2Maû 28 - ÎVUKU RÎA ÛVORO MWARO

Ahazi, mûthamaki wa Juda

¹ Ahazi aatuîkire mûthamaki arî na ûkûrû wa mîaka mîrongo îîrî (20) na nîwathanire îvinda rîa mîaka îkûmi na îtandatû (16) arî Jerusalemu. Ahazi ndeeka maûndû marîa maakenagia Ngai-Mûnene ta ûrîa îthe, Daudi eekîte.

² Nwatî aarûmîrîre mîthiîre ya athamaki a Isiraeli. Wana nîwerûthîre mîvuanano ya Baali.

³ Nîwarutire magongoona ma kûvîvua ma ûbani Kîamndarî Kîam Hinomu na akîruta anake ake kûrî ngai cia mîvuanano marî matega ma kûvîvua. Aarûmîrîre mîtugo mîcûku ya ndûrîrî irîa Ngai-Mûnene eengatîte kuuma vûrûrirî ûcio vîndî îrîa andû a Isiraeli maatonyaga kuo.

⁴ Ahazi nîwarutire magongoona na akîvîvîria ûbani kûndû kuonthe kwagoocagîrwa ngai cia mîvuanano, irîmarî na rungu rwa mîtî yonthe yarî mîruru.

Mbaara gatagatî ga Sîria na Isiraeli

⁵ Kwoguo Ngai-Mûnene, Ngai wake nîwamûrekererie na akîvootwa nî mûthamaki wa Sîria. Mûthamaki wa Sîria nîwacokire akînyita andû eengî a Juda na akîmavira Damesiki marî mîgwate. Mûthamaki Ahazi nwa warekererue kûrî mûthamaki wa Isiraeli, ûrîa wamûvootire na akîûraga andû eengî mûno a Juda.

⁶ Mûthamaki Peka mûvîcî wa Remalia nîwaûragire athigari ngiri îgana rîmwe rîa mîrongo îîrî (120,000) a Juda arîa maarî njamba mûthenya ûmwe, nîûndû nîmaatiganîrîtie Ngai-Mûnene, Ngai wa methe mao.

⁷ Zikiri, mûthigari warî njamba ya mbaara wa kuuma Efiraimu, nîwaûragire Maaseia mûvîcî wa mûthamaki Ahazi na akîûraga Azirikamu mûnene wa nyomba ya mûthamaki, na akîûraga Elikana ûrîa warûmîrîrîte mûthamaki wathanirî.

⁸ Athigari a mbaara a Isiraeli nîmaatavire andû ngiri magana maîrî (200,000) a kuuma Juda, aka, anake na erîtu wana ethîrwa nîmaakonenie. Andû a Isiraeli nîmaamavirire Samaria wa vamwe na indo nyîngî irîa maatavîte.

Mûrathi Odedi

⁹ Kwarî mûrathi wa Ngai-Mûnene wetagwa Odedi na watûûraga kûu Samaria. Nîwaumagarire akîthiî gûtûnga athigari a mbaara a Isiraeli vamwe na athigari arîa maatavîte a Juda rîrîa maarî vakuvî gûtonya Samaria. Nîwamerire atîrî, “Ngai-Mûnene, Ngai wa methe menyu nîwarekererie andû a Juda kûrî mue nîûndû nîwarakarîtue nîo. Nwatî Ngai nîwonete ûrîa mûragîte andû acio mûtakûmacaîra.

¹⁰ Na rîu mûvangîte gûtua aka na arûme a Juda na a Jerusalemu ngombo cienyu. Anga wanamue mûtiîvîrîtie Ngai-Mûnene, Ngai wenyu?

¹¹ Rîu nthikîrîriani! Andû acio mwatavire nî aa mûrwanyûkwe na aa mwarwanyûkwe. Tigani macoke, nîûndû Ngai-Mûnene nî ûrakarîtue nî mue.”

¹² Atongoria ana a kuuma Efiraimu, Azaria mûvîcî wa Johanani, Berekia mûvîcî wa Meshilemothi, Jehizikia mûvîcî wa Shalumu na Amasa mûvîcî wa Hadilai nîmaareganire na ûguo athigari a mbaara meekîte.

¹³ Nîmaamerire atîrî, “Mûtikarete mîgwate îo gûkû nîûndû kûu nî kwongerera mavîtia îgûrû rîa mevia marîa twîvîrîtie Ngai-Mûnene. Mavîtia metû nî meengî mûno na Ngai-Mûnene nî mûrakarie mûno nî andû a Isiraeli”

¹⁴ Kwoguo athigari a mbaara nîmaanenganîre andû arîa maarî mîgwate na indo irîa maatavîte kûrî anene na andû a Isiraeli arîa maagomanîte.

¹⁵ Atongoria acio magwetetwe marîîtwa mao nîmoocire mîgwate na indo cionthe irîa ciatavîtwe. Kuumana na indo irîa maatavîte, nîmaaveere mîgwate yonthe îrîa yarî njaga nguo, iratû, na makîmava irio, gîa kûnyua, na arîa maarî na ironda nîmaamavakire maguta ma ndamaiyû. Nao arîa mataarî na vinya nîmaamatwîthirie mvundarî ciao na makîmacokia kûrî andû ao Jeriko, îtûûra rîa mîtî ya mîkîndû. Andû a Efiraimu nîmaacokire magîcoka Samaria.

Ahazi nîwetirie ûtethio kuuma Asîria

¹⁶ Vîndî wa îo mûthamaki Ahazia nîwatûmanire kûrî mûthamaki wa Asîria nîguo avewe ûtethio,

¹⁷ nîûndû andû a Edomu nîmaaûkîte rîngî na makatharîkîra Juda na makanyita andû na makîthiî nao marî mîgwate.

¹⁸ Afilisiti wanao nîmaatharîkîrîte matûûra ma Juda marîa maarî Shefela na Negebu na makînyita Bethishemeshi, Aijaloni, Gederothi, Soko vamwe na icagi ciarîo, Timuna vamwe na icagi ciarîo na Gimuzo vamwe na icagi ciarîo na magîtûûra kuo.

¹⁹ Ngai-Mûnene nîwaretithîrie andû a Juda thîna nîûndû Ahazi, mûthamaki wa Isiraeli nîwatûmîte andû a Juda mevie na ndaarî mwîvokeku kûrî Ngai-Mûnene.

²⁰ Kwoguo Tigilathi Pilinesa, mûthamaki wa Asîria nîwaûkire kûrî Ahazi na akîmûtharîkîra îthenya rîa kûmûtethia.

²¹ Ahazi nîwocire indo kuuma hekarûrî na ciîngî kuuma nyomba ya mûthamaki na nyomba cia anene na akîinengera mûthamaki wa Asîria, nwatî ûguo ndwanamûtethia.

Mevia ma Ahazi

²² Îvinda rîu mûthamaki Ahazi aarî na mathîna mengî, nîrîo aatuîkire mûndû ûtarî mwîvokeku kûrî Ngai-Mûnene mûno makîria.

²³ Nîwarutire magongoona kûrî ngai cia andû a Damesiki arîa maamûvootire akiuga atî, nîûndû ngai icio nîciatethirie Asîria ciavota kûmûtethia wanake. Nwatî ûndû ûcio nîwatûmire acûkangue wa vamwe na vûrûri wonthe wa Isiraeli.

²⁴ Mûthamaki Ahazi nîwaûnganirie vamwe indo cia hekarû na agîciunanga icunjî. Nîwacokire akîvinga mîrango ya hekarû na agîtuma metha cia magongoona mîena yonthe ya Jerusalemu.

²⁵ Nîwatumire kûndû gwa kûgoocagîra ngai cia mîvuanano na kûivîvîria ûbani matûûrarî monthe ma Juda. Ûndû ûcio nîwarakaririe Ngai-Mûnene, Ngai wa methe make.

²⁶ Maûndû marîa mengî monthe marîa eekire na mîthiîre yake yonthe arî mûthamaki kuuma Kîammbîrîria nginya mûthiia, nîmandîke îvukuurî rîa ng'ano cia athamaki a Juda na a Isiraeli.

²⁷ Mûthamaki Ahazi nîwakwire na akîthikwa îtûûrarî kûu Jerusalemu, nwatî ndaathikwa mbîrîrarî irîa ciathikagwa athamaki a Isiraeli. Nake mûvîcî Hezekia nîwatuîkire mûthamaki vuva wake.