2Maû 35 - ÎVUKU RÎA ÛVORO MWARO

Josia nîwakûngûîre pasaka

¹ Mûthamaki Josia nîwakûngûîre pasaka ya Ngai-Mûnene arî Jerusalemu. Nîmaathînjire ndûrûme ya pasaka mûthenya wa îkûmi na îna wa mweri wa mbere.

² Nîwathuurire athînjîri-Ngai na akîmava wîra ûrîa maagîrîrwe nî kûruta hekarûrî na akîmaûmîrîria wîrarî ûcio.

³ Nîwerire Alawi arîa maathomithagia andû onthe a Isiraeli na maamûrîrîtwe Ngai-Mûnene atîrî, “Igani îthandûkû rîa kîrîkanîro kîtheru hekarûrî îrîa Solomoni mûvîcî wa Daudi, mûthamaki wa Isiraeli aatumire. Mûtikaarîkuue kuuma gûkû kûthiî kûndû kwîngî na ituro cienyu rîngî. Rîu tungatagîrani Ngai-Mûnene, Ngai wenyu na andû ake a Isiraeli.

⁴ Rutagani wîra kûringana na mbarî cienyu na ikundi cienyu, wata ûrîa Daudi, mûthamaki wa Isiraeli na mûvîcî Solomoni maathanire.

⁵ Rûngamagani varîa vatheru kûringana na nyomba cia andû enyu arîa matarî athînjîri-Ngai, na wa mûndû ûmwe arûngamagîrîre mbarî îmwe ya Alawi.

⁶ Thînjani ndûrûme ya pasaka na mwîtherie, na mûmîvarîrîrie nîûndû wa andû acio engî enyu nîguo makaavingia maûndû marîa Ngai-Mûnene aaririe na njîra ya Musa.”

⁷ Mûthamaki Josia nîwarutire kuuma ndîthiarî yake tûgondu na twori ngiri mîrongo îthatû (30,000), ndegwa ngiri ithatû (3,000) nîûndû wa andû arîa maarî vo irî matega ma pasaka.

⁸ Anene ake wa nao nîmaarutire iveo ciao kûrî andû, athînjîri-Ngai na Alawi na njîra ya kwîyendera. Hilikia, Zakaria na Jehieli, arîa maarî arûngamîrîri a hekarû, nîmaaveere athînjîri-Ngai twori na tûtûrûme ngiri igîrî na magana matandatû (2,600), ndegwa magana mathatû (300) irî matega ma pasaka.

⁹ Nake Konania na aa mûrwang'ina Shemaia, Nethaneli, Hashabia, Jeieli, Jozabadi na atongoria a Alawi, nîmaavecanire tûgondu na twori ngiri ithano (5,000) na ndegwa magana matano (500) kûrî Alawi irî matega ma pasaka.

¹⁰ Vîndî îrîa maûndû monthe ma pasaka maavangirue, athînjîri-Ngai na Alawi nîmeekarire wa gîkundi vandû vao wata ûrîa mûthamaki aathanire.

¹¹ Nîmaaûragire ndûrûme cia pasaka, nao athînjîri-Ngai magîoca nthakame ya ndûrûme icio na makîmîminjaminja metharî ya kîgongoona, na Alawi makîithînja.

¹² Nîmaacokire makîgaa nyamû cia matega ma kûvîvua kûringana na nyomba cia andû ao nîguo marutîre Ngai-Mûnene matega wata ûrîa kwandîkîtwe îvukuurî rîa Musa. Ûguo nwaguo maagaanirie wana ndegwa.

¹³ Alawi nîmookirie nyama cia ndûrûme cia pasaka na mwaki kûringana na watho, magîcamûra nyama cia magongoona marîa matheru na nyûngû, thavuria na tûraî twa gûkarangîra. Nîmaacokire makîigaîra andû arîa mataarî athînjîri-Ngai na îvenya.

¹⁴ Vuva wa ûguo, Alawi nîmaavarîrîrie nyama ciao o ene na cia athînjîri-Ngai, nîûndû athînjîri-Ngai njiarwa cia Aroni maarî na wîra wa kûruta matega ma kûvîvua na ma nyama irîa noru nginya ûtukû.

¹⁵ Nao aini a nyîmbo kuuma mbarî ya Asafu nîmeekarîte varîa maathîtwe mekarage nî mûthamaki Daudi, Asafu, Hemani, na Jeduthuni ûrîa warî mwoni maûndû ma mûthamaki. Nao arangîri a ivingo mekarîte ivingorî irîa mekaragia. Gûtiarî na vata wao maume wîrarî nîûndû Alawi acio engî nîmaamavarîrîtie pasaka.

¹⁶ Kwoguo wîra wonthe wa kûgooca Ngai-Mûnene, wa gûkûngûîra pasaka na kûrutîra matega ma kûvîvua metharî ya kîgongoona, warutirwe mûthenya ûcio wata ûrîa mûthamaki Josia aathanîte.

¹⁷ Nao andû a Isiraeli arîa maagomanîte vau nîmaakûngûîre pasaka kavinda kau na kîrugo Kîam mîgate îtarî mîkîre ndawa ya kwimbia îvinda rîa mîthenya mûgwanja (7).

¹⁸ Gûtirî pasaka ta îo yarî yanakûngûîrwa kuuma vîndî ya mûrathi Samueli kûu Isiraeli. Gûtirî mûthamaki wa Isiraeli mbererî wanakûngûîra pasaka ta îo yakûngûîrwe nî mûthamaki Josia, athînjîri-Ngai, Alawi na andû onthe a Juda na Isiraeli arîa maarî vo, na andû arîa matûûraga Jerusalemu.

¹⁹ Pasaka îo yakûngûîrwe mwakarî wa îkûmi na înana (18) kuuma Josia atuîka mûthamaki.

Mûthiia wa wathani wa Josia

²⁰ Mûthamaki Josia arîkia gwîka maûndû mau monthe nîûndû wa hekarû, Neko, mûthamaki wa Misiri nîwathiîre na athigari ake a mbaara makatharîkîre îtûûra rîa Karikemishi rîrîa rîarî vakuvî na rûnjî rwa Farati. Nake Josia nîwathiîre kûrûa nake.

²¹ Nwatî Neko nîwatûmire anjaama ake kûrî Josia makamûrie atîrî, “Mûthamaki wa Juda, nie nawe tûrarutana kû? Tîwe nîratharîkîra, nwatî nî nthû ciakwa nîratharîkîra, na Ngai ambathîte mbîke ûguo na îvenya. Tiga kûregana na Ngai nîûndû arî mwena wakwa na ethîrwa tî ûtigana nanie nî agûkûûraga.”

²² Kûnarî ûguo, Josia ndaatiga kûtharîkîra Neko, mûthamaki wa Misiri. Nîwaregire kûthikîrîria ûrîa Ngai aaugaga na njîra ya mûthamaki Neko. Kwoguo nîwerigaririe nîguo ndakamenyekane na nîwathiîre Megido kûndû kûrîa kwaraganu kûrûa.

²³ Nao andû arîa maarûaga na mîguî nîmaarathire mûthamaki Josia arî mbaararî, na nîwerire ndungata ciake atîrî, “Ndutani ava nîûndû nînagurarua mûno!”

²⁴ Kwoguo ndungata ciake nîciamûrutire gîkaarirî gîake Kîam mbarathi na makîmwîkîra gîkaarirî kîngî gîake na makîmûvira Jerusalemu. Nîwakwire na akîthikwa mbîrîrarî irîa ciathikagwa athamaki. Andû onthe a Juda na a Jerusalemu nîmaacakaîre gûkua kwa Josia.

²⁵ Mûrathi Jeremia nîwatungire rwîmbo rwa gûcakaîra Josia. Andû onthe arîa mainaga nîmaririkanaga na magakumia Josia nyîmborî ciao cia macakaya nginya ûmûnthî. Watuîkire mûtugo wa andû a Isiraeli wa kwinaga nyîmbo icio vîndî ya macakaya. Nyîmbo icio nîmandîke îvukuurî rîa Macakaya.

²⁶ Maûndû mengî monthe marîa Josia eekire arî mûthamaki na ciîko ciake mbaro kûringana na ûrîa kwandîkîtwe wathorî wa Ngai-Mûnene,

²⁷ na ciîko ciake kuuma Kîammbîrîria nginya mûthiia nîmandîke îvukuurî rîa ng'ano cia athamaki a Isiraeli na a Juda.