2Maû 34 - ÎVUKU RÎA ÛVORO MWARO

Josia, mûthamaki wa Juda

¹ Josia aatuîkire mûthamaki wa Juda arî na ûkûrû wa mîaka înana (8) na aathanire îvinda rîa mîaka mîrongo îthatû na ûmwe (31) arî Jerusalemu.

² Josia nîwekire maûndû marîa maakenagia Ngai-Mûnene na nîwarûmîrîre mîthiîre ta îrîa yarî na îthe Daudi na nîwarûmîrîre mawatho monthe ma Ngai-Mûnene.

Josia nîwareganire na ûgooci wa ngai ciîngî

³ Mwakarî wa kanana (8) kuuma Josia atuîka mûthamaki wa Juda, vîndî wa îo arî mwanake, nîwambîrîrie kûgooca Ngai wa îthe Daudi. Mwakarî wa îkûmi na îîrî (12) Josia arî mûthamaki, nîwambîrîrie gûcûkangia kûrîa kwagoocagîrwa mîvuanano, Ashera, ngai ya mûndûmûka na mîvuanano îrîa îngî yonthe kûu Juda na Jerusalemu.

⁴ Nîwathire metha cia Baali cia magongoona kûrîa aagoocagîrwa imomomorwe, metha cia magongoona cia kûvîvîrua ûbani irîa ciarî vakuvî nacio na akiunanga mîvuanano ya Ashera na mîvuanano îngî yonthe na magîcoka makîmîthîa îgîtuîka rûkûngû na makîrûnyagia mbîrîrarî cia andû arîa maairutîrîte magongoona.

⁵ Nîwavîvîrie mavîndî ma athînjîri-Ngai a ngai icio îgûrû rîa metha icio ciao cia magongoona. Ûguo nîguo Josia eekire nîguo athiririe Juda na Jerusalemu kuuma ûgoocirî wa mîvuanano.

⁶ Nîwekire wa ûguo matûûrarî ma Manase, Efiraimu, Simioni, kûthiî nginya Nafutali na kûndû kûrîa kwomomoretwe vakuvî na matûûra mau.

⁷ Nîwaunangire metha cia magongoona na mîvuanano ya Ashera na akîithîa igîtuîka mûtutu. Nîwacokire agîtemanga metha cia magongoona cia kûvîvîrua ûbani vûrûrirî wonthe wa Isiraeli na agîcoka Jerusalemu.

Îvuku rîa watho nîrîonekire

⁸ Mwakarî wa îkûmi na înana (18) Josia arî mûthamaki, nîwarîkîtie kûtheria vûrûri wa Juda wana hekarû. Nîwatûmire Shafani mûvîcî wa Azalia, Maaseia mûnene wa îtûûra na Joa mûvîcî wa Joahazu ûrîa warî karani mathiî magatume rîngî hekarû ya Ngai-Mûnene, Ngai wake.

⁹ Nîmaathiîre kûrî Hilikia, Mûthînjîri-Ngai mûnene na makîmûvirîra mbeca irîa Alawi arîa maarî arangîri a ivingo maûnganîtie kuuma kûrî andû a Manase, Efiraimu na kuuma kûrî andû onthe a Isiraeli arîa maatigarîte, kuuma kûrî andû onthe a Juda, Benjamini na andû arîa maatûûraga Jerusalemu.

¹⁰ Nîmaacokire makînenganîra mbeca icio kûrî andû arîa maarûngamagîrîra wîra wa gûtuma hekarû rîngî kûrîa yacûkangîtue, nao arûngamîrîri acio makîinenganîra kûrî andû arîa maatumire hekarû rîngî.

¹¹ Nîmaainenganîre kûrî mavundi ma mbaû na atumi a nyomba cia mathiga nîguo magûre mathiga na mbaû cia kûmînyitithania rîngî kûrîa athamaki a Juda maarekereretie kwomomoka.

¹² Andû acio nîmaarutire wîra ûcio waro mûno. Arûngamîrîri ao maarî Jahathi na Obadia, Alawi a mbarî ya Merari, Zakaria na Meshulamu a mbarî ya Kohathu. Alawi onthe maarî na wara wa kûvûûra indo cia kwina nyîmbo,

¹³ na nîo maarûngamagîrîra andû arîa maakuuaga mîrigo na arîa maarutaga mawîra ma mîthemba yonthe. Alawi amwe maarî andîki, atongoria na arangîri a ivingo.

¹⁴ Vîndî îrîa Alawi maarutaga mbeca irîa ciavirîtwe hekarûrî, mûthînjîri-Ngai Hilikia nîwonire îvuku rîa Watho wa Ngai-Mûnene rîrîa rîavecanîtwe kûvîtûkîra kûrî Musa.

¹⁵ Hilikia nîwerire Shafani, mwandîki atîrî, “Nînona îvuku rîa Watho hekarûrî.” Nake Hilikia nîwanengere Shafani îvuku rîu.

¹⁶ Shafani nîwocire îvuku rîu, akîrîvirîra mûthamaki na akîmwîra atîrî, “Ndungata ciaku nîiraruta wîra wonthe ûrîa waiveere.

¹⁷ Nîirutîte mbeca irîa ciarî hekarûrî na ikainenganîra kûrî arûngamîrîri na aruti wîra.”

