2Maû 32 - ÎVUKU RÎA ÛVORO MWARO

Andû a Sîria nîmaatharîkîre Jerusalemu

¹ Vuva wa maûndû mau monthe marîa Hezekia, mûthamaki wa Juda eekîte na wîvokeku, Senakeribu, mûthamaki wa Asîria nîwatharîkîre Juda. Nîwacîgîrîrie matûûra marîa maarî mairigîre agîîciragia atî nî akûmanyita matuîke make.

² Rîrîa mûthamaki Hezekia aamenyire atî Senakeribu aaûkîte avangîte kûtharîkîra Jerusalemu,

³ nîwavangire na anene ake na anene a athigari a mbaara mavingîrîrie mîtaro îrîa yanyûrûrûkagia manjî na kûu nja ya îtûûra. Nao nîmaamûtethirie.

⁴ Andû eengî nîmaaûnganire vamwe na makîvinga ithima cionthe irîa ciatherûkga manjî na karûnjî karîa kaavîtûkagîrîra vûrûrirî na makiuga atîrî, “Athamaki a Sîria mangîûka na methîre manjî meengî nîkî?”

⁵ Hezekia nîwarutire wîra na vinya wa gûtuma rîngî rûthingo rwa Jerusalemu kûrîa rwarî rwomomoku na agîtuma nyomba ndaca na îgûrû cia arangîri rûthingorî rûu. Nîwatumire rûthingo rwa kaîrî mwena wa nja wa rûthingo rûu na agîtuma kûndû kûrîa gwecûrîtue mûthetu mwena wa îrathîro wa îtûûra rîa Daudi nîguo kûgîe na vinya. Wana nîwarûthire ngo na indo nyîngî cia mbaara.

⁶ Hezekia nîwathuurire anene a mbaara a kûrûngamîrîra andû na akîmagomania vamwe kîvarorî vakuvî na kîvingo gîa îtûûra akîûmîrîria andû akîmeera atîrî,

⁷ “Gîani na vinya na mûmîrîrie. Mûtigetigîre kana mûmake nîûndû wa mûthamaki wa Asîria, kana nîûndû wa ûrîa arî na athigari a mbaara eengî, nîûndû ûrîa ûrî natue arî na vinya nyîngî gûkîra ûrîa ûrî na Senakeribu.

⁸ Ke arî na vinya wa ûûmûndû tu, nwatî tue tûrî na Ngai-Mûnene, Ngai wetû wa gûtûtethia na gûtûrûîrîra.” Nao andû nîmaaûmîrîrue nî ciugo icio cia Hezekia, mûthamaki wa Juda.

⁹ Vuvarî, rîrîa Senakeribu, mûthamaki wa Asîria aacîgîrîrîtie îtûûra rîa Lakishi arî na athigari ake onthe, nîwatûmire ndungata ciake Jerusalemu kûrî Hezekia mûthamaki wa Juda na andû onthe a Juda arîa maarî Jerusalemu akîmeera atîrî,

¹⁰ “Senakeribu mûthamaki wa Asîria araûria nî ndûî mwîvokete rîu mwîkarîte Jerusalemu îtûûra rîcîgîrîrie?

¹¹ Anga tîkwa Hezekia aramûveenia nîguo atûme mûkue nî yûra na nyonda akîmwîra atî, ‘Ngai-Mûnene, Ngai wetû agaatûvonokia kuuma kûrî mûthamaki wa Asîria?’

¹² Kinthî Hezekia ûyû twake womomorire kûndû kûrîa kwagoocagîrwa ngai cia mîvuanano na akiunanga metha cia magongoona, agîcoka akîatha andû a Juda na a Jerusalemu magoocage na mavîvagîrie magongoona metharî îmwe tu ya kîgongoona?

¹³ Nîkwa mûtaicî ûrîa nie na methe makwa twekire andû onthe a mavûrûri marîa mengî? Anga ngai cia mavûrûri mau nîciavotire kûmavonokia kuuma kûrî nie?

¹⁴ Nî ngai îrîkû gatagatî ka ngai cia mavûrûri marîa methe makwa maacûkangirie viû yavotire kûvonokia andû a yo kuuma kûrî nie nîguo mue mûgîe na mwîrîgîrîro atî Ngai wenyu nîakaamûvonokia kuuma kûrî nie?

¹⁵ Mûtikareke Hezekia amûveenie kana amûvîtithie na njîra ta îo. Mûtikamwîtîkie nîûndû gûtirî ngai ya vûrûri wanarî ûrîkû kana ûthamaki ûrîkû yanavota kûvonokia andû a yo kuuma kûrî nie kana kuuma kûrî methe makwa. Ngai ûcio wenyu angîmûvonokia kuuma kûrî nie atîa!”

¹⁶ Ndungata cia Senakeribu nîciaririe maûndû meengî macûku megiî Ngai-Mûnene, Ngai wa Isiraeli na megiî ndungata yake Hezekia.

