2Maû 26 - ÎVUKU RÎA ÛVORO MWARO

Uzia, mûthamaki wa Juda

¹ Andû onthe a Juda nîmaathuurire Uzia, mûvîcî wa Amazia atuîke mûthamaki wao vandûrî va îthe. Uzia aarî na ûkûrû wa mîaka îkûmi na îtandatû (16).

² Mûthamaki Amazia akua, Uzia nîwatavire îtûûra rîa Elothi na akîrîcokia vûrûrirî wa Juda na akîrîtuma rîngî.

³ Uzia aambîrîrie kwathana arî na ûkûrû wa mîaka îkûmi na îtandatû (16) na nîwathanire arî Jerusalemu îvinda rîa mîaka mîrongo îtano na îîrî (52). Ng'ina eetagwa Jekolia na aarî wa kuuma Jerusalemu.

⁴ Nîwekire maûndû marîa maakenagia Ngai-Mûnene wata ûrîa îthe Amazia eekîte.

⁵ Uzia nîwathîkagîra Ngai mavinda marîa Zekaria aarî mwoyo, nîûndû nîwarûmagîrîra maûndû marîa aataaragwa nî Zekaria megiî kwathîkîra Ngai. Nake Ngai-Mûnene nîwatûmire athatûkwe maûndûrî make.

⁶ Uzia nîwarûire na Afilisiti na akîomomora nthingo irîa ciairigîrîte îtûûra rîa Gathu, Jabune na îtûûra rîa Ashidodi. Nîwacokire agîtuma matûûra mengî manene vakuvî na Ashidodi na kûndû kwîngî vûrûrirî wa Filisiti.

⁷ Ngai nîwamûvotithirie kûvoota Afilisiti na Arabu arîa maarî Guribaali na kûvoota Ameuni.

⁸ Aamoni nîmaarîvire gooti kûrî Uzia na ngumo yake îgîtamba nginya mûvakarî wa Misiri nîûndû nîwagîte na vinya mûno.

⁹ Uzia nîwatumire nyomba ndaca ivingorî cia Jerusalemu na agîcirigîra. Îmwe yarî kîvingorî Kîam mwena na îo îngî kîvingorî Kîam Kîamndarî, nayo îo îngî varîa rûthingo rweyunîrîte.

¹⁰ Wana nîwatumire nyomba ndaca werûrî na akînja iriko nyîngî cia manjî kuo nîûndû aarî na ndîthia nyîngî kûu Shefela na kûndû kûrîa kwarî kwaraganu. Aarî na andû maarutaga wîra mîgûndarî ya mîthavibu irîmarî na kûndû kûrîa kwarî kûnoru nîûndû nîwendeete kûrîma mûno.

¹¹ Makîria ya ûguo Uzia aarî na athigari a mbaara meevarîrîtie kûrûa. Maagaanîtue ikundi ikundi na mûtaratara wao waigîtwe nî Jeieli karani wa vûrûri na mûnene Maaseia. Mûtongoria wao aarî Hanania ûmwe wa anene a athigari a mbaara a mûthamaki.

¹² Atongoria onthe a athigari a mbaara arîa maarî vinya na njamba maarî ngiri igîrî na magana matandatû (2,600).

¹³ Athigari onthe a mbaara arîa maarî rungu rwao maarî ngiri magana mathatû ma mûgwanja na magana matano (307,500). Athigari acio nîmaarutîtwe waro kûrûa na maarî na vinya wa gûtethia mûthamaki kûrûa na nthû ciake.

¹⁴ Mûthamaki Uzia nîwarûthithîrie athigari ake onthe a mbaara ngo, matumû, ngovia cia kûgitîra ciongo, tûvuti, mota na mathiga ma ikûtha.

¹⁵ Kûu Jerusalemu mavundi make nîmaathondekire indo cia gwikia mîguî na cia gwikia mathiga marîa manene. Indo icio ciarî nyombarî ndaca na mîenarî ya rûthingo rwa îtûûra. Ngai nîwamûtethirie kûgîa vinya mûno, na ngumo yake îgîtamba kûndû kuonthe.

Uzia nîwaverithirue nîûndû wa mwîtîîo wake

¹⁶ Rîrîa mûthamaki Uzia aagîre vinya, nîwambîrîrie gwîtîîa. Mwîtîîo ûcio wake nîwatûmire acûkangue nîûndû nîwaregire kwathîkîra Ngai-Mûnene, Ngai wake na nîwathiîre hekarûrî kûvîvia ûbani metharî ya kîgongoona ya kûvîvîria ûbani.

¹⁷ Nwatî Azaria, mûthînjîri-Ngai marî na athînjîri-Ngai engî mîrongo înana (80) maarî njamba nîmaamûrûmîrîrie

¹⁸ na makîmûgiria avîvia ûbani. Nîmaamwîrire atîrî, “Mûthamaki Uzia, ndwagîrîrwe nî kûrutîra Ngai-Mûnene îgongoona rîa kûvîvia ûbani. Ûcio nî wîra wa athînjîri-Ngai, njiarwa cia Aroni nîûndû nîo amûrîre wîra wa kûvîvia ûbani. Thiî ume vandû ava vatheru, nîûndû nîwavîtia na ûndû ûyû ndûngîkûretere kîrathimo kuuma kûrî Ngai-Mûnene, Ngai.”

¹⁹ Vîndî îo mûthamaki Uzia aarûngamîte hekarûrî vakuvî na metha ya kîgongoona ya kûvîvîria ûbani anyitîte kanyûngû ga kûvîvîrua ûbani. Nake nîwarakarirue nî athînjîri-Ngai acio na vîndî wa îo nîwanyitirwe nî mûrimû mûcûku wa ngothi ûthiûrî wake athînjîri-Ngai makîonaga.

²⁰ Azaria mûnene wa athînjîri-Ngai, na athînjîri-Ngai acio engî onthe nîmaamûroririe na makîona atî na ma nîwanyitwa nî mûrimû mûcûku wa ngothi ûthiûrî wake. Nao nîmaamûrutire nja na îvenya, nake nîwetharire ke mwene kuuma vo nîûndû Ngai-Mûnene nîwamûverithîtie.

²¹ Mûthamaki Uzia nîwekarire arî na mûrimû mûcûku wa ngothi nginya mûthenya ûrîa aakwire. Eekaraga nyomba yake arî wenga nîûndû ndeetîkîrîtue gûtonya hekarûrî. Nake mûvîcî Jothamu nîke warûngamîrîrîte nyomba ya mûthamaki na nîke wathaga andû a vûrûri ûcio.

²² Mûrathi Isaia mûvîcî wa Amosi nîwandîkire maûndû marîa mengî monthe marîa mûthamaki Uzia eekire kuuma Kîammbîrîria nginya mûthiia.

²³ Mûthamaki Uzia nîwakwire na akîthikwa mûgûndarî wa athamaki, nwatî ndaathikwa mbîrîrarî irîa ciathikagwa athamaki, nîûndû andû nîmaaugire atîrî, “Arî na mûrimû mûcûku wa ngothi.” Nake Jothamu, mûvîcî nîwatuîkire mûthamaki vuva wake.