2Maû 25 - ÎVUKU RÎA ÛVORO MWARO

Amazia, mûthamaki wa Juda

¹ Amazia aatuîkire mûthamaki arî na ûkûrû wa mîaka mîrongo îîrî na îtano (25). Nîwathanire arî Jerusalemu îvinda rîa mîaka mîrongo îîrî na kenda (29). Ng'ina etagwa Jehoadani wa kuuma Jerusalemu.

² Amazia nîwekire maûndû marîa maakenagia Ngai-Mûnene, nwatî ndaamekaga na ngoro yonthe.

³ Rîrîa ekarîre gîtî Kîam ûthamaki na akîîvanda waro, nîwaûragithire anene arîa maaûragîte îthe ûrîa warî mûthamaki.

⁴ Nwatî ndaaûragithia ciana ciao. Eekire wata ûrîa Ngai-Mûnene athanîte wathorî wa Musa atîrî, “Methe matikaaûragwa nîûndû wa mevia ma ciana ciao, kana ciana ciûragwe nîûndû wa mevia ma methe mao. Nwatî wa mûndû akaaûragwa nîûndû wa mevia make ke mwene.”

Mbaara gatagatî ka Juda na Edomu

⁵ Mûthamaki Amazia nîwacokire akîgomania andû a Juda vamwe. Nîwacokire akîgaania andû a Juda na andû a Benjamini ikundi cia athigari a mbaara kûringana na mbarî ciao. Nîwaigire anene a kûrûngamagîrîra ikundi imwe cia athigari ngiri îmwe na ikundi ciîngî cia athigari îgana rîmwe. Nîwatarire arûme onthe arîa maarî na ûkûrû wa mîaka mîrongo îîrî kûthiî na mbere. Nao onthe maarî arûme ngiri magana mathatû (300,000), arîa mangîvota kûrûa na maicî gûtûmîra matumû na ngo.

⁶ Amazia nîwacokire agîkombora athigari engî a mbaara maarî na vinya na njamba ngiri îgana rîmwe (100,000) kuuma Isiraeli. Aamakomborire kilo ngiri ithatû na magana mana (3,400) cia sîlûva.

⁷ Nwatî mûndû wa Ngai nîwerire Amazia atîrî, “Mûthamaki, ndûkathiî mbaararî na athigari a Isiraeli nîûndû Ngai-Mûnene ndarî vamwe na andû a Isiraeli, ndarî vamwe na andû aya onthe a Efiraimu.

⁸ Nwatî ûngîthiî nao ûgîciragia atî ûkaavootana, ndûkaavootana. Ngai nîke wî na ûvoti wa gûtûma ûvootana kana ûvootwe, ke nîagaakûrekereria ûvootwe nî nthû ciaku.”

⁹ Nake Amazia nîwaûririe mûndû ûcio wa Ngai atîrî, “Nîmbîka atîa nîûndû wa sîlûva îrîa yonthe naarîvire ngîkombora athigari kuuma Isiraeli?” Nake mûndû ûcio wa Ngai nîwamûcokerie atîrî, “Ngai-Mûnene arî na ûvoti wa gûkûva ciîngî nyîngî gûkîra icio.”

¹⁰ Kwoguo Amazia nîwerire athigari a mbaara arîa maaumîte Isiraeli macoke kwao. Athigari a Isiraeli nîmaarakarirue mûno nî andû a Juda na nîmeenûkire marakarîte mûno.

¹¹ Nwatî Amazia nîweyûmîrîrie na agîtongoria athigari ake a mbaara na makîthiî Kîamndarî gîa cumbî. Kûu nîkuo aaûragîre athigari ngiri îkûmi a kuuma Seiru (Edomu).

¹² Andû a Juda nîmaatavire andû engî ngiri îkûmi (10,000) marî mwoyo, makîmavira gacûmbîrî ka nguva ya îthiga na makîmaikia kuuma nguvarî îo îgûrû na onthe makiunîkanga.

¹³ Kavinda wa kau, athigari arîa Amazia aacokithirie a kuuma Isiraeli akîrega mathiî nake mbaararî nîmaatharîkîre matûûra ma Juda, kuuma Samaria nginya Bethi-horoni. Nîmaaûragire arûme ngiri ithatû (3,000) na magîtava indo nyîngî.

¹⁴ Rîrîa Amazia aacokire arîkia kûvoota andû a Edomu, nîwaûkire na mîvuanano ya ngai irîa ciagoocagwa kuo na akîambîrîria kûigooca na kûirutîra magongoona.

