2Maû 23 - ÎVUKU RÎA ÛVORO MWARO

Mûthînjîri-Ngai Jehoiada nîwareganire na Athalia

¹ Mwakarî wa mûgwanja, mûthînjîri-Ngai Jehoiada nîweyûmîrîrie, akîrûtha ngwatanîro na anene a ikundi cia athigari magana a mbaara. Anene acio maarî: Azaria mûvîcî wa Jerohamu, Ishumaeli mûvîcî wa Jehohanani, Azaria mûvîcî wa Obedi, Maaseia mûvîcî wa Adaia na Elishafati mûvîcî wa Zikiri.

² Nîmaathiîre matûûrarî monthe ma Juda na makîgomania Alawi na atongoria onthe a mbarî cia mûvîrîga wa Juda na makîthiî Jerusalemu.

³ Andû acio onthe nîmaagomanire vamwe hekarûrî na makîrûtha kîrîkanîro na Joashi mûvîcî wa mûthamaki. Nake Jehoiada nîwamerire atîrî, “Ûyû nîke mûvîcî wa mûthamaki! Tigani atuîke mûthamaki wata ûrîa Ngai-Mûnene eeranîrîte ûvoro wîgiî njiarwa cia Daudi.

⁴ Nîmwîka atîrî, rîrîa mue, athînjîri-Ngai na Alawi mûgaaûka kûruta wîra ûrîa mûrutaga mûthenya wa thavatû, gîcunjî kîmwe îgûrû rîa ithatû kîenyu nîkîo gîgaatuîka arangîri a ivingo.

⁵ Gîcunjî kîngî kîmwe îgûrû rîa ithatû nakîo gîkaarangîra nyomba ya mûthamaki. Gîcunjî kîu kîngî Kîam ithatû gîkaarangîra Kîvingo Kîam Mûcingi. Nao andû onthe nîmagekara kîvarorî Kîam hekarû.

⁶ Gûtirî mûndû ûgetîkîrua gûtonya hekarûrî tiga athînjîri-Ngai na Alawi arîa makeethîrwa magîtungata. Acio nwa matonye nîûndû nî amûre, nwatî andû onthe nîmakaarûmîrîra ûrîa Ngai-Mûnene athanîte.

⁷ Alawi nîmakaarûngama mathiûrûrûkîrîtie mûthamaki, wa mûndû anyitîte indo ciake cia mbaara. Mûndû wa wonthe ûtarî mwîtîkîrie angîgaatonya hekarûrî nîakaaûragwa. Alawi nîmakaathiîcaga na mûthamaki kûndû kuonthe akethagîrwa akîthiî.”

⁸ Alawi na andû onthe a Juda nîmeekire maûndû monthe wata ûrîa maathirwe nî mûthînjîri-Ngai Jehoiada. Wa mûndû nîwaretire andû ake arîa maaumaga wîrarî mûthenya na arîa maatonyaga wîrarî mûthenya wa thavatû, nîûndû Jehoiada, mûthînjîri-Ngai ndaamarekereria mathiî.

⁹ Nake Jehoiada, mûthînjîri-Ngai nîwanengere anene a athigari a mbaara matumû, ngo irîa ciarî nene na irîa ciarî nini. Matumû na ngo icio ciarî cia mûthamaki Daudi na ciaigîtwe hekarûrî.

¹⁰ Mûthînjîri-Ngai Jehoiada nîwaigire andû a kûrangîra mûthamaki wa mûndû anyitîte rûviû na njara. Amwe maarî mwena wa îveti wa hekarû na amwe mwena wa rûgûrû wa hekarû. Engî maathiûrûrûkîrîtie metha ya kîgongoona na hekarû.

¹¹ Jehoiada nîwacokire akîvira Joashi nja, akîmwîkîra ngovia ya ûthamaki kîongo na akîmûnengera mawatho ma ûthamaki. Nîmaacokire makîmûtua mûthamaki. Jehoiada na avîcî ake nîmaamwîtîrîrie maguta na makiuga atîrî, “Mûthamaki, ûrotûûratûûra!”

¹² Rîrîa Athalia eegwire înegene rîa andû mavinyûrîte magîkumagia mûthamaki, nîwathiîre hekarûrî kûrîa andû maarî.

¹³ Rîrîa aaroririe nîwonire mûthamaki arûngamîte mwenarî wa gîtugî Kîam mûromo wa hekarû. Anene a athigari a mbaara na andû arîa maavuvaga tûrumbeta marûngamîte mîena mathiûrûrûkîrîtie mûthamaki na andû onthe a vûrûri magîkenaga makîvuvaga tûrumbeta, na aini a nyîmbo marî na indo ciao cia kwina matongoreretie andû gûkûngûîra. Athalia nîwatembûrangire nguo ciake na akiugîrîria atîrî, “Ûkunyanîri! Ûkunyanîri!”

¹⁴ Mûthînjîri-Ngai Jehoiada nîwatûmire anene a ikundi cia athigari a mbaara na akîmeera atîrî, “Athalia nîarutwe nja arî gatagatî ka athigari na mûndû wa wonthe ûkaageria kûmûvonokia akaaûragwa na rûviû.” Meekire ûguo nîûndû mûthînjîri-Ngai nîwaugîte ndakaûragîrwe hekarûrî.

¹⁵ Kwoguo nîmaamûnyitire na makîmûvira mûciî kwa mûthamaki na makîmûragîra vau vetagwa Kîvingo Kîam mbarathi.

Jehoiada nîwaretire ûgarûrûku

¹⁶ Mûthînjîri-Ngai Jehoiada nîwarûthire kîrîkanîro na andû onthe na mûthamaki atî, nîmagûtuîka andû a Ngai-Mûnene.

¹⁷ Nao andû onthe nîmaacokire makîthiî hekarûrî ya Baali na makîmîomomora. Nîmaaunangire metha ciake cia magongoona na mîvuanano yake na makîûragîra Matani, mûthînjîri-ngai wa Baali vau mbere ya metha cia magongoona.

¹⁸ Mûthînjîri-Ngai Jehoiada nîwacokire akîthuura arangîri a hekarû marûngamîrîrîtwe nî athînjîri-Ngai a mbarî ya Lawi na Alawi arîa Daudi aaveete wîra wa gûtungata hekarûrî na kûrutîra Ngai-Mûnene matega ma kûvîvua kûringana na ûrîa kwandîkîtwe wathorî wa Musa. Arangîri acio nwao maatongoragia nyîmbo magîkûngûagîra na gîkeno wata ûrîa Daudi aathanire.

¹⁹ Jehoiada nîwaigire arangîri a ivingo ivingorî cia hekarû nîguo mûndû wa wonthe ûrî na mûgiro wa mûthemba wa wonthe ndagatonye.

²⁰ Nîwocire anene a athigari a mbaara, andû arîa marî îgweta vûrûrirî, atongoria a andû na andû onthe a vûrûri, na makiumagaria mûthamaki kuuma hekarûrî. Nîmaavîtûkîrîre kîvingorî Kîam mwena wa îgûrû na magîkinya mûciî kwa mûthamaki, na magîkarîria mûthamaki gîtîrî gîake Kîam ûnene.

²¹ Kwoguo andû onthe a vûrûri nîmaakenire na îtûûra rîu rîkîvoorera Athalia arîkia kûragwa.