¹⁷ Mûthamaki wa Asîria nîwandîkire maarûa cia kûnyûrûria na gûcambia Ngai-Mûnene, Ngai wa Isiraeli akiugaga atîrî, “Wata ûrîa ngai cia mavûrûri mengî itaavota kûvonokia andû ao kuuma kûrî nie, nwata guo Ngai wa Hezekia atakaavota kûvonokia andû ake kuuma kûrî nie.”

¹⁸ Anene acio a Asîria nîmaaugîrîrie na Kîhibirania nîguo andû a Jerusalemu arîa maarî nthingorî mamake na megue guoya nîguo manyite îtûûra rîa Jerusalemu.

¹⁹ Nîmaaririe ûvoro wîgiî Ngai wa Jerusalemu wata ûrîa maaragia ûvoro wîgiî ngai cia mavûrûri marîa mengî irîa ciîthagîrwa irûthîtwe nî andû.

²⁰ Mûthamaki Hezekia na mûrathi Isaia, mûvîcî wa Amozu nîmaavoire Ngai na makîmûkaîra nîûndû wa ûndû ûcio.

²¹ Nake Ngai-Mûnene nîwatûmire mûraika na nîwathiîre akîûraga athigari arîa maarî njamba, anene a athigari a mbaara na anene onthe arîa maarî kûrîa mûthamaki wa Asîria aambîte magema. Kwoguo mûthamaki wa Asîria nîwacokire vûrûrirî wake aconokete mûno. Rîrîa aathiîre hekarûrî ya ngai yake, amwe a avîcî ake nîmaamûragire na mviû.

²² Kwoguo Ngai-Mûnene nîwavonokirie Hezekia na andû a Jerusalemu kuuma kûrî Senakeribu mûthamaki wa Asîria na kuuma kûrî nthû ciake cionthe. Ngai-Mûnene nîwatûmire andû a Jerusalemu mekaranie na thayû na andû onthe arîa maariganîtie nao.

²³ Andû eengî nîmaaûkire Jerusalemu kûretera Ngai-Mûnene iveo, na nîmaavirîre Hezekia mûthamaki wa Juda indo cia goro. Kuuma vîndî îo mûthamaki Hezekia nîwatîirwe nî mavûrûri monthe.

Gwîtîîa kwa Hezekia na kûrwara

²⁴ Kavindarî wa kau mûthamaki Hezekia nîwarwarire na agîtigaria vanini akue. Nîwavoire Ngai-Mûnene, nake Ngai-Mûnene nîwamûcokerie na akîmûva rûûri rwa kûmwonia atî nîakûvona.

²⁵ Nwatî Hezekia nîwaregire gûcokeria Ngai-Mûnene ngatho nîûndû wa maûndû marîa aamwîkîte. Hezekia nîwagîre na mwîtîîo na ûndû ûcio ûgîtûma Juda na Jerusalemu iverithua nî Ngai-Mûnene.

²⁶ Nwatî Hezekia na andû a Jerusalemu nîmaaverire magîtiga gwîtîîa, kwoguo Ngai-Mûnene ndaaverithia andû a Jerusalemu Hezekia arî mwoyo.

Ûtonga na ûthaka wa Hezekia

²⁷ Mûthamaki Hezekia nîwatongire mûno na andû onthe nîmaamûvete gîtîîo. Nîwatumithîtie nyomba nyîngî cia kwiga ûtonga wake wa sîlûva, thaavu, mathiga ma goro, mînyamû mînungi waro, ngo na indo ciîngî cia goro cia mîthemba yonthe.

²⁸ Nîwatumithîtie kûndû gwa kwiga maketha ma mîgûnda, ndivei, maguta, njaga cia ng'ombe na cia ng'ondu.

²⁹ Hezekia nîwatumire matûûra meengî na akîgîa na ndîthia nyîngî ya ng'ombe na ng'ondu nîûndû Ngai nîwamûrathimîte na indo nyîngî mûno.

³⁰ Hezekia nîke wavingire kûrîa manjî ma ithima cia Gihoni maaumagîrîra mwena wa îgûrû na akîmatemera mîtaro manyûrûrûke na mwena wa îthûîro wa îtûûra rîa Daudi. Maûndû monthe marîa Hezekia aambagîrîria, nîmaavucaga.

³¹ Rîrîa anjaama a mûnene wa Babuloni maathiîre kûria ûvoro wîgiî maûndû ma magegania marîa moonekete vûrûrirî, Ngai nîwarekire Hezekia eke ûrîa akwenda nîguo amûgerie amenye ûrîa warî ngororî yake.

Mûthiia wa wathani wa Hezekia

³² Maûndû marîa mengî monthe marîa Hezekia eekire na ciîko ciake mbaro nîmandîke cionekirî cia mûrathi Isaia mûvîcî wa Amozu, îvukuurî rîa athamaki a Juda na a Isiraeli.

³³ Mûthamaki Hezekia nîwakwire na akîthikwa mwena wa îgûrû wa mbîrîra irîa ciathikagwa athamaki. Andû onthe a Juda na a Jerusalemu nîmoonanirie gîtîîo kînene mûno kûrî Hezekia arîkia gûkua. Nake mûvîcî Manase nîwatuîkire mûthamaki vuva wake.