2Maû 30 - ÎVUKU RÎA ÛVORO MWARO

Kûvarîria pasaka

¹ Mûthamaki Hezekia nîwatûmanire Isiraeli kuonthe na Juda na nîwandîkire maarûa agîtûmîra andû a Efiraimu na Manase. Aametire nîguo mathiî Jerusalemu hekarûrî magakûngûîre kîrugo Kîam pasaka ya Ngai-Mûnene, Ngai wa Isiraeli.

² Mûthamaki na anene ake na andû onthe a Jerusalemu nîmaatuîte makûngûîre pasaka mweri wa kaîrî,

³ nîûndû matiavota gûkûngûîra pasaka kavinda karîa kaarî kagîrîru nîûndû athînjîri-Ngai matiarî eganu, na andû matiagomanîte Jerusalemu.

⁴ Mûthamaki na andû onthe nîmoonire mûvango ûcio ûrî mwagîrîru.

⁵ Kwoguo nîmaanîrîre Isiraeli kuonthe kuuma Beerisheba nginya Dani mathiî Jerusalemu magakûngûîre pasaka ya Ngai-Mûnene, Ngai wa Isiraeli. Andû nîmeekarîte îvinda îraca matakûngûîrîte pasaka marî eengî kûringana na ûrîa watho ugîte.

⁶ Kwoguo anjaama nîmaathiîre Isiraeli na Juda kuonthe marî na maarûa kuuma kûrî mûthamaki na anene ake. Maarûa icio ciandîkîtwe atîrî, “Mue andû a Isiraeli ûkani kûrî Ngai-Mûnene, Ngai wa Iburahimu, Isaka na Jakovu. Nake Ngai nîagûka kûrî mue, arîa mwatigarire vîndî îrîa mwatharîkîrwe nî athamaki a Asîria.

⁷ Mûtigatuîke ta methe menyu na andû enyu arîa mataarî evokeku kûrî Ngai-Mûnene, Ngai wa methe mao, ûrîa wamaverithirie mûno ta ûrîa mûrona.

⁸ Mûtigatuîke aremi ta ûrîa methe menyu mekariî. Nwatî athîkîrani Ngai-Mûnene na mûke hekarûrî vandû varîa amûrîte vatûûre varî vatheru tene na tene. Tungatagîrani Ngai-Mûnene, Ngai wenyu nîguo ndakarakare nîmue rîngî.

⁹ Ethîrwa nîmûgûcoka kûrî Ngai-Mûnene, andû enyu na ciana cienyu nîmakeguîrwa ntha nî andû arîa maamatavire na nîmagaacoka vûrûrirî ûyû, nîûndû Ngai-Mûnene, Ngai wenyu arî ntha na wendo na ndakaariganîrwa nî mue mûngîmûcokerera.”

¹⁰ Kwoguo, anjaama nîmaathiîre matûûrarî monthe vûrûrirî wa Efiraimu na Manase na nginya Zebuluni. Nwatî andû nîmaamathekerere na makîmanyûrûria.

¹¹ Kûnarî ûguo, andû anini a kuuma Asheri, Manase na Zebuluni nîmeenyivirie na makîthiî Jerusalemu.

¹² Ngai nîwavotithirie andû onthe a Juda kûnyitana vamwe na makîathîkîra ûrîa mûthamaki na anene ake maathîtwe nî Ngai-Mûnene mameere.

Gûkûngûîra pasaka

¹³ Andû eengî nîmaagomanire vamwe Jerusalemu mwerirî wa kaîrî nîguo magakûngûîre kîrugo Kîam mîgate îtarî mîkîre ndawa ya kwimbia.

¹⁴ Nîmaambîrîrie wîra na makîruta metha cia magongoona irîa ciarî Jerusalemu, na metha cia magongoona irîa ciavîvagîrua ûbani na magîcikia Kîamndarî gîa Kidironi.

¹⁵ Na mûthenya wa îkûmi na îna wa mweri wa kaîrî, nîmaaûragire ng'ondu ya pasaka. Athînjîri-Ngai na Alawi nîmegwire nthoni mûno na makîîtheria. Nîmaacokire makîrete matega ma kûvîvua kûrî Ngai-Mûnene.

¹⁶ Athînjîri-Ngai na Alawi nîmeekarire wa andû varîa maagîrîrwe nî gwîkara wata ûrîa watho wa Musa, mûndû wa Ngai ugîte. Alawi nîmaanengere athînjîri-Ngai nthakame ya magongoona na makîmîminjaminja metharî ya kîgongoona.

¹⁷ Gatagatîrî ka andû acio, kwarî na andû eengî mateetheretie, kwoguo Alawi nîmaaûragire ng'ondu cia pasaka vandûrî va andû arîa mataarî atheru na magîciamûrîra Ngai-Mûnene.

¹⁸ Andû eengî a kuuma Efiraimu, Manase, Isakaru na Zebuluni matietheretie, nwatî nîmaarîre pasaka matakûrûmîrîra ûrîa kwathanîtwe, nîûndû mûthamaki Hezekia nîwavoete Ngai-Mûnene nîûndû wao akiuga atîrî, “Ngai-Mûnene na mwaro, nakûthaitha wovere andû onthe

¹⁹ arîa magaakûgooca we Ngai, Ngai-Mûnene, Ngai wa methe mao wana ethîrwa matetheretie kûringana na watho wa hekarû.”

²⁰ Nake Ngai-Mûnene nîwegwire mavoya ma Hezekia na nîwovere andû.

²¹ Nao andû a Isiraeli arîa maarî Jerusalemu nîmaakûngûîre kîrugo Kîam mîgate îtarî mîkîre ndawa ya kwimbia îvinda rîa mîthenya mûgwanja makenete mûno. Alawi na athînjîri-Ngai nîmaakumagia Ngai-Mûnene wa mûthenya wa mûthenya na nîmaainagîra Ngai-Mûnene na vinya wao wonthe.

²² Nake Hezekia nîwagathîrîrie Alawi onthe nîûndû wa wara wao wa gûtungatîra Ngai-Mûnene. Kwoguo andû nîmaarîre irio cia kîrugo îvinda rîa mîthenya mûgwanja (7). Nîmaarutaga magongoona ma thayû na magîkumagia Ngai-Mûnene, Ngai wa methe mao.

Gûkûngûîra pasaka rita rîa kaîrî

²³ Andû onthe arîa maagomanîte nîmeetîkanîrie makûngûîre kîrugo kîu îvinda rîa mîthenya îngî mûgwanja (7). Kwoguo nîmaagîkûngûîre mîthenya îngî mûgwanja makenete.

²⁴ Hezekia, mûthamaki wa Juda nîwavere andû ndegwa ngiri îmwe na ng'ondu ngiri mûgwanja (7,000) cia kûrîwa nî andû. Nao anene nîmaaveere andû ndegwa ngiri îmwe (1,000) na ng'ondu ngiri îkûmi (10,000). Athînjîri-Ngai eengî nîmeetheririe.

²⁵ Andû onthe a Juda, athînjîri-Ngai, Alawi na andû onthe arîa maaumîte Isiraeli na ageni arîa maaumîte nja ya vûrûri wa Isiraeli na arîa maatûûraga Juda nîmaakenire mûno.

²⁶ Kwoguo kwarî na gîkeno kînene mûno îtûûrarî rîa Jerusalemu, nîûndû kuuma vîndî ya Solomoni mûvîcî wa Daudi, mûthamaki wa Isiraeli gûtiagîîte ûndû wîngî ta ûcio îtûûrarî rîa Jerusalemu.

²⁷ Athînjîri-Ngai na Alawi nîmaacokire magîûkîra na makîvoera andû na Ngai nîwegwire mavoya mao arî îgûrû kûrîa kûtheru atûûraga.