2Maû 24 - ÎVUKU RÎA ÛVORO MWARO

Joashi, mûthamaki wa Juda

¹ Joashi aatuîkire mûthamaki arî na ûkûrû wa mîaka mûgwanja (7). Nîwathanire arî Jerusalemu îvinda rîa mîaka mîrongo îna (40). Ng'ina eetagwa Zibia na aarî wa kuuma îtûûrarî rîa Beerisheba.

² Joashi nîwekire maûndû marîa maakenagia Ngai-Mûnene îvinda rîonthe rîrîa Jehoiada, mûthînjîri-Ngai aarî mwoyo.

³ Jehoiada nîwathuurîre mûthamaki Joashi aka aîrî na nîmaaciarîre Joashi anake na erîtu.

⁴ Vuva wa kwathana kavinda kanini, Joashi nîwatuire nîagûtuma hekarû rîngî kûrîa yacûkangîte.

⁵ Nîwetire Alawi na athînjîri-Ngai vamwe na akîmeera mathiî matûûrarî monthe ma Juda maûnganie mbeca irîa ciagîrîrwe nî kûnganua mwaka wa mwaka kuuma kûrî andû onthe a Isiraeli cia gûtuma hekarû rîngî kûrîa gûcûkangu. Nîwamerire meke ûndû ûcio na îvenya, nwatî Alawi nîmaatururire.

⁶ Kwoguo mûthamaki nîwetire Jehoiada, mûnene wa athînjîri-Ngai na akîmûria atîrî, “Ûregete kwîra Alawi maûnganie gooti kuuma kûrî andû a Juda na Jerusalemu nîkî îrîa Musa ndungata ya Ngai-Mûnene aathanire îrutagwe nîûndû wa gûtuma îgema rîa Ngai-Mûnene?”

⁷ (Anake a Athalia nîmaatonyete hekarûrî na magooca indo cionthe irîa ciarî nyamûrîre hekarû na magaitûmîra kûgooca Baali, ngai ya mûvuanano.)

⁸ Kwoguo mûthamaki nîwathanire gûtumwe kathandûkû ka gwîkagîrwa mûvothi na kaigwe vau nja ya kîvingo gîa gûtonya hekarûrî.

⁹ Nîgwacokire gûkîanîrîrwa Juda na Jerusalemu kuonthe atî andû marete gooti ya Ngai-Mûnene. Musa, ndungata ya Ngai aathire andû a Isiraeli marutage gooti îo rîrîa maarî werûrî.

¹⁰ Anene onthe na andû onthe nîmaakenire na nîmaaretire gooti yao na magîkîra kathandûkûrî nginya gagîcûra.

¹¹ Vîndî îrîa kathandûkû gecûra, Alawi nîmaagocaga na magakavira kûrî mûndû ûrîa warûngamagîrîra mbeca icio cia gooti. Nake ona atî nîgecûru, nîwakanenganagîra kûrî mwandîki wa mûthamaki marî na mûnene ûmwe arûngamîrîrîte mûthînjîri-Ngai mûnene. Nao nîmaacokaga makaruta mbeca icio na magacokia kathandûkû varîa kaaigagwa. Ûguo nîguo meekaga wa mûthenya wa mûthenya na nîmaaûnganirie mbeca nyîngî mûno.

¹² Mûthamaki na Jehoiada nîmaanengagîra mbeca kûrî arîa maarûngamagîrîra wîra wa gûtuma hekarû, nao nîmaandîkaga mavundi ma gûtuma nyomba na mathiga na a mbaû na andû arîa maarutaga wîra wa cuuma na gîcango nîguo matume hekarû rîngî kûrîa kwarî gûcûkangu.

¹³ Kwoguo andû onthe nîmaarutire wîra na kîîo na nîmaatumire hekarû rîngî kûrîa yacûkangîtue nginya îgîkara wata ûrîa yekariî mbere.

¹⁴ Rîrîa wîra wa gûtuma hekarû wathirire, aruti wîra nîmaaretire mbeca irîa ciatigarire kûrî mûthamaki Joashi marî na mûthînjîri-Ngai Jehoiada. Nao nîmaatûmîre mbeca icio kûrûtha indo cia gûtûmîrwa hekarûrî: indo cia matega ma kûvîvua, mbakûri cia gwîkîrwa ûbani na indo cia thaavu na sîlûva. Nao nîmaarutaga matega ma kûvîvua hekarûrî wa mûthenya wa mûthenya mavinda monthe marîa Jehoiada aarî mwoyo.

