2Maû 31 - ÎVUKU RÎA ÛVORO MWARO

Hezekia nîwaretire ûgarûrûku mûtûûrîrerî ya Ndini

¹ Rîrîa ûkûngûîri wa kîrugo wathirire, andû onthe a Isiraeli arîa maaûkîte kîrugorî nîmaaumagarire makîthiî matûûrarî monthe ma Juda na makiunanga itugî cionthe cia mathiga na mîvuanano ya Ashera, ngai ya mûndûmûka. Nîmaacûkangirie kûndû kûrîa kwagoocagîrwa mîvuanano na metha cia magongoona irîa ciarî Juda kuonthe, Benjamini, Efiraimu na Manase. Andû onthe a Isiraeli nîmaacokire matûûrarî mao na wa mûndû mûciî gwake.

² Mûthamaki Hezekia nîwavangire athînjîri-Ngai na Alawi ikundi mwanya na akîgaîra wa mûndû wîra wa kûruta hekarûrî. Wîra ûcio warî ta wa kûruta matega ma kûvîvua na matega ma thayû, gûtungata ûgoocirî wa Ngai, gûcokia ngatho na gûkumia Ngai-Mûnene.

³ Mûthamaki nîwarutire kuuma ndîthiarî yake nyamû cia magongoona ma kûvîvua ma kîraûko na ma kîvwaî, cia magongoona ma kûvîvua ma mîthenya ya thavatû, cia gûkûngûîra irugorî cia mweri wacicûka na cia irugo irîa mbîtîkîrie wata ûrîa kwandîkîtwe wathorî wa Ngai-Mûnene.

⁴ Mûthamaki nîwathire andû arîa maatûûraga Jerusalemu mave athînjîri-Ngai na Alawi gîcunjî kîrîa maagîrîrwe nî kûvewa nîguo wanao merutîre viû kûvingia watho wa Ngai-Mûnene.

⁵ Rîrîa watho ûcio wakinyire kûrî andû a Isiraeli, nîmaarutire indo ciao nyîngî na njîra ya kwîyendera. Nîmaarutire maciaro ma mbere ma irio cia mîgûnda, ndivei, maguta, ûûkî na indo cionthe irîa maakûragia mîgûndarî yao. Nîmaarutire gîcunjî gîa îkûmi Kîam indo cionthe irîa maarî nacio.

⁶ Andû a Isiraeli na a Juda arîa maatûûraga matûûrarî ma Juda wanao nîmaaretire icunjî cia îkûmi cia ng'ombe, ng'ondu na cia indo irîa ciamûrîrîtwe Ngai-Mûnene, Ngai wao, na nîmaaigire indo icio irûndo.

⁷ Andû maambîrîrie kwiga indo icio irûndo mwerirî wa kathatû na makîrîkia mwerirî wa mûgwanja.

⁸ Rîrîa mûthamaki Hezekia marî na anene ake maaûkire na makîona irûndo icio, nîmaakumirie Ngai-Mûnene na magîkumia andû ake, Isiraeli.

⁹ Hezekia nîwaûririe athînjîri-Ngai na Alawi ûvoro wîgiî irûndo icio.

¹⁰ Nake Azaria, mûnene wa athînjîri-Ngai ûrîa warî wa kuuma nyomba ya Zadoku nîwacokerie Hezekia atîrî, “Kuuma vîndî îrîa andû maambîrîrie kûreta matega mao hekarûrî, twîthîrîtwe tûrî na irio mbîganu cia kûrîa na igatigara nyîngî nîûndû Ngai-Mûnene nîmûrathimu andû ake. Kîu nîkîo gîtûmîte twîthîrwa tûrî na indo ino nyîngî ûguo itigarîte.”

¹¹ Hezekia nîwacokire akîathana gûtumwe tûnyomba twa kwigwa irio hekarûrî, na nîtwatumirwe.

¹² Nao athînjîri-Ngai marî na wîvokeku nîmaaretire indo irîa ciarutîtwe na ciamûrîrîtwe Ngai-Mûnene, na icunjî cia îkûmi irîa andû maarutîte. Nîmaatwire Mûlawi Konania mûrûngamîrîri wa wîra ûcio, nake mûrwang'ina Shimei arî mûnini wake.

¹³ Nao Jehieli, Azazia, Nahathi, Asaheli, Jerimothi, Jozabadi, Elieli, Isumakia, Mahathi na Benaia maarî arûngamîrîri arîa maatethagîrîria Konania na mûrwang'ina Shimei. Andû acio îkûmi maathuurirwe nî mûthamaki Ezekia na Azaria, Mûthînjîri-Ngai mûnene.

¹⁴ Kore mûvîcî wa Imuna, Mûlawi ûrîa warangagîra Kîvingo Kîam mwena wa Îrathîro nîke warûngamagîrîra matega marîa maarutagîrwa Ngai nî andû na njîra ya kwîyendera, nwake wagaaga matega na indo irîa ciarî nyamûrîre Ngai-Mûnene na matega marîa matheru mûno.

¹⁵ Edeni, Miniamini, Jeshua, Shemaia, Amaria na Shekania nîmaatethagîrîria Kore kûgaa indo icio marî na wîvokeku matûûrarî marîa mengî kûrîa athînjîri-Ngai maatûûraga. Nîmaagaagîra Alawi acio engî, arîa akûrû na arîa mataarî akûrû ûndû ûmwe.

¹⁶ Vamwe na ûguo, nîmaagaagîra Alawi arûme arîa maarî na ûkûrû wa mîaka îthatû kûthiî na mbere, arîa maatonyaga hekarûrî kûruta wîra wao wa wa mûthenya wata ûrîa maagaanîtue, arîa marîîtwa mao maandîkîtwe mûtaratararî wa njiarwa cia Lawi. Andû acio maagaîrwe indo kûringana na wîra ûrîa wa gîkundi Kîamveetwe.

¹⁷ Athînjîri-Ngai maandîkagwa kûringana na nyomba ciao. Nao Alawi arîa maarî na ûkûrû wa mîaka mîrongo îîrî (20) kûthiî na mbere maandîkagwa kûringana na wîra ûrîa wa gîkundi Kîamveetwe.

¹⁸ Athînjîri-Ngai maandîkirwe vamwe na ciana ciao cionthe, aka ao, anake ao na erîtu ao na andû ao onthe, nîûndû nîmaagîrîrwe vîndî cionthe mekarage metheretie.

¹⁹ Nao athînjîri-Ngai a mbarî ya Aroni arîa matûûraga mîgûndarî nja ya matûûra mao, nîkwathuurirwe arûme na marîîtwa nîguo makagaîre arûme onthe arîa maarî athînjîri-Ngai na Alawi onthe arîa maandîkîtwe.

²⁰ Ûguo nîguo mûthamaki Hezekia eekire Juda kuonthe. Hezekia nîwekire maûndû marîa maarî maro na maakenagia Ngai-Mûnene, Ngai wake.

²¹ Wîra wa wonthe ûrîa mûthamaki Hezekia aarutaga hekarûrî wîgiî kûrûmîrîra watho na maathani ma Ngai, aaûrutaga arî na wîvokeku na nîwavoyaga Ngai wake na akaruta wîra na ngoro yake yonthe. Kwoguo nîwekindîrie.