¹⁸ Shafani, karani nîwacokire akîra mûthamaki rîngî atîrî, “Hilikia, mûthînjîri-Ngai nî aranengeere îvuku.” Shafani nîwacokire akîthomera mûthamaki îvuku rîu.

¹⁹ Rîrîa mûthamaki eegwire ciugo cia watho, nîwatembûrangire nguo ciake nî kwîgua kîeva.

²⁰ Nîwacokire akîatha Hilikia, Ahikamu mûvîcî wa Shafani, Abudoni mûvîcî wa Mika, Shafani, karani na Asaia ndungata ya mûthamaki atîrî,

²¹ “Thiîni mûkambûrîrie ûtaaro kûrî Ngai-Mûnene na nîûndû wa andû arîa matigarîte Isiraeli na Juda, ûvoro wîgiî ciugo cia îvuku rîîrî rîronekire. Ngai-Mûnene nîarakarîte nîtue nîûndû methe metû matiathîkîra Ngai-Mûnene, matieka kûringana na maûndû monthe marîa mandîke îvukuurî rîîrî.”

²² Kwoguo Hilikia vamwe na andû arîa mûthamaki aatûmîte nîmaathiîre kûrî mûndûmûka mûrathi wetagwa Hulida mûka wa Shalumu, mûvîcî wa Tokihathi, nake Takihathi aarî mûvîcî wa Hasira, mûmenyereri wa nguo irîa ciatûmagîrwa hekarûrî. Hulida aatûûraga Jerusalemu îtûûrarî rîa kaîrî. Nao nîmaamwîrire maûndû marîa meekîkîte.

²³ Nake nîwamerire atîrî, “Ngai-Mûnene, Ngai wa Isiraeli augîte: thiîni mwîre mûndû ûcio ûramûtûmire kûrî nie atî,

²⁴ Ngai-Mûnene, Ngai augîte nîakûrete maûndû macûku gûkû Jerusalemu na kûrî andû arîa matûûraga kuo. Nîngaatûma irumi cionthe irîa mandîke îvukuurî rîrîa rîathomerwe mûthamaki wa Juda ivinge.

²⁵ Nîûndû nîmaareganire nanie na makîvîvîria ngai ciîngî ûbani. Nîmatûmîte ndakare nîûndû wa maûndû mau monthe mekîte. Kwoguo marakara makwa nîmagûkinya Jerusalemu na tîmathira.

²⁶ Nwatî ûvoro wîgiî mûthamaki wa Juda ûrîa wamûtûmire mûgatuîrie ûvoro kûrî Ngai-Mûnene mûkamwîre Ngai-Mûnene Ngai wa Isiraeli augîte atî: îgûrû rîgiî ciugo irîa mûregwire,

²⁷ nîûndû nîûreririre na wenyivia mbere ya Ngai rîrîa ûregwire ciugo ciake ciîgiî kûndû gûkû na andû arîa matûûraga kuo, nîûrenyivirie mbere yakwa, na mwatembûranga nguo ciaku nîûndû wa kîeva na ûkîndîrîra, wananie nînegua mavoya maku.

²⁸ Kwoguo, nîngaatûma ûkue na ûthikwe na thayû. Ndûkoona mathîna monthe marîa ngaareta vûrûrirî ûyû na kûrî andû arîa matûûraga kuo.” Nao anjaama acio maatûmîtwe nîmaacokirie ndûmîrîri îo kûrî mûthamaki Josia.

Josia nîwarûthire kîrîkanîro gîa kwathîkîra Ngai-Mûnene

²⁹ Mûthamaki Josia nîwetire atongoria onthe a Juda na a Jerusalemu magomane vamwe.

³⁰ Nîwathiîre hekarûrî arî vamwe na andû onthe a Juda na andû arîa matûûraga Jerusalemu, athînjîri-Ngai, Alawi na andû onthe kuuma ûrîa warî îgweta mûno kinya ûrîa ûtaarî îgweta. Mûthamaki nîwathomire maûndû monthe marîa maarî îvukuurî rîa kîrîkanîro rîrîa rîonekete hekarûrî andû onthe makîgucaga.

³¹ Mûthamaki nîwarûngamire vandû vake na akîrûtha kîrîkanîro mbere ya Ngai-Mûnene, atî akaathîkagîra Ngai-Mûnene na avingagie maathani make, mawatho na matuîro ma ciira na ngoro yake yonthe na mwoyo wake wonthe, na ageekaga wata ûrîa ciugo irîa ciandîkîtwe îvukuurî rîa kîrîkanîro ciugîte.

³² Mûthamaki nîwacokire akîra andû onthe arîa maarî Jerusalemu na Benjamini wanao mavingagie kîrîkanîro. Nao andû a Jerusalemu nîmaatûûrire marûmagîrîra kîrîkanîro Kîam Ngai-Mûnene, Ngai wa methe mao.

³³ Mûthamaki Josia nîwathiririe mîvuanano yonthe îrîa yarî mûgiro vûrûrirî wonthe wa andû a Isiraeli na agîtûma andû onthe arîa maarî Isiraeli matungatagîre Ngai-Mûnene, Ngai wao. Andû matiatiga kûrûmîrîra Ngai-Mûnene, Ngai wa methe mao ûtûûrorî wonthe wa mûthamaki Josia.