2Maû 36 - ÎVUKU RÎA ÛVORO MWARO

Jehoahazi mûthamaki wa Juda

¹ Andû a vûrûri wa Juda nîmaacokire makîthuura Jehoahazi, mûvîcî wa Josia na makîmûtua mûthamaki wa Jerusalemu vuva wa îthe.

² Jehoahazi aatuîkire mûthamaki wa Juda arî na ûkûrû wa mîaka mîrongo îîrî na îthatû (23) na nîwathanire arî Jerusalemu îvinda rîa mîeri îthatû (3).

³ Neko, mûthamaki wa Misiri nîwacokire akîmûnyita, akîmuruta Jerusalemu na nîwatûmire vûrûri wa Juda ûrîve mwîgana wa gooti ya kilo ngiri ithatû na magana mana (3,400) cia sîlûva, na kilo mîrongo îthatû na inya (34) cia thaavu.

⁴ Neko, mûthamaki wa Misiri nîwatuire Eliakimu, mûrwang'ina na Jehoahazi mûthamaki wa Juda na Jerusalemu. Nîwacokire akîgarûra rîîtwa rîake agîcoka gwîtagwa Jehoiakimu. Nwatî Neko nîwocire Jehoahazi, mûrwang'ina na Eliakimu na akîmûvira Misiri.

Jehoiakimu mûthamaki wa Juda

⁵ Jehoiakimu aatuîkire mûthamaki wa Juda arî na ûkûrû wa mîaka mîrongo îîrî na îtano (25) na nîwathanire arî Jerusalemu îvinda rîa mîaka îkûmi na ûmwe (11). Nîwekire maûndû macûku mbere ya Ngai-Mûnene, Ngai wake.

⁶ Nebukadinezarû, mûthamaki wa Babuloni nîwamûtharîkîre na akîmûnyita akîmûvira Babuloni amwovete na mvîngû.

⁷ Nebukadinezarû wana nîwakuuire indo imwe kuuma hekarûrî na akîivira Babuloni na agîciga gwake nyomba.

⁸ Maûndû mengî monthe marîa Jehoiakimu eekire arî mûthamaki, maûndû macûku marîa eekire na mavîtia marîa oonirwe namo, nîmandîke îvukuurî rîa ng'ano cia athamaki a Isiraeli na a Juda. Nake mûvîcî Jehoiakini nîwatuîkire mûthamaki vuva wake.

Jehoiakini mûthamaki wa Juda

⁹ Jehoiakini aatuîkire mûthamaki wa Juda arî na ûkûrû wa mîaka îkûmi na înana (18) na nîwathanire arî Jerusalemu îvinda rîa mîeri îthatû (3) na mîthenya îkûmi (10). Wanake nîwekire maûndû macûku mbere ya Ngai-Mûnene.

¹⁰ Îvinda rîa mvevo rîa mwaka, mûthamaki Nebukadinezarû nîwatûmanire Jehoiakini agîrwe na avirwe Babuloni vamwe na indo cia goro cia hekarû. Nebukadinezarû nîwacokire agîtua Zedekia, mûrwang'ina na Jehoiakini mûthamaki wa Juda na Jerusalemu.

Zedekia mûthamaki wa Juda

¹¹ Zedekia aatuîkire mûthamaki arî na ûkûrû wa mîaka mîrongo îîrî na ûmwe (21) na aathanire arî Jerusalemu îvinda rîa mîaka îkûmi na ûmwe (11).

¹² Nîwekire maûndû macûku mbere ya Ngai-Mûnene, Ngai wake na ndaarî na wînyivia mbere ya mûrathi Jeremia ûrîa waragia ndûmîrîri kuuma kûrî Ngai-Mûnene.

¹³ Zedekia nîwareganire na mûthamaki Nebukadinezarû ûrîa watûmîte evîte na rîîtwa rîa Ngai atî ndakaaregana nake. Nîwaûmirie kîongo na akîrega gûcokerera Ngai-Mûnene, Ngai wa Isiraeli.

¹⁴ Athînjîri-Ngai na atongoria a andû a Juda nîmeekire maûndû macûku ma kûgooca ngai cia mîvuanano ta marîa meekagwa nî mavûrûri marîa mengî. Kwoguo nîmaagwatirie hekarû ya Ngai-Mûnene mûgiro, îrîa ke mwene aamûrîte kûu Jerusalemu.

Kûgwa kwa Jerusalemu

¹⁵ Ngai-Mûnene, Ngai wa methe mao nîwatûmanîte kûrî o maita meengî kûvîtûkîra kûrî anjaama ake, nîûndû nîwamegucagîra ntha wa vamwe na hekarû yake.

¹⁶ Nwatî andû a Juda nîmaathiîre na mbere kûthekerera anjaama ake na kwira ndûmîrîri yake na kûnyûrûria arathi ake nginya Ngai-Mûnene akîrakara nî andû ake mûno ûndû atangîamarekeere.

¹⁷ Kwoguo, Ngai-Mûnene nîwatûmire mûthamaki wa Akalidei amatharîkîre. Nao Akalidei nîmaaûragire andû ao arîa maarî ethî marî hekarûrî. Matiegucagîra andû ntha wana ethîrwa arî mûndû mwîthî kana mûndûmûka, mûndûmûrûme mûkûrû kana ûrîa mûrwaru. Ngai-Mûnene nîwamarekererie onthe kûrî mûthamaki wa Akalidei.

¹⁸ Mûthamaki nîwakuire indo cionthe cia hekarû irîa ciarî nene na nini na mûthithû wa wayo, ûtonga wa mûthamaki na anene ake, cionthe akîivira Babuloni ake.

¹⁹ Mûthamaki wa Akalidei na athigari ake a mbaara nîmaavîvirie hekarû, makîomomora rûthingo rwa îtûûra rîa Jerusalemu, makîvîvia nyomba cionthe cia mûthamaki na magîcûkangia indo cionthe cia goro irîa ciarî kuo.

²⁰ Andû a Juda arîa maatigarire nîmaavirirwe îthamîriorî Babuloni na magîtuîka ndungata cia mûthamaki wa Babuloni na njiarwa ciake. Nîmaatûûrire kûu marî ngombo nginya rîrîa kwagîîre na ûthamaki wa Perisia.

²¹ Ûguo nîguo kwavingirue ûrîa Ngai-Mûnene aarîtie kûvîtûkîra mûrathi Jeremia atî, “Vûrûri ûgaatigwa ûrî mûtheri îvinda rîa mîaka mîrongo mûgwanja (70) nîguo ûgîe na îvinda rîa kûvurûka kûringana na mavinda ma thavatû marîa ûtaavurûkîte.”

Mûthamaki Cairasi nîwathanire Ayahudi macoke kwao

²² Mwakarî wa mbere Cairasi atuîka mûthamaki wa Perisia, nîguo ciugo irîa Ngai-Mûnene aaririe kûvîtûkîra kûrî Mûrathi Jeremia ivinge, Ngai-Mûnene nîwamwathire anîrîre vûrûrirî wake wonthe na andîke atîrî,

²³ “Cairasi, mûthamaki wa Perisia augîte atî: Ngai-Mûnene, Ngai wa îgûrû nîanduîte mûthamaki wa nthî yonthe na nî anthuurîte nîmûtumîre hekarû îtûûrarî rîa Jerusalemu vûrûrirî wa Juda. Kwoguo mue muonthe arîa mûrî a Ngai-Mûnene gatagatîrî kenyu, thiîni Jerusalemu na Ngai wenyu aroîthîrwa namue.”