2Maû 27 - ÎVUKU RÎA ÛVORO MWARO

Jothamu, mûthamaki wa Juda

¹ Jothamu aatuîkire mûthamaki arî na ûkûrû wa mîaka mîrongo îîrî na îtano (25), na aathanire arî Jerusalemu îvinda rîa mîaka îkûmi na îtandatû (16). Ng'ina eetagwa Jerusha mwarî wa Zadoku.

² Nîwekire maûndû marîa maakenagia Ngai-Mûnene wata ûrîa îthe Uzia eekîte. Nwatî Jothamu ndaatonya hekarûrî ya Ngai-Mûnene. Kûnarî ûguo, andû nîmaathiîre na mbere gwîka maûndû macûku.

³ Jothamu nîwatumire rîngî kîvingo Kîam mwena wa îgûrû Kîam hekarû na nîwarutire wîra mûnene wa gûtuma rûthingo rwa Ofeli.

⁴ Nîwatumire matûûra vûrûrirî ûrîa ûrî irîma wa Judea, na agîtuma nyomba cia kwîgitîra na nyomba ndaca na îgûrû mîtitûrî.

⁵ Mûthamaki Jothamu nîwarûire na mûthamaki wa Amoni na akîmûvoota. Mwakarî ûcio, andû a Aamoni nîmaarîvire gooti ya kilo ngiri ithatû na magana mana (3,400) cia sîlûva, tani ngiri îmwe (1,000) cia ngano na tani ngiri îmwe (1,000) cia cairi kûrî mûthamaki Jothamu. Ûguo nwaguo maamûrîvire mwaka wa kaîrî, wana wa kathatû.

⁶ Jothamu nîwagîre vinya nîûndû vîndî cionthe nîwathîkagîra Ngai-Mûnene, Ngai wake.

⁷ Maûndû marîa mengî monthe marîa meekirwe nî mûthamaki Jothamu, mbaara irîa aarûire, nîmandîke îvukuurî rîa ng'ano cia athamaki a Isiraeli na a Juda.

⁸ Jothamu aarî na ûkûrû wa mîaka mîrongo îîrî na îtano rîrîa aambîrîrie kwathana, na aathanire îvinda rîa mîaka îkûmi na îtandatû arî Jerusalemu.

⁹ Mûthamaki Jothamu nîwakwire na makîmûthika îtûûrarî rîa Daudi. Nake mûvîcî Ahazi nîwatuîkire mûthamaki vuva wake.