Joashi nîwaregire kûrûmîrîra mîvango ya Jehoiada

¹⁵ Jehoiada nîwatuîkire mûthuuri mûkûrû mûno na agîkua arî wa mîaka îgana rîmwe rîa mîrongo îthatû (130).

¹⁶ Jehoiada nîwathikirwe mbîrîrarî irîa ciathikagwa athamaki îtûûrarî rîa Daudi, nîûndû nîwarutîte wîra mwaro kûu Isiraeli na kûrî Ngai na hekarû yake.

¹⁷ Jehoiada arîkia gûkua, atongoria a Juda nîmaathiîre kûrî mûthamaki Joashi na makîmûthaitha amathikîrîrie. Nake mûthamaki nîwamathikîrîrie.

¹⁸ Andû nîmaatiganîrie hekarû ya Ngai-Mûnene, Ngai wa methe mao na makîambîrîria kûgooca Ashera, ngai ya mûndûmûka na mîvuanano yake. Ngai-Mûnene nîwarakarire nî andû a Juda na a Jerusalemu nîûndû wa mevia mau.

¹⁹ Kûnarî ûguo Ngai-Mûnene nîwatûmire arathi kûrî andû acio makameere mamûcokerere, nwatî nîmaaregire kûmathikîrîria.

²⁰ Roho wa Ngai nîwanyûrûrûkire kûrî Zakaria mûvîcî wa Jehoiada mûthînjîri-Ngai. Nîwarûngamire vandû andû onthe maavotaga kûmwona na akîmeera atîrî, “Ngai araûria, nîndûî gîtûmaga mune maathani ma Ngai-Mûnene! Mûtingîthatûkwa nîûndû nîmûmûregete; kwoguo wanake nîamûregete.”

²¹ Mûthamaki Joashi na andû ake nîmaavangire ûrîa makûûraga Zekaria na nîmaamûragîre kîvarorî gîa hekarû na mathiga.

²² Mûthamaki Joashi nîwariganîrîtwe nî maûndû maro marîa eekîrîtwe nî Jehoiada, îthe wa Zekaria na nîwaûragithirie Zekaria. Zekaria agîtuîkana nîwaugire atîrî, “Ngai-Mûnene aroîtîkîra kwona ûguo mweka na andîvîrîrie!”

Mûthiia wa wathani wa Joashi

²³ Mûthiiarî wa mwaka ûcio, athigari a mbaara a Sîria nîmaatharîkîre Juda na Jerusalemu na makîûraga anene onthe, magîcoka magîtava indo nyîngî mûno makîivirîra mûthamaki wa Damesiki.

²⁴ Wana ethîrwa athigari a mbaara a Sîria maarî anini, Ngai-Mûnene nîwatûmire mavoote athigari eengî a Juda nîûndû andû a Juda nîmaatiganîrîtie Ngai-Mûnene, Ngai wa methe mao. Ûguo nîguo mûthamaki Joashi aaverithirue.

²⁵ Rîrîa athigari a mbaara a Sîria maaumaga Juda nîmaatigire mûthamaki Joashi agurarîtue mûno. Atongoria ake nîmaavangire ûrîa makûmûraga na nîmaamûragire arî gwake ûrîrî. Maamûragire nîûndû nîwaûragithîtie Zekaria mûvîcî wa Jehoiada, mûthînjîri-Ngai. Kwoguo nîwakwire na makîmûthika îtûûrarî rîa Daudi, nwatî matiamûthika mbîrîrarî irîa ciathikagwa athamaki.

²⁶ Andû arîa maavangire ûrîa makûûraga mûthamaki Joashi maarî: Zabadi mûvîcî wa Shimeathi ûrîa ng'ina aarî wa kuuma Aamoni na Jehozabadi mûvîcî wa Shimurithi ûrîa ng'ina aarî wa kuuma Moabu.

²⁷ Rûgano rwa anake a Joashi, maûndû marîa maarathagwa mamwîgiî na ûrîa aatumire hekarû rîngî nî rwandîke îvukuurî rîa athamaki. Rîrîa Joashi aakwire, mûvîcî Amazia nîwatuîkire mûthamaki vuva wake.