ciongo igîrî irûthîtwe ta mbakûri irî îgûrû rîa itugî, neti irîa ciatumîtwe ta mîkathî na ciaigîrîrîtwe ciongorî icio irûthîtwe ta mbakûri, irîa ciarî îgûrû rîa itugî,

¹³ na nyamû magana mana (400) cia gîcango ciîkariî ta ngûngûmanga. Nyamû icio ciatumîtwe ta neti irî ciongorî cia itugî na ciavangîtwe mîvari îîrî netirî îmwe, wa neti îmwe yakunîkaga kîongo kîmwe Kîam gîtugî.

¹⁴ Tûraî îkûmi, na wa karaî vandû va gûkaigîrîra.

¹⁵ Îtangi na mîvuano îkûmi na îîrî ya ndegwa îrî rungu rwa îtangi.

¹⁶ Nyûngû, iciko, mînyoge, na indo cionthe cia hekarû ya Ngai-Mûnene, Huramu aairûthire na gîcango îrî ntherie wata ûrîa mûthamaki Solomoni aathanîte.

¹⁷ Mûthamaki aaugire indo icio irûthîrwe kûndû kûrîa kwarî na mûthetu wa yûmba gatagatî ka Sukothu na Zereda.

¹⁸ Nîwarûthire indo nyîngî mûno na gîcango na gûtirî mûndû wamenyire ûrîa ûrito wa gîcango îo wegana.

¹⁹ Kwoguo mûthamaki Solomoni nîwarûthire indo cionthe irîa ciarî hekarûrî na nîcio: Metha ya kîgongoona ya thaavu, metha cia kwigwa mîgate îrîa yamûrîrîtwe Ngai,

²⁰ indo cia kwigîrîrwa taa, taa cia thaavu ntheri irîa ciakanaga mbere ya vandû varîa vatheru mûno kûringana na ûrîa gwataarîrîtue,

²¹ maûa, taa, ngîo cia gûkuua makara marî na mwaki,

²² tûnyamû twa kûnyitîrîra ndambi, ûbani, mbakûri, na mbakûri cia gwîkîrwa ûbani. Indo icio cionthe ciarûthirwe na thaavu ntheri. Nayo mîrango ya hekarû, mîrango ya varîa vatheru mûno na mîrango ya tûnyomba, yonthe yavakîtwe thaavu.