¹⁵ Kwoguo Ngai-Mûnene nîwarakarirue nî ûndû ûcio, agîtûma mûrathi kûrî Amazia akamûrie atîrî, “Nîndûî kîratûma ûgooca ngai cia mîvuanano cia andû a Edomu na ngai icio itiavonokia andû ao kuuma kûrî mue?”

¹⁶ Wa akîaragia, mûthamaki nîwerire mûrathi ûcio atîrî, “Nîkwa tûgûtuîte mûtaari wa mûthamaki? Kira kana ûragwe.” Kwoguo mûrathi nîwakirire, nwatî nîwaugire atîrî, “Nîmbicî atî Ngai nî atuîte agûcûkangie nîûndû wa ûndû ûyû wîkîte na nîûregete kûthikîrîria ûtaaro wakwa.”

Mbaara ya andû a Juda na andû a Isiraeli

¹⁷ Amazia, mûthamaki wa Juda nîwacokire akîaria na andû arîa maamûtaaraga na agîtûma ndûmîrîri kûrî Joashi, mûthamaki wa Isiraeli. Joashi aarî mûvîcî wa Jehoahazi, nake Jehoahazi aarî mûvîcî wa Jehu. Ndûmîrîri yaugaga atîrî, “Ûka twonane metho kwa metho.”

¹⁸ Nake Joashi, mûthamaki wa Isiraeli nîwacokerie Amazia, mûthamaki wa Juda atîrî, “Vîndî îmwe mûtî warî na mîgua wî kîrîmarî Kîam Lebanoni nîwatûmanire kûrî mûtarakwe wî kîrîmarî Kîam Lebanoni ûkiuga, ‘Nengera mwarîguo avikue nî mûvîcîwa.’ Nwatî nyamû ya kîthaka Kîam Lebanoni nîyavîtûkîrîre kûu kîrîmarî na îgîkinyanga mûtî ûcio warî na mîgua ûkiunîkanga.

¹⁹ Rîu we Amazia, ûreîra na ngoro na ûgetîîa atî nîwavootire andû a Edomu, nwatî îkara wa kûu mûciî. Ûracaria thîna nîkî na îgatûma we na andû a Juda mwona thîna?”

²⁰ Nwatî Amazia ndaathikîrîria, nîûndû warî mûvango wa Ngai atî Amazia na andû ake mavootwe nîûndû nîmaagoocete ngai cia mîvuanano cia Edomu.

²¹ Kwoguo Joashi, mûthamaki wa Isiraeli nîwaumagarire na akîtharîkîra vûrûri wa Juda. Nao nîmaarûîre vandû vetagwa Bethishemeshi vûrûrirî wa Juda.

²² Athigari a mbaara a Juda nîmaavootirwe nî athigari a mbaara a Isiraeli na nîmaaûrire makîthiî kwao mîciî.

²³ Joashi, mûthamaki wa Isiraeli nîwanyitîre Amazia, mûthamaki wa Juda kûu Bethishemeshi na akîmûvira Jerusalemu. Nîwacokire akîomomora rûthingo rwa Jerusalemu rwa ûraca wa mita magana maîrî (200) kuuma kîvingorî Kîam Efiraimu nginya kîvingorî Kîam mwena.

²⁴ Joashi nîwatavire sîlûva na thaavu cionthe na indo cionthe irîa ciarî hekarûrî irîa Obedi-edomu aamenyagîrîra. Wana nîwocire indo irîa ciarî nyombarî ya mûthamaki na akînyita andû mîgwate na agîcoka Samaria.

²⁵ Amazia ûrîa warî mûthamaki wa Juda nîwatûûrire îvinda rîa mîaka îkûmi na îtano (15) kuuma Joashi mûvîcî wa Jehoahazi, ûrîa warî mûthamaki wa Isiraeli akua.

²⁶ Maûndû marîa mengî monthe marîa mûthamaki Amazia eekire kuuma ma mbere nginya ma mûthiia nîmandîke îvukuurî rîa athamaki a Juda na a Isiraeli.

²⁷ Kuuma rîrîa Amazia aatiganîrie Ngai-Mûnene andû a Jerusalemu nîmaavangire maregane nake. Mûthiiarî nîwaûrire akîthiî îtûûrarî rîa Lakishi. Nwatî andû acio maareganaga nake nîmaatûmire andû mathiî mamûrûmîrîrie kûu Lakishi na nîmaamûragîre kuo.

²⁸ Mwîrî wake nîwakuuirwe na mbarathi na ûkîvirwa Jerusalemu, ûkîthikwa mbîrîrarî irîa ciathikagwa athamaki îtûûrarî rîa Daudi.