2Maû 29 - ÎVUKU RÎA ÛVORO MWARO

Hezekia, mûthamaki wa Juda

¹ Hezekia aatuîkire mûthamaki wa Juda arî na ûkûrû wa mîaka mîrongo îîrî na îtano (25). Nîwathanire arî Jerusalemu îvinda rîa mîaka mîrongo îîrî na kenda (29). Ng'ina eetagwa Abija na aarî mwarî wa Zakaria.

² Nîwekire maûndû marîa maakenagia Ngai-Mûnene wata ûrîa îthe Daudi eekîte.

Kûtherua gwa hekarû

³ Mweri wa mbere wa mwaka wa mbere ûcio Hezekia aatuîkire mûthamaki, nîwavingûrithirie mîrango ya hekarû na akîmîtuma rîngî kûrîa yacûkangîte.

⁴ Nîwaretire athînjîri-Ngai na Alawi na akîmagomania vamwe kîvarorî gîa hekarû Kîam mwena wa îrathîro

⁵ na akîmeera atîrî, “Tanthikîrîriani mue Alawi! Îîtherieni na mûtherie hekarû ya Ngai-Mûnene, Ngai wa methe menyu. Rutani indo cionthe irî mûgiro vandû varîa vatheru.

⁶ Nîûndû methe metû methîrîtwe matarî evokeku na nîmeekire maûndû macûku mbere ya Ngai-Mûnene, Ngai wetû. Nîmaatiganîrie hekarû îrîa Ngai-Mûnene atûûraga na nîmaavuvatîre Ngai-Mûnene.

⁷ Wana nîmaavingire mîrango ya hekarû na magîtûma taa ivore na nîmaatigire kûvîvia ûbani kana marutîra Ngai wa Isiraeli matega ma kûvîvua marî varîa vatheru.

⁸ Kwoguo Ngai-Mûnene nîwarakarirue mûno nî andû a Juda na a Jerusalemu na nîamekîte ûndû wa kûmakania, ûndû ûrî na guoya na wa kînyarari wata ûrîa mûreyonera na metho menyu mue ene.

⁹ Kîu nîkîo gîatûmire methe metû maûragwa marî mbaararî na aka etû, erîtu etû na anake etû matavwe.

¹⁰ “Rîu nînduîte kûrûtha kîrîkanîro na Ngai-Mûnene, Ngai wa Isiraeli, nîguo ndagatûrakarîre rîngî.

¹¹ Anake akwa, mûtigate mavinda. Ngai-Mûnene nîamûthuurîte mûmûtungatage, mûtongoragie andû kûmûgooca na mûmûvîvagîrie ûbani.”

¹² Nao Alawi aya marûmîrîrîte nîmaambîrîrie kûruta wîra: Kuuma mbarî ya Kohathu kwarî na Mahathi mûvîcî wa Amasai na Joeli mûvîcî wa Azaria. Kuuma mbarî ya Merari kwarî na Kishu mûvîcî wa Abudi na Azari mûvîcî wa Jehaleleli. Kuuma mbarî ya Gerishoni kwarî na Joa mûvîcî wa Zima na Edeni mûvîcî wa Joa.

¹³ Kuuma mbarî ya Elizafani kwarî na Shimuri na Jeieli. Kuuma mbarî ya Asafu kwarî na Zakaria na Matania.

¹⁴ Kuuma mbarî ya Hemani kwarî na Jehieli na Shimei. Kuuma mbarî ya Jeduthuni kwarî na Shemaia na Uzieli.

¹⁵ Andû aya maagomanirie Alawi acio engî vamwe na nîmeetheririe. Nîmaacokire makîthiî hekarûrî kûmîtheria wata ûrîa maathîtwe nî mûthamaki kûringana na watho wa Ngai-Mûnene.

¹⁶ Athînjîri-Ngai nîmaatonyire ndaarî ya hekarû nîguo makamîtherie. Nao nîmaarutire indo cionthe irîa itaarî ntheru na magîciga nja kîvarorî gîa hekarû. Nao Alawi nîmaaciocire na makîivira karûnjîrî ga Kidironi.

¹⁷ Wîra wa kûtheria hekarû wambîrîrie mûthenya wa mbere wa mweri, na mûthenya wa kanana nîmaarîkîtie kûmîtheria nginya mûromorî wayo. Nîmaarutire wîra wa kûtheria hekarû mîthenya îngî înana, na wîra ûcio wonthe wathirire na mîthenya îkûmi na îtandatû (16).

Hekarû nîyamûrirwe rîngî

¹⁸ Alawi nîmaacokire makîthiî kûrî mûthamaki Hezekia na makîmwîra atîrî, “Nîtûratheririe hekarû yonthe, Metha ya kîgongoona ya kûrutîra matega ma kûvîvua na indo cionthe ciayo, na metha îrîa igagwa mîgate îrîa mîamûre na indo cionthe ciayo.

¹⁹ Nîtûratheririe indo cionthe irîa mûthamaki Ahazi aarutîte hekarûrî na twaicokia na irî mbere ya metha ya kîgongoona ya Ngai-Mûnene. Ahazi aarutîte indo icio nîûndû ndeevokete Ngai-Mûnene vîndî îrîa aarî mûthamaki.”

²⁰ Mûthenya ûcio wîngî kîraûko, mûthamaki Hezekia nîwaûkîrire na agîta anene onthe a îtûûra na makîthiî hekarûrî.

²¹ Nîmaathiîre na ndegwa mûgwanja, ndûrûme mûgwanja, tûgondu mûgwanja na nthenge mûgwanja cia matega ma kûtheria mevia ma andû a nyomba ya mûthamaki, andû a Juda na hekarû. Mûthamaki Hezekia nîwathire athînjîri-Ngai, njiarwa cia Aroni makarutîre matega mau metharî ya kîgongoona ya Ngai-Mûnene.

²² Kwoguo athînjîri-Ngai nîmaaûragire ndegwa na magîoca nthakame ya cio makîminjaminjîria metha ya kîgongoona. Nîmaaûragire ndûrûme na magîoca nthakame ya cio makîminjaminjîria metha ya kîgongoona na makîûraga tûgondu na magîoca nthakame ya tuo makîminjaminjîria metha ya kîgongoona.

²³ Nîmaacokire makîvira nthenge cia matega ma kûtheria mevia kûrî mûthamaki na kûrî andû arîa maagomanîte na makigîrîra njara ciao îgûrû rîa nthenge icio.

²⁴ Nao athînjîri-Ngai nîmaaûragire nthenge icio na makîrutîra nthakame ya cio metharî ya kîgongoona rîrî îtega rîa kûtheria mevia ma andû onthe a Isiraeli, nîûndû mûthamaki Hezekia nîwathanîte kûrutwe îtega rîa kûvîvua na îtega rîa kûtheria mevia ma andû onthe a Isiraeli.

²⁵ Mûthamaki Hezekia nîwarûmîrîre maûndû marîa Ngai-Mûnene aathîte mûthamaki Daudi na njîra ya Gadi ûrîa warî mwoni maûndû ma mûthamaki na mûrathi Nathani. Kwoguo nîwaigire Alawi hekarûrî marî na mîtûrirû, ngita na ithaani irîa iringithanagua kûringana na ûrîa Ngai-Mûnene aathanîte na njîra ya arathi ake.

²⁶ Alawi nîmaarûngamire marî na indo cia kwina cia Daudi, nao athînjîri-Ngai marî na tûrumbeta.

²⁷ Mûthamaki Hezekia nîwacokire akîathana atî kûrutwe magongoona ma kûvîvua metharî ya kîgongoona. Rîrîa matega mau maambîrîrie kûrutwa, andû nîmaambîrîrie kwinîra Ngai-Mûnene, makîvuvaga tûrumbeta na indo cionthe cia nyîmbo cia Daudi mûthamaki wa Isiraeli.

²⁸ Andû onthe nîmaagocire Ngai-Mûnene, aini makina nyîmbo na tûrumbeta tûkîvuvwa nginya rîrîa matega ma kûvîvua maathirire.

²⁹ Rîrîa maathirire, mûthamaki na andû onthe arîa maarî nake nîmeenamîrîrie mothiû mao na makîgooca Ngai-Mûnene.

³⁰ Nake mûthamaki Hezekia na anene nîmaathire Alawi makumie Ngai-Mûnene na nyîmbo irîa ciatungîtwe nî Daudi na Asafu, ûrîa warî mwoni. Kwoguo andû onthe nîmaakumirie Ngai-Mûnene marî na gîkeno na nîmeenamîrîrie mothiû mao nthî na makîgooca Ngai.

³¹ Mûthamaki Hezekia nîwacokire akiuga atîrî, “Rîu nîmwetheria mbere ya Ngai-Mûnene, kuvîvîriani hekarû mûrete magongoona na matega ma gûcokia ngatho kûrî Ngai-Mûnene.” Andû onthe nîmaavirire magongoona na matega ma gûcokia ngatho, na engî nîmaaretire matega ma kûvîvua na njîra ya kwîyendera.

³² Nyamû cia matega ma kûvîvua ma Ngai-Mûnene irîa ciarutirwe ciarî: ndegwa mîrongo mûgwanja (70), ndûrûme îgana rîmwe (100) na tûgondu magana maîrî (200). Icio cionthe ciarî cia matega ma kûvîvua kûrî Ngai-Mûnene.

³³ Nyamû cia kûrîthua irîa ciamûrirwe irî cia matega ciarî: ndegwa magana matandatû (600) na ng'ondu ngiri ithatû (3,000).

³⁴ Nwatî Athînjîri-Ngai maarî anini mûno na matingîavotire kûthînja nyamû icio cionthe cia matega ma kûvîvua. Kwoguo andû ao, Alawi nîmaamatethirie nginya wîra ûcio ûkîthira. Vîndî îo athînjîri-Ngai engî eengî nîmeetheretie. (Alawi meethagîrwa marî atheru gûkîra athînjîri-Ngai.)

³⁵ Îgûrû rîa matega meengî ma kûvîvua, kwarî na mathunya ma matega ma thayû na ndivei îrîa yarutanagîrua na matega ma kûvîvua. Kwoguo ûtungata hekarûrî nîwambîrîrie rîngî.

³⁶ Mûthamaki Hezekia na andû onthe nîmaakenire nîûndû wa maûndû marîa Ngai aamavotithîtie gwîka, nîûndû maûndû mau nîmeekîkire na îvenya